Elihu asambala kwisanana kwa Kalaga
34
1 Elihu itide kutenda bunee: 2 “Inyuwe beli na bumenyinino, ungwililazi moki mane, nu inyuwe beiya menge, nnungwililazi. 3 Kubuno matuzi makulindika moki, anga lulami lukusonda idia. 4 Tusombole bwisanana, tumenye munkatini mweitu kikizi kili kisoga. 5 Kubuno Yobu atendile bunee: ‘Nili wisanana, tondo Kalaga akusomba kwisanana kwane. 6 Nisanana tondo bakummana buno nili muza, nsyagile, tondo kyulu kyane takinavwama kona.’ 7 Muntu mukizi uli anga Yobu, ukunua kabenga anga mazi? 8 Akwenda gamozi na bagi, nu kugomia na babi. 9 Kubuno atendile bunee: ‘Kutananizia Kalaga takuli mutali ku muntu.’
10 Inyuwe bantu beli na bumenyinino, nnungwililazi, tabunakulungana ku Kalaga kukita bubi, aba ku Mwiya Mayombo kukita buteisanana. 11 Akukalila muntu na muntu geigezye mulimo wage, nu akitile muntu na muntu bulingilingi na makitilo mage. 12 Lebelebe Kalaga ntakukita bubi, nu Mwiya Mayombo ntanagalukya bwisanana. 13 Nazi wakasile Kalaga kwangata kisi? Aba nazi wamukasile kulanga binsania? 14 Ndi anagalukya makengelo mage ku muntu, nu ndi akukundamania lingo muuza wage nu mwizo wage, 15 bibumbwa binsania byazike gamozi, nu bantu basubye ku bilongo.
16 Ndi uli na menge menyinina iyuki lilino, nu ungwilila moki mane, 17 ndi wozo ukusomba bwisanana anangata? Ndi unasungia Wisanana nunse nu Mwiya Mayombo? 18 Ndi nteli We unatenda ku mukota bunee: ‘Uli bulia?’ aba kutenda ku mitonge bunee: ‘Muli bagi?’ 19 Tondo We ntakukutya mitonge aba bagumi kutinga bazambi, kubuno bansania babumbilwe na maboko mage. 20 Kitangalabesi bakua, nu tabamonekeko lingo, ndi beli banene bakue mu kindi, nu batikibwe geteli maboko ma muntu.
21 Meiso ma Kalaga makulola ku makitilo ma bantu, nu akumona ku masomoneno mabo mansania. 22 Takuli kapilo aba kilimelime kya lukuo, kinabisa bakiti ba bubi. 23 Kubuno Kalaga ntakwiyanina kukengela muntu, buno ende lwabusio lwage kusungibwa. 24 Anavwama kutikya bakota ku bwangato bwabo geteli kulondola, nu kubika bango mu bisumbi byabo. 25 Kubuno akumenya makitilo mabo, nu bubi bwabo bwamenywa mu kindi, nu bakuzikibwa. 26 Lwabusio lwa bango bantu, akubasungia ku kabamba ka bubi bwabo, 27 kubuno bagalukya makitilo mabo, buno tabamuyangage lingo nu tabanzage makitilo mage. 28 Idilo lya bazambi lyabasile ku Kalaga, nu ungule ku idilo lya babo bakubabazibwa. 29 Kungwa eikala kibibi, nazi unavwama kumwagia? Nu ndi abisama nazi unamumonako? Tondo akukwila bilongo nu bantu kyombo. 30 Ntanabika mubi kwangata, buno abikile bantu matega.
31 Ndi muntu unsania anabula Kalaga bunee: ‘Nitabizia nsungio; nsyage lingo,’ 32 Aba ndi atendile bunee: ‘Nnigisie bubo bunsikumona, ndi nagile nti nsyage lingo.’
33 Ndi lukalilo lwobe lwabe anga kusombola kobe, nu ntukuziga kwigonga? Kili kitondo kyobe kusombola, ta kyane. Ububo ndolesie buwizi. 34 Bantu ba bumenyinino nu beiya menge, bannungwilila nu kuntenda bunee: 35 ‘Yobu ntakutenda na menge, nu moki mage tameli na bumenyinino.’ 36 Yobu atunganana kulindikwa nunse, kubuno akwakula anga muntu mubi. 37 Akutalikila buguni ku mibi zage, akututa nkasa munkatini mweitu, nu akutalikila bitondo byage ku Kalaga.”