Kutenda kwa Elihu
32
1 Babo bantu basatu balekede basigile kwakula Yobu, kubuno eibingizie wenyene. 2 Ububo Elihu mwana wa Barakeli muBuzi, wa baRama, ongedwe Yobu, kubuno Yobu eibingizie wenyene kutinga Kalaga. 3 Nu ongedwe bilemba bisatu bya Yobu; kubuno tabavwamine kwakula myango za Yobu, nu basungizie Yobu. 4 Ububo Elihu alindide babo basatu kutenda na Yobu, kubuno we abezaga muto wabo. 5 Gamonine Elihu buno babo basatu tabavwamine kwakula, ongilwe bubibu.
6 Ububo Elihu mwana wa Barakeli muBuzi, atendile bunee: “Nne nili musikila nu beinyuwe muli bakulu, ububo nabede na boba nu nikede kibibi, nu nsyatundile kumulolesia makengelo mane. 7 Nakengede buno bakulu batende tanga, kubuno bakulu beli beiya menge. 8 Tondo kano kaluma namenya buno muuza guli mu muntu, ukukasagwa bumenyinino na muuza wa Mwiya Mayombo. 9 Takuba mukulu tugu ukuba na menge, aba takuba mukungu ukuba na bumenyinino. 10 Ububo nkutenda bunee: ‘Nnungwililazi nitende makengelo mane.
11 Nalindide moki meinyu, nu nungwilide lwango lweinyu gamwalondile bwa kutenda. 12 Namungwilide nunsania, nu ta umozi wakindile moki ma Yobu. Aba ta umozi munkatini mweinyu wamwakwide mbuzio zage. 13 Munavwa kutenda bunee: “Tuli na menge.” Kalaga anamukinda, ta muntu. 14 Kubuno ntatendile kundi, ububo nsyamwakule ku moki meinyu. 15 Bangamine, nu tabakwide lingo, tababede lingo n'iyuki lya kwakula. 16 Nalindide, kubuno tabatendile lingo. Bemanine, aba tabakwide lingo. 17 Nu nne lingo, namwakule na moki mane, nu kulolesia makengelo mane. 18 Kubuno niyala na bitondo, nu muuza guli munda mwane gukunsindika kutenda. 19 Mutima wane wiyala anga katembe kato keiyala na maku, nu takili n'itengu nu kili kayikayika kubuga. 20 Nitende buno nimone bubobelelo, nu natunganana kulimbula kanua kane nu kwakula. 21 Nibinibi nsikutye muntu wampa, aba kutananizia muntu unsania. 22 Kubuno nsizi kwinikana meina makukutya, Mubumbi wane anavwa kunita lubilo.”’