Kwakula kwa Yehowa ku Yobu
38
1 Munkatini mwa kisoa, Yehowa atendile ku Yobu bunee: 2 “Nazi wozo ukuzangiazangia lwango lwane na moki meteli na menge? 3 Linda kano kaluma anga wamulume, nu kwakula mbuzio zinakubuzie. 4 Wabezaga kuni ganabumbile kisi? Ntende ndi uli na bumenyinino. 5 Nazi wakalile lwango lwa bunene bwakyo? Ndi wizi aba nazi walambizie muzigi wa kukilindika? 6 Kalingilo kakyo keli gantata ga kikizi? Nu nazi wabikile ikozi lya kapindapinda lyakyo? 7 Mu kukya kwa bubo busi, nkeninkeni zimbile gamozi, nu banzelo ba Kalaga balalukile na mbogimbogi.
8 Nazi wakigile kitatenge, gakyabasile mu kisi anga kubutwa kwa mwana? 9 Ganakikukide na lutundutundu anga nsulu, nu kapilo kuba anga isusi lyakyo. 10 Nu kukakizia milembe zane, nu kubika myaga nu nibi ziteli na kugaluka. 11 Ganatendile bunee: ‘Ukabasa gano, tondo ntwatinge; nu gano bimpumi bya lwikotio lwobe tabyasuluke.’
12 Ndi mu kalamo kobe wakakizizie buno busi bumozi bukye, nu kumenyesia kukya kwa busi kiziki kyage? 13 Buno kukate ndenge insania za kisi, nu bagi batitulwe mukyo? 14 Kisi kikugaluka anga ibumba kunsi kwa kamenyikilo, nu binsania bikugaluka anga nsulu. 15 Mu musi bagi tabakukita bitondo byabo, nu kuboko kwasakikwa kwakalika.
16 Ndi wendile mu tunuabalongo twa kitatenge? Aba ndi watabangile kunsi kwa kitatenge? 17 Ndi bakwigulide nibi za kisi kya bakuzi? Aba ndi wamonine nibi za kilimelime kya bakuzi? 18 Ndi wizi bunene bwa kisi? Ntende ndi wizi bubo bunsania!
19 Kuni kuli nzila za kwenda ku kiziki kya kyengi, aba kuni kukwikalaga kapilo. 20 Ndi unavwama kubyeka mu kiziki kya byo, aba kubilolesia nzila za kusubya ku numba za byo? 21 Lebelebe, wizi kubuno wabutilwe mu bindi bibyo, nu maganzo ma bindi byobe meli meingi.
22 Ndi wingide mu numba z'isuku lya lubula? Aba ndi wamonine ku kigenge kya kyengi kya lubula? 23 Binalangile kayikayika ku bindi bya milondo, nu bindi bya nsake nu bita? 24 Ndi wizi nzila za kubeganibwa kwa kyengi? Nu buni bukupupa lumpumpu lukutuka ku seikazi, nu kubalanganibwa kunsania mu kisi?
25 Nazi ukulongeka nzila za mbula nnene, nu nzila za mikenzi za nkuba, 26 buno kulokya mbula ku kisi kiteli na bantu, nu mu kalula kutakwikalaga bantu? 27 Nazi ukununia kisi kyakama, nu kwasia nsamba mu kyo?
28 Ndi mbula zili n'isi? Aba nazi wabutile mame? 29 Nazi wabutile makozi ma lubula? Aba mame ma kwigulu makandwa na mpego, nazi wamabutile? 30 Mpego zikugalukya mazi kuba anga ikozi, nu gantata ga kitatenge anga kiyolo.
31 Ndi unavwama kukanda mizigi za Kilimia,a Aba kukandula nkeninkeni zikumanagwa Ba Mubinga na Mboa? 32 Ndi unavwama kusondelezia nkeninkeni mu bindi bya zo, nu kwenzia Dubu nu byana bya zo? 33 Wizi milembe za kwigulu, ndi unavwama kuzikakizia mu kisi?
34 Ndi unavwama kusakika iyuki lyobe ku bimpa, buno mazi meingi makukukile? 35 Ndi unavwama kusinga mikenzi buno zende, nu kutenda bunee: ‘Tuli gano’? 36 Nazi wabikile menge mu mutima wa muntu, nu kubika bumenyinino mu makengelo? 37 Nazi ukuvwama kuganza bimpa, aba kukubula bimpa bili anga malega ma kwigulu? 38 Nkungu zikukatana mukungu, nu bisogo bikulibatila gamozi.