Kwigonga kwa Yobu
42
1 Nu Yobu akwide Yehowa bunee: 2 “Nizi buno uli Mwiya Mayombo, nu unavwama kukita binsania byukutunda. 3 Wambuzizie bunee: ‘Nazi wozo ukuzangiazangia lwango lwane geteli menge?’ Ububo natendile moki mansikumenya, bitondo bibibu byatinga menge mane binsikumenya. 4 Wantendile bunee: ‘Ungwilila buno nitende, nkukubuzia, nu uwe unakule.’
5 Nungule ku misagu zobe na matuzi, tondo kano kaluma nakumonako. 6 Ububo nkusomba kalamo kane, nu nkwigonga nu kwibulubutia mu mukungu nu mu lwito.”
Kalaga akuzugila bilemba byage bisatu
7 Gasilile Yehowa kutenda moki mamano ku Yobu, atendile ku Elifasi muTemani bunee: “Nili na bongoa bukali nobe nu ku bilemba byobe bibili, kubuno tamwantendede buli bulili anga bwantendede Yobu mukiti wane. 8 Kano kaluma tolazi balume ba ngombe mutubakamo nu bilimba bya mikoko mutubakamo, nu endazi ku mukiti wane Yobu nu kukita kayulo ku kabamba keinyu. Yobu amusegele, nu nne nakule isego lyage buno nsimwitie na nsoni anga buli bukongolo bweinyu, kubuno tamwantendede buli bulili, anga bwantendede mukiti wane Yobu.”
9 Elifasi muTemani nu Bildadi muSuhi nu Zofari muNamati banzile iyuki lya Yehowa, nu Yehowa ongwilide isego lya Yobu.
Mponga za Kalaga ku Yobu
10 Nu Yehowa agalukizye tubebe twa Yobu gaasilile kusegela beida bage. Amukasile mambizi mabili kutinga byabezaga nabyo. 11 Mibuto za Yobu nu babitu bage bansania bavule kumutabangila nu kukita kisagulo ku numba zage. Bamubibizie nu kumubobelezia ku kabamba ka tubebe twamubabazizie Yehowa; nawe na wamukasile bikulo bya feza nu kakomu ka olo.
12 Yehowa atalikide Yobu mponga ku bindi bizinda kutinga bitangi. Yobu abede na mikoko tununu ikumi nu tunazi (14.000), ngamia tununu mutuba (6.000), ngombe tununu tubili (2.000), nu mpunda kanunu (1.000). 13 Abezaga na bana bamulume mutubakamo nu bamukazi basatu. 14 Einikile mutangi Yemima, nu wa babili Kezia, nu wa basatu Kereni-hapuki. 15 Bumbangilwa bwa bakinga ba Yobu bwatingile bwa bango bakikulu ba kisi. Isibo abakasile bwiyani gamozi na babitu babo bamulume.