Mbogimbogi za lonio.
18
1 Ku kalongo kanene. Lwimbo lwa Davidi, mukambi wa Mukota, lwimbide Mukota ku busi bwamonezie ku maboko ma beiti bage bansania, ku maboko ma Saulo, nu we atendile: Nkukutunda, ee Yehowa, magala mane.
2 Yehowa eli lwanda lwane nu kiziki kyane kyalanga kya mukolo nu mukuluzi wane,
Nu Kalaga wane nu lwanda lwane nu itinino lyane,
Nu ngabo zane nu magala mane ma kukinda nu mukolo wane.
3 Nasege ku Yehowa, u wozo watananina kuganunwa,
Ububo nonibwe na beiti bane.
4 Mizigi za lukuo zankanda,
Nu bubi bwingi bwanitizie boba.
5 Mizigi za nsinda zankanda
Nu matega ma lukuo mabede lwabusio lwane.
6 Mu kabebe kane nasegile ku Yehowa,
Nu nalilile ku Kalaga wane.
Ongule iyuki lyane mu numba zage zasililila,
Nu idilo lyane lingide mu matuzi mage.
7 Ububo kisi kyatengiletengile nu kugilimina,
Nu bibanza bya miduko byasogonsile.
Byatengiletengile kubuno abezaga na bongoa.
8 Muuki wabasile mu mwembe wage.
Nu mu kanua kage mwabasile keiya ka kugisia;
Makangania mabangile na kako keiya.
9 Agondile igulu nu kukumba gansi,
Nu kapilo kanene kabede kunsi kwa magulu mage.
10 Abakamine gantata ga banzelo, nu kulenga.
Bubo alengile lubilo gantata ga lumpumpu.
11 Akitile kapilo kuba kiziki kyage kya kwibisa,
Nu mwizi wa mazi nu bimpa bizitu bya meigulu byabede lusu lwage.
12 Lwabusio lwage kyengi kyasanine,
Nu bimpa byalokezye mbula za lubula nu mikenzi za keiya.
13 Yehowa akuluminne mwigulu,
Wozo Wasakama Nunse atendile n'iyuki lyage;
Lubula nu mikenzi.
14 Eisile misungu zage nu kubabalangania,
Nu na mikenzi zongo abakindile.
15 Ububo nuuzi zagelile,
Bibanza bya kisi byamonekile ko
Ku kuzuga kwobe, ee Yehowa,
Na muuza wa mwizo wa mwembe wobe.
16 Alambizie kuboko kwage kutukila kwigulu nu kunkata
Nu kuntikya munkatini mwa mazi mazindu.
17 Anonezie na mwiti wane uli na magala meingi,
Munkatini mwa basombi bane, kubuno babezaga na magala kuntinga.
18 Bavule kundi mu busi bwa kabebe kane,
Tondo Yehowa abezaga mulangi wane.
19 Antikizye nu kuneka ku kiziki kya bubobelelo,
Antikizye kubuno nabezaga namutananizia.
20 Yehowa ankasile lukalilo anga buli kwisanana kwane,
Andigile anga buli kuswaga kwa maboko mane.
21 Kubuno nalangile nzila za Yehowa,
Aba nsyendile bulazi na Kalaga wane mu bwagi.
22 Kubuno milembe zage insania zabezaga lwabusio lwane,
Aba nsyazibilide bulazi na nne.
23 Nu nne nabezaga wasililila lwabusio lwage
Nidangile na bubi bwane bunsania.
24 Ku bubo Yehowa andigile anga buli kwisanana kwane,
Anga buli kuswaga kwa maboko mane lwabusio lwa meiso mage.
25 Ku muntu uli na kyombo wabe na kyombo kweli,
Ku muntu wisanana wabe wisanana kweli.
26 Ku babo bantu baswaga wabe waswaga kubeli.
Ku wozo muntu mubi wabe mubi kweli.
27 Kubuno wonie bantu bakubabazibwa,
Tondo wasigulizie meiso ma kabenga.
28 Kubuno wagulumizizie kasuku kane.
Yehowa wane ansanizie kyengi ku kapilo kane.
29 Ku bukasia bwobe natinine munkatini mw'iyombo,
Nu ku bukasia bwa Kalaga wane nasuluka kitutu.
30 Nzila za Kalaga zisanana,
Idagano lya Yehowa lili lya lebelebe;
Eli ngabo za bansania bakutinina kweli.
31 Kubuno nazi uli Kalaga, ndi ta Yehowa?
Nu nazi uli lwanda, ndi ta Kalaga weitu?
32 Kalaga u wantimba na magala mage,
Nu We akulongeka nzila zane.
33 Akitile magulu mane kuba masasia anga kaseti.
Nu kunikazia ga kiziki kyasakama.
34 Akwigisia maboko mane kwitana bita,
Buno nikumbe na maboko mane bunkanda bwa nsubi.
35 Tondo wankasile ngabo za lonio lwobe,
Nu nalindibwa na kuboko kwobe kwa seidume.
Nu nakuzibwa na kwisigulizia kwobe.
36 Watanwine nzila za masomoneno mane,
Aba magulu mane tamaselemuke.
37 Nayange beiti bane nu kubasanga,
Nsyasubye aaba nu ganasile kubazikya.
38 Nabeite nu kubasumita buno tabazanzuke lingo,
Bakindwe kunsi kwa magulu mane.
39 Kubuno wankasile magala ma bita,
Wabeitizie boba bantu bavwaga kunitania.
40 Wagalukizye beiti bane buno banide mugongo,
Buno nizikye basombi bane bansania.
41 Balilile, tondo takwabezaga muntu wa kubonia,
Balilile ku Yehowa, tondo ntabakwide.
42 Ububo nabagogile kuba anga mukungu lwabusio lwa lumpumpu,
Nabalekede anga bisogo bya mu nzila.
43 Wanonezie na myango za bantu,
Wambikile nibe itoe lya bilongo binsania,
Nu bantu bansizi buno bankitile.
44 Nkungu zibakungwa ku misagu zane, limbizi limozi bananze;
Nu bageni beibikile kunsi kwane.
45 Bageni batambe.
Nu bavwe bagilimina kutuka ku biziki byabo byalanga.
46 Yehowa eli mulami! Nu aganunwe Lwanda lwane!
Nu aganunwe Kalaga wa lonio lwane!
47 We u Kalaga ukunsubaga,
Nu kubika baBilongo kunsi kwane.
48 Ukunonia na beiti bane.
Lebelebe wansakika gantata ga babo bakundwania,
Ukunonia na wozo muntu wa kabenga.
49 Kasi, Yehowa, nakusime mu baBilongo,
Nu nimbe kuganuna izina lyobe.
50 Akasile mwangati wage bukindi bunene,
Nu akukasa mubongibwa wage busoga,
U Davidi nu kibuti kyage aaba ku milyalya