Kulonda kwa Yobu
31
1 Nu atendile lingo bunee: “Nakitile idagano na meiso mane. Kubuni ninalola mukinga? 2 Kalaga mwigulu atusombolede kikizi? Kikizi kili bwiyani bweitu kutuka ku Mwiya Mayombo wa mwigulu? 3 Ndi uteisanana ntanasungibwa na mbabazio, aba mukiti wa bubi, na bitondo bibibu bya kitangalabesi? 4 Ndi Kalaga ntakumona ku misako zane, aba ntakuganza masomoneno mane? 5 Ndi nakalile lwango lwa kweka buza, aba kusasia na lukita lwa bwengelezi? 6 Kalaga anatula mulondo wane na kilindiko kyisanana, nti anambingia. 7 Ndi natimbile nu kusiga nzila zisanana, aba ndi mutima wane wayangile ntundo za meiso mane, aba ndi maboko mane meli na nsese za bwagi, 8 ndi bubo, nti ungo alie ku matubulo manayikile, aba kuyula bibyo byasile.
9 Ndi mutima wane walutilwe na mukikulu, mu kubisama ku lwibi lwa munane, 10 Ndi bubo, nti mukikulu wane atutile ungo bugali, nu ende mu butazi. 11 Kubuno bubo bunabede bwagi bunene, nu ninasungibwa na ngatu ku lusu lwa milondo. 12 Bubo bunaba anga keiya kakali, kanagisia mutali wane unsania.
13 Ndi nasombile bitondo bya bakiti bane bamulume nu bakikulu, gabavule kundi na myango zabo? 14 Buni bunakule Kalaga, ndi anemanina nu kundondozia ku mulondo wozo? 15 Wozo wambumbile mu nda za mmane, ndi ntababumbile nu bo mu nda za ninabo? Atubumbile tubabili.
16 Ndi nimine muzambi kyansegaga, nu kwima musigala kyalindilaga? 17 Ndi nalide idia nnenyene, nu kutakasa nkubi? 18 Kilo, kutukila bwana bwane namulangile anga isi; kutukila bwana bwane nalangile musigala. 19 Ndi nsyakwilide babo beli mundulu kyombo? Aba babo bakule na mpego buno tabakuvwama kukunza nsulu? 20 Ndi ntansimine mu mutima wage, gongule muzuzo wa myoza za mukoko wane. 21 Ndi nabezaga ku lulenge lwa babo, batulaga milondo za nkubi buteisanana; 22 ndi nakitile anga bubo, nti kituli kyane kikoloke, nu makwa ma kuboko kwane makalike. 23 Nkukua mbabazio za Kalaga boba, nu ku kabamba ka bunene bwage, nsikuvwama kukita kampa.
24 Ndi nkutunda olo, nu kutenda buno zili kilemanizio kyane. 25 Ndi nabogilebogile ku kabamba ka bwingi bwa bikulo byane, aba kubuno namonine byingi ku kabamba ka mulimo wane? 26 Ndi nalutilwe kulola kusana kwa musi, nu kwenda kwa mwezi? 27 Ndi mutima wane wabikumbaminne, nu kulambya kuboko kwane na kubiganuna. 28 Kukita bubo kunabede bwagi bwa kusungibwa, nu kutuna Kalaga wa kwigulu.
29 Ndi nabogilebogile gabigizibwe mwiti wane, aba gamubaside mibi; 30 lebelebe nsyagile na kanua kane, nu nsyaswilide ungo. 31 Takuli muntu umozi wa numba zane watendile buno, ‘Tatwamone idia lyakuka!’ 32 Nsyazigile mugeni kwiyombeka gambuga, tondo namwanzide mu numba zane. 33 Ndi nkubisa mibi zane anga bango bantu, nu kubisa bwagi bwane mu mutima wane 34 kubuno nakule bantu boba nu kubengwa na bikanga, aba kwikala kibibi nu kubisama mu numba zane?
35 Songo ninaba na muntu wa kunnungwilila, kano kaluma nasila kutenda byane binsania, Mwiya Mayombo anakule, songo musongezi wane asanzile kusongela kwage, 36 ninakwekile ga bituli byane, nu kwibika ko ku itoe lyane anga nkumbu, 37 ninamulolesizie binsania byane, nu ninabasile lwabusio lwage anga nkangala.