Bindi bya tubebe twa Yobu
30
1 Nu atendile lingo bunee: “Kano kaluma nanyegwa na basikila, bana ba bamulume banasombile kubika gamozi na mboa zikulanga mikoko. 2 Magala ma bantu mankitile kikizi? Kubuno magala ma bantu matamba. 3 Bonda na meiyanino nu nzala, bakulonda mizi za lubanda, balide bisugu byasile mu kalula ka makindu. 4 Bakolaga biguma nu nsamba mu biziki mu byasaga, nu mizi za bisugu zili idia lyabo. 5 Bapumbizibwe ku meiso ma bantu, nu bantu babamanine beibi. 6 Bakwikala mu mpinga za makozi, nu mu mizinga za mu nsi nu mu tulimba twa makozi. 7 Bakulila anga mpunda mu bisugu, nu bakwikala gansi na miti za mikele. 8 Beli bana ba bikongolo, u bana ba bagi; nu bantu babapumbizie mu kisi. 9 Kano kaluma niseli lwimbo lwabo, buligo buno nne niseli musumo wabo. 10 Bakunsomba nu kumbembuka, kungwa bammonako nti banswila matazi ku meiso. 11 Kubuno Kalaga akandwide muzigi wane wa bunkanda nu kunsungia. Nu tabakunkua boba lingo. 12 Bantu babi bantimba ku kuboko kwa seidume; bakusindika magulu mane, nu kunkitila bitondo bitaswaga. 13 Babigia nzila zane, bakunsakya nu takuli wa kubakasia. 14 Kubiga kwabo kwambasila anga mazi meimula mukiga, nu nakindwa nunsania. 15 Boba bunene bukungilimizia, nu lwanzo lwane lwatukibwa anga nsamba zalengibwa na lumpumpu. Nu kilemanizio kyane kyabomba anga lutundutundu.
16 Mutima wane watamba nunsania, nu bindi bya tubebe byambasila. 17 Mu kindi makwa mane makumbabazia, nu lubaba lwa byulu byane talukulekela. 18 Ku kabamba ka magala ma Kalaga, akuba anga nsulu zane, akunkanda anga nsulu zane zankanda ku ikosi. 19 Kalaga anisile mu bisogo, nu niseli anga mukungu nu lwito.
20 Nkulila kuguli, ee Kalaga, tondo ntukunakula, nu nemana lwabusio lwobe nu ukundola tugu. 21 Useli mukali kundi, nu magala ma maboko mobe makumbabazia. 22 Wanzanzula na lumpumpu nu kuneka gantata galo, nu kundengia kuno nu kuko na kisoa. 23 Nizi wambikile mu nzila za lukuo, nu wankulumanie na bango balami bansania.
24 Ndi wozo uli na tubebe ntanalambya kuboko? Nu mu mbabazio ndi ntanasega bukasia? 25 Ndi nsyalilide wozo uli gabibu? Nu ndi nsyakwilide bazambi kyombo? 26 Nalemaninne bitondo bisoga, tondo bibi byambaside, nu ganalindilaga kyengi, kapilo kambaside. 27 Mutima wane ukuzangazanga anga mazi makubiluka, tagukumunwa, nu bindi bya tubebe bikumvwila tabikusila. 28 Nkwenda mu tubebe geteli musi, nu nkwemana mu musanganano nu kusega bukasia. 29 Kano kaluma nyama nkali u mubuto wane, nu sulukutu u munane. 30 Kikoba kyane kina nu kikututuka, nu mubili wane ukuzuza bukali. 31 Nzenze zane zikwimba nimbo za tubebe, nu bapili bane bakwimba lukita lwa kulila.”