Kusega kulekanukibwa na beiti.
17
1 Masego ma Davidi. Ungwa kwisanana, ungwilila idilo lyane, ee Yehowa.
Tega kutuzi kwobe ku masego mane matakutuka mu milomo za bwengelezi.
2 Lusungio lwane lutuke kwobe,
Meiso mobe malole bitondo bisanana.
3 Wagelenzwide mutima wane; wagulolile gawambaside mu kindi;
Walindikile mutima; tondo ntwasangile kitondo kyampa.
Nakokomezia mutima wane buno kanua kane takatende bubi.
4 Ku lukita lukukita bantu bakuyanga bitondo bya tunua twabo,
Nidangile na nzila za beiya kabenga.
5 Masomoneno mane mayangile nzila zobe,
Nu masindi mane tamegetile.
6 Nkukumana, kubuno wanitabile, ee Kalaga wane.
Tega kutuzi kwobe nu ungwilila iyuki lyane.
7 Lolesia busoga bwobe bwa miganogano, kubuno ukonagia babo bakukulemanina.
Bonie na beiti babo ku kuboko kwobe kwa seidume.
8 Ndange anga kamoni ka liso,
Mbise kunsi kwa kilimelime kya byupi byobe.
9 Ndange na bantu babi bakunyaga,
Nu beiti bantimba buno banite.
10 Balimbania mitima zabo,
Nu tunua twabo tukwisakika.
11 Batutimba kano kaluma ku ndenge insania,
Nu batulola na meiso mabo buno batugusie gansi.
12 Basusanania na kimbwe kikulonda kusoloboka,
Nu anga mwana wa kimbwe kikala mu kiziki kya kwibisa.
13 Zanzuka, ee Yehowa, mulwanie, umukinde.
Na mwene wa nganda wobe ndange na muntu mubi.
14 Ee Yehowa, kuboko kwobe kunonie
Nu bantu ba kisi kikino beli na lukalilo mu kakano kalamo,
Wabeikutia na bikulo byobe,
Babogaboga na bana, bakusigila bana babo ntiko zabo.
15 Tondo namone ku meiso mobe ku kwisanana,
Nabogeboge nkungu zinkayuka mu kisusania kyobe.