Magala ma kimena mu kitatenge
41
1 Nu atendile lingo bunee: “Ndi unavwama kwita kimena na ndobani? Aba kukanda lulami lwakyo na lububi? 2 Ndi unavwama kuswika muzigi ku mwembe wakyo, aba kubotola mukwankete wakyo na ndobani? 3 Ndi kinasega bitondo byingi kuguli, aba kutenda nobe n'iyuki lyabota? 4 Ndi kinakita idagano nobe, buno kibe mukobe wobe ku milyalya? 5 Ndi unayana nakyo anga kazoni, aba kukiswika muzigi kubogiabogia bakinga bobe? 6 Ndi bazubi banavwama kukikunzania, aba kukilongana ku bukunza? 7 Ndi unavwama kusumita kikoba kyage na misungu, aba itoe lyage na kapindi? 8 Bika kuboko kobe gantata gakyo; kengela bita, nu ntwakite lingo. 9 Lola, kilemanizio kyakyo kili bwengelezi; ndi wakimonako, nti wakue boba nunse. 10 Ta umozi uli na bupuka bwa kukisuna, ububo nazi ukuvwama kwemana lwabusio lwane? 11 Nazi wampede tanga kena buno nimusubizieko? Kinsania kili kunsi kw'igulu kili kyane.
12 Nsyalekele kusambala musagu wa biganza byakyo, aba bunene bwa magala makyo aba busoga bwa lukita lwakyo. 13 Nazi unavwama kututula kikoba kyakyo? Aba kukikanda na mizigi ibili za kusondelezia? 14 Nazi unakandula kanua kakyo, kubuno meinyo makyo meli makwitia boba. 15 Kili na lwikotio ku kabamba ka magala ma magamba makyo, nu malandana gamozi bubibu. 16 Igamba limozi lyalandana na lingo, buno muuza tagunabasa gamasamba. 17 Malandana gamozi bubibu, nu tamanalekanukibwa.
18 Kungwa kikwiza, nti kyengi kikusana mu myembe zakyo, nu meiso makyo makusana anga isase lya busi. 19 Ngulumina zikutuka mu kanua kakyo anga keiya, nu nsase za keiya zikubasa kumbuga. 20 Muuki ukutuka mu myembe zakyo, anga ku nyungu zikubiluka nu anga ku nsamba zikugia. 21 Muuza wakyo ukubangia makangania, nu keiya kakubanga mu kanua kakyo.
22 Ikosi lyakyo lili na magala, nu bansania bakugilimina na boba lwabusio lwakyo. 23 Magamba makyo malandana, nu malibatila gantata gakyo bubibu, tamanavwama kutuka. 24 Mutima wakyo guli mubibu anga ikozi, anga ikozi inene lya gansi lya kugogelago. 25 Kungwa kyemanuka, nti mapuka makua boba, ku kabamba ka kutengiatengia mukila wakyo. 26 Ndi muntu amulibula mwene wa nganda, nti buliabulia, aba isumo, aba musungu aba mwene mukali. 27 Kyuma kili kweli anga nsolu zakama, nu nsubi anga muti wabola. 28 Takikutina misungu, nu makozi ma nkumbi meli anga mpepa. 29 Nkoma zikuleluka kweli, nu akuseka ku muzumio wa mwene mukali. 30 Magamba ma nda zage meli makali anga byindi bya malega, akusiga binyantilo anga nkanya mu bisogo.
31 Akukulungula kitatenge anga mazi makukulunguka mu nyungu, nu anga bukubiluka makiti g'iziko. 32 Nzila zikukelima mu mazi kumbusa kwage, nu iyulo lyenga anga mbwe likutamba gantata ga mazi. 33 Mu kisi takuli ukususanania nakyo, kyabumbilwe geteli boba. 34 Kikulola nyama insania zili gantata gage, eli mukota wa nyama insania zikwikotia.”