Menge makutuka ku Kalaga
28
1 Nu atendile lingo bunee: “Kuli biziki bya kumba feza, Nu biziki bya kusuga olo. 2 Kyuma kikutikibwa mu bilongo, nu nsubi zikuyengulwa mu makozi. 3 Muntu akusiga kapilo, akumba bulazi nunse, makozi mabiswa mu kapilo, mu kilimelime kya lukuo. 4 Bakumba mu nsi bulazi ku biziki bili bulazi na bantu, nu byibililwa na batingi; kubuno bombile bulazi mu nsi. Baswikwa bulazi na bantu nu bakusumba. 5 Tondo kisi kyasia idia, nu nsi zatulungulwa na keiya. 6 Mumo muli makozi ma yakuti ma bukunza bukali ma kukita bya malebo, nu makozi meli na olo. 7 Tuzoni tatwizi nzila zezo, nu ndiu tazazimonineko. 8 Nyama nkali tazanyantile muzo, nu bimbwe tabyendile muzo. 9 Bantu bakubungula lwanda lubibu, nu kutulungula miduko. 10 Bakwata nzila mu lwanda, nu liso lyage likumona ku makozi meingi ma bukunza bubibu. 11 Bakukiga nuuzi buno tazigele mazi, nu kinsania kili mu nsi nti bakimona.
12 Tondo menge masangwe kuni? Nu bumenyinino buli kuni? 13 Muntu ntanamenya bukunza bwamo, tamakumonekako munkatini mwa kisi kya balami. 14 Kitatenge kikutuna bunee: ‘Tameli mundi.’ Kiziba kikutuna bunee: ‘Tameli kundi.’
15 Olo nsoga tazinamakunza, aba feza ningi tazakuka ku bukunza bwamo. 16 Aba olo za kisi kya Ofiri tazakuka kumakunza, aba makozi makisimana nu mina makumanwa sardoniki nu yakuti ma malebo. 17 Olo nu masangabwe tamanalingimana namo, aba tamanagalukibwa ku bibyo byakitwa na olo nsoga. 18 Makozi ma feza lukama nu masangabwe tabigezye na bukunza bwamo, nu bukunza bwa menge bwatinga bubo bwa makozi ma akiki. 19 Makozi ma bukunza bubibu m'idangi lya manzano tameigezye na bukunza bwa menge. Aba tamanakunzibwa na olo nsoga.
20 Menge makutuka kuni? Nu bumenyinino bukusangwa kuni? 21 Mabiswa ku bansania balami, nu tuzoni twa mu mpelela. 22 Kuzika nu lukuo bikutenda bunee: ‘Tungule tugu ku iyuki lyamo.’
23 Kalaga wenyene tugu u wizi nzila zamo, nu We wenyene eizi kuni kumeli. 24 Kubuno akumona ku ntungo insania za kisi, nu akumona ku binsania bya kunsi kw'igulu. 25 Akakizizie magala ma lumpumpu, nu alindikile mazi. 26 Abikile mulembe ku mbula, nu nzila za mikenzi nu mikulumino. 27 Nkungu zezo amonine ku menge nu kumasambala, alondile bunene bwamo nu kubumenya. 28 Atendile ku bantu bunee: ‘Kukua Kalaga boba kuli menge, nu kubembuka bubi buli bumenyinino.”’