Elihu akwakula myango za Yobu
33
1 Nu atendile lingo bunee: “ Tondo Yobu, nakusega ungwilila moki mane, Nu binsania binkutenda. 2 Lola kano kaluma, nkulimbula kanua kane, nu lulami lwane lukutunda kutenda. 3 Moki ma mutima wane meisanana, tameli na bwengelezi, nu nkutenda binizi biligo. 4 Nabumbilwe na Muuza wa Kalaga, nu kupila kwa Mwiya Mayombo kukundamia. 5 Nnakule ndi wavwama, nu longeka bitondo byobe lwabusio lwane. 6 Nili muntu lwabusio lwa Kalaga anga uwe, nabumbilwe ku bilongo. 7 Ntukue boba na kusalimia kwane, nu buzitu bwane tabwakukutie.
8 Nungule buwatendile, nu nungule moki mobe mansania. 9 Nili wasililila geteli bwagi, nu nsili na katati, nu munda mwane tamuli bwagi. 10 Tondo Kalaga akumona ku katati mundi, akunganza anga mwiti wage. 11 Akubika magulu mane mu bikando, nu akulola ku masomoneno mane mansania. 12 Lola, mu kitondo kikino ntuli wisanana, nakwakula buno Kalaga eli munene kutinga bantu.
13 Kubuni ukwenda myango nage? Kubuno Kalaga ntakwisula bitondo byage binsania. 14 Lebelebe Kalaga akutenda limbizi limozi aba mabili, tondo ta umozi ukubukata. 15 Akutenda mu ndozi nu mu tulolesio twa mu kindi, kungwa beiyombeka tulo tubibu, nkungu zibakwiyombeka ga mugu. 16 Akuzibula matuzi ma bantu, nu kubeitia boba na mano mage. 17 Buno agalukye muntu mu lukita lwage, nu kumulanga ku lwikotio lwage. 18 Akulanga mutima wage buno tawende mu muzinga, nu kalamo kage takeitwe na mwene wa nganda. 19 Akusungia muntu na lubaba ga mugu wage, nu mbabazio zitila nunsania mu makwa mage. 20 Aba mutima wage ukusomba idia, nu mutima wage ukusomba idia isoga lili na nse. 21 Misuna za mubili wage zoma, nu makwa mage mabasa kumbuga. 22 Mutima wage guli bwigi na muzinga, nu kalamo kage kese bwigi na lukuo.
23 Ndi mwanzelo eli gamozi nage, anga mukulumania, umozi munkatini mwa kanunu kamozi, kulolesia muntu bwatunganana kukita. 24 Nti Kalaga anamukwila kyombo nu kutenda bunee: ‘Mukulule buno ntende ku muzinga, kubuno namona bukuluzi.’ 25 Nti alunde lingo anga mwana muto, nu magala mage masubye anga bwabezaga mutoka. 26 Kungwa asega ku Kalaga, anitabizibwa, nu kulola kweli na mbogimbogi, nu akusubizia muntu bulili bwage. 27 Aganune Kalaga na lwimbo luluno bunee: ‘Natukile mu nzila zisanana nu nagile, ntansungizie anga geigezye bwagi bwane. 28 Kalaga onezie mutima wane buno nsyagelile mu muzinga, nu kyengi kyasanizie kalamo kane lingo.’
29 Ntukumona, Kalaga akukitaga bubo ku bantu mambizi mabili aba masatu. 30 Buno asubye mutima wage kutuka mu lukuo, buno kyengi kya kalamo kimusanine. 31 Yobu, nnungwilile. Ikala kibibi, nikusambalile. 32 Ndi uli na bwa kutenda, nnakule, kubuno nkutunda kukubingia. 33 Ndi ta bubo, nnungwilile tanga, ikala kibibi nu nakwigisie bumenyinino.”