Kalaga tugu Eli munene
36
1 Elihu eki atenda bunee: 2 “Lindila tanga nikulolesie buno kuli bingo bimozi bya Kalaga. 3 Menge mane matuka kulazi, nu nalolesie bwisanana bwa Mubumbi wane. 4 Kubuno moki mane tameli ma buza; umozi wasililila mu menge eli gamozi nobe. 5 Kalaga eli mwiya bwangato, tondo ntakubenga muntu wampa, eli na bwangato, mu magala ma bumenyinino. 6 Ntakulanga kalamo ka bagi, tondo akukitila beiya tubebe bwisanana. 7 Akulanga beisanana, nu akubika bakota ga bisumbi byabo, nu kubakasa bwangato ku milyalya. 8 Kumbusa nti wamona bakandwa na byuma, nu bakandwa na mizigi za mbabazio. 9 Akulolesia makitilo mabo nu bwagi bwabo, buno bakitile bubi na lwikotio. 10 Akubaluta kungwilila iyano lyage, akubakakizia kugaluka mu nzila zabo mbi.
11 Ndi bongwilila nu kumukitila, nti bindi byabo byabe bisoga, nu myaka zabo insania zabe na mbogimbogi. 12 Tondo ndi tabongwilila, nti bakue na bupanga nu bakue geteli menge. 13 Tondo babo bateizi Kalaga bitila na bongoa, kungwa akubakanda, tabakulila ku Kalaga buno abakasie. 14 Bakukua gabeikili mitoka, nu kalamo kabo kazimina mu bitondo bibi bya butazi. 15 Akonia beiya tubebe ku kabamba ka mbabazio zabo, nu akubeigisia mu mbabazio zabo.
16 Akakutikya mu tubebe, nu kukubika mu kiziki kinene kitabumbutana, nu ukaba n'idia lingi ga meza mobe. 17 Tondo wiyala na lusungio lwa babi, lusungio nu kwisanana byakulindile. 18 Idange na bongoa bwobe tabube bwa kwililika Kalaga, nu ntuzige bunene bwa lukaso kukugalukya. 19 Ndi bikulo byobe, aba bunene bwa magala mobe, bunakutikya mu tubebe? 20 Ntutunde kwida kwa busi, gekwe bantu mu biziki byabo. 21 Idange ntugaluke kukita bubi, kubuno unavwa kubutunda kutinga tubebe. 22 Kengela bunene bwa magala ma Kalaga, nazi uli musozi munene kutinga We? 23 Nazi ukumwana bwakite, aba nazi ukumutenda bunee: ‘Wakitile buteisanana?’ 24 Kengela kuganuna makitilo mage mansania, anga bukumaganuna bantu mu nimbo. 25 Bantu bansania bamonine ku bubo bwakitile, nawe wabimonineko bulazi.
26 Kalaga eli munene nunse, nu tatunamumenya, nu myaka zage tazinaganzwa. 27 Kalaga akuluta lutundutundu kweli, nu kulugalukya kuba mamata ma mbula. 28 Bimpa bikumalekela, nu makukoloka gantata ga bantu. 29 Ta umozi wizi buni bukulengia Kalaga bimpa, aba buni bwakubizia mikulumino ku igulu linsania. 30 Akwitimbia na mikenzi zage, nu akukukila maziba ma kitatenge. 31 Na magala ma makitilo mage akwangata bantu, nu kubeikutia n'idia. 32 Akukata mikenzi na maboko mage, nu kuzisa kuko kwakutunda. 33 Ndi muntu akungwa ku mikulumino, nti amenya buno kisoa kili bwigi, nu nyama nu zo zizi buno kikuvwa.”