Kwibezia kwa Yobu
40
1 Nu Yehowa abuzizie Yobu bunee: 2 “Ndi ukwenda myango na Mwiya Mayombo? Wozo ukwenda myango na Kalaga, kasi anakula” 3 Nu Yobu akwide Yehowa bunee: 4 “Nne nsili kena; nikwakule buni? Nidimba munwe ku busundo. 5 Natendile limbizi limozi, nsyakwakule, nu mambizi mabili, nsinatalika kingo.”
6 Ububo Yehowa atendile na Yobu mu lumpumpu bunee: 7 “Ikokomezie anga wamulume, nu nakubuzie mbuzio zane. Nu uwe wanakule. 8 Ndi ukugalukya lusungio lwane? Ndi wansungia buno uwe umoneke wisanana? 9 Ndi uli na magala meigezye na mane, nu iyuki lyobe linazuga anga mukulumino? 10 Su, nti kano kaluma ivwalikye lutanuno nu bunene, nu kwivwalikya lwanzo nu magala. 11 Lolesia bukali bwa bongoa bobe nunse, nu menya muntu na muntu mwiya lwikotio, nu kumusigulizia. 12 Ee, lola ku beiya lwikotio nu kubasigulizia, nyanta babi gabeli. 13 Babise gamozi mu mukungu, nu bakukile mu kiziki kya bakuzi. 14 Ububo nti nabe mutangi kukuganuna, nu kwitabizia buno unavwama kwiyonia.
15 Lola kiboko nyama nnene zinabumbile gamozi nobe, zikulia bisugu anga ngombe. 16 Lola magala ma kibunda kyage, nu ma miki za nda zage. 17 Akutengiatengia mukila wage anga muti, nu misuna za magulu mage zili na magala. 18 makwa mage meli anga nsubi, nu biganza byage bili bibibu anga byindi bya byuma. 19 Eli munene wa bibumbwa bya Kalaga, Mubumbi wage tugu u unavwama kumwita. 20 Idia lyage lili ku miduko, nu nyama insania nkali zikuyana kuko. 21 Eiyombeka gansi ga miti zili na mpololo, nu kubisama munkatini mwa nsekenseke za mu kitanga. 22 Mpololo za miti zikumukukila, nu nsekenseke za muntungo mwa luuzi zamutimba. 23 Ntakukua luuzi lukusunsa mazi boba, eli na bubobelelo aba ndi mazi ma Yordani mitila nu kwidibula kweli. 24 Nazi muntu unaziba meiso ma kyo nu kukikata, aba kubotola mwembe wage na kyuma.”