Yobu akengela bindi byage bya mbogimbogi
29
1 Yobu itide kutenda lingo bunee: 2 “Songo nikili anga mu bindi bya wakalazi, bindi bibyo u byandangaga mu Kalaga. 3 Asanizie kyengi kyage g'itoe lyane, nu kyengi kikyo u kyantabangizie mu kapilo. 4 Mu bindi bibyo nabezaga na magala, nu Kalaga abezaga mulangi wa numba zane. 5 Gabezaga Mwiya Mayombo eikili gamozi na nne, bana bane babezaga bantimba. 6 Mu nzila zane mwabezaga mabele meingi, nu makozi mankamatide makiti mengi. 7 Nkungu zinazanzuka kwenda ku lwibi lwa mwino munene, nu ndi nidongekela kisumbi kyane ga lusu lwa bamulume, 8 Mitoka zammonako nu kubisama, nu bakulu nti bazanzuka nu kwemana. 9 Mitonge zikede kibibi, nu bikatide ku tunua twabo na maboko mabo. 10 Moki mabo mabotile, nu ndami zabo zalandile ku byangangu.
11 Gabanungwilide, banganwine, nu gabammonineko, bandongekede. 12 Gabasile bazambi kundi, nabakasizie, nu nkubi zitabezaga na mukasia. 13 Babo babezaga bwigi na kukua bankasile mponga, nu nabogeziebogezie mutima wa musigala. 14 Navwalile kwisanana anga nsulu zane, nu kubingibwa kwane kwabezaga ikoti nu nkumbu zane. 15 Nabezaga meiso ma byuku, nu magulu ma bitunga. 16 Nabede isi wa bazambi, nu nungwilide tubebe twa bageni. 17 Nakindile bantu babezaga anga nyama nkali, anga butukutikya idia mu kanua kazo ku magala.
18 Nakengede buno nakue mu numba zane, nu nne nitalikile bindi byane anga misege za kitatenge, 19 Nu anga mizi za muti zikwingila munsi nu kubasa ku mazi, nu nsamba zanune na mame kindi kinsania, 20 Lukumu lwane talukutuka, nu bunkanda bwabe na magala mu maboko mane.
21 Bantu banungwilide nu kulindila, nu beikede kibibi kungwilila lwango lwane. 22 Kumbusa kwa kutenda kwane ungo ntatendile lingo, nu moki mane mabanunizie anga mame. 23 Bandindide anga bukulindilwa mbula, nu kulindila moki mane anga mbula ntangi za kilimo. 24 Ganabasekizie tabakatizizie, kilungi kyane kyabatananizizie. 25 Nasombwede nzila zabo, nu nikede anga mukota wabo, nabezaga anga mukota wa mayombo, anga ukubobelezia babo beli na tubebe.”