Magala ma menge ma Kalaga
37
1 Nu atendile lingo bunee: “Nkugilimina na boba, nu mutima wane ukusalima. 2 Ungwililazi, iyuki lya Kalaga, likutuka mu kanua kage anga mukulumino. 3 Akulibalangania kunsania kunsi kw'igulu, nu mikenzi zage ku ndenge insania za kisi. 4 Kumbusa kwa bubo iyuki likungubwa anga mukulumino munene, iyuki lya Kalaga likukulumina mu bunene bwage. Talikuzugila mikenzi kungubwako. 5 Iyuki lya Kalaga likukita miganogano, akukita bitondo binene bitutakusongolola. 6 Akukakizia lubula bunee: ‘Koloka ga kisi,’ nu ku mbula nnene nu ku bususuli akakizia ‘Loka.’ 7 Akukanda mulimo wa muntu na muntu, buno bantu bansania bamenye buni bwakitile. 8 Nyama za mu lubanda zikwenda mu biziki byabo, nu kubisama mu tulimba. 9 Lumpumpu lukutuka kunsi, nu mpego nkali zikutuka kuntata. 10 Muuza wa Kalaga ukugalukya mazi kuba anga makozi na mpego, nu mazi ma luuzi makatane. 11 Akwizazia bimpa na mazi, nu kumabalangania na mikenzi. 12 Bikutimba na ko na ko mu kisi, anga bukukakizia Kalaga, gantata ga kisi kikwikala mu bantu. 13 Kalaga akulusia mbula zinunie kisi, azisinga kusungia bantu aba kubakasa mponga.
14 Yobu, ungwilila kitondo kikino; ikala kibibi, ukengele miganogano za Kalaga. 15 Ndi wizi bwakukakizia ntunduntundu, nu buni bwakukelimia mikenzi zage mu bimpa? 16 Ndi wizi bwatambwa bimpa kwigulu, mulimo wa kuganiagania wa Kalaga Wasililila mu menge? 17 Aba buni bukuzuza nsulu zobe, kungwa lumpumpu lukutuka ku lulenge lwa kwidume lukupupa mu kisi. 18 Ndi unavwama kukasia Kalaga kwanza igulu, anga kiyolo kya nsubi kikusana.
19 Twigisie buni bwa kutenda ku Kalaga, kubuno tuli mu kapilo nu tatukumenya bwa kutenda kweli. 20 Ndi anabuzibwa buno natunda kutenda kweli? Muntu mukizi watunda kukindwa? 21 Muntu ntanavwama kulola ku musi, kungwa lumpumpu lukutinga nu kwengia igulu bupepepe. 22 Kyengi kikutuka kuntata kikusana anga olo, lutanuno lwa Kalaga lukutwitia boba. 23 Tatukuvwama kumenya Mwiya Mayombo; We eli na magala mitila, tondo mu bulili, nu kwisanana ntanabenga wampa. 24 Ububo bantu bakumukua boba, nu ntakwanga babo bakwikotia na menge.”