Yobu akusambala kuzikibwa kwa bagi
27
1 Yobu akutenda mu misumo zage bunee: 2 “Anga bukulama Kalaga wantikizye bulili bwane; nu Mwiya Mayombo wasungizie kalamo kane; 3 nkungu zinili na kalamo, nti muuza wa Kalaga guli mu myembe zane, 4 nsyatende bubi mu kanua kane, aba nsyeke buza mu bindi byane binsania. 5 Kalaga anzugile ndi namubingia buno mwisanana, nsinalekela buno nisanana aaba nu nakua. 6 Nkukokomezia kwisanana kwane nsyakulekele, mutima wane tawanzugile mu kalamo kane kansania. 7 Beiti bane babe anga bagi, nu babo bakuzanzuka kunita babe anga bateisanana. 8 Kikizi kilemanizio kya wozo uteli na Kalaga kungwa akua, kungwa Kalaga atikya kalamo kage. 9 Ndi Kalaga anungwilila kulila kwage, kungwa tubebe twamubasila? 10 Ndi abogeboge mu Mwiya Mayombo, nu kusega ku Kalaga nkungu insania?
11 Namulolesie magala ma Kalaga, nu nsyamubise lwango lwa Mwiya Mayombo. 12 Lebelebe mwabimenyine beinyuwe bansania; kubuni mukukita bukongolo?
13 Ububo bukulongeka Kalaga ku bagi, u bwiyani bwa beiti bwakasilwe na Mwiya Mayombo. 14 Aba ndi bana bage beli beingi, nti bakue na mwene wa nganda, nu ibuta lyage lyakue na nzala. 15 Babo bakusigala bakue na lusambo lukali, nu misigala zabo tazabalilile.
16 Aba bikulo byage byitila anga misege, nu nsulu zage nsoga zili ningi anga bisogo, 17 Atalikile nsulu zage tondo beisanana bazivwale, nu basoga babegane feza zage. 18 Eiyobakide numba zage anga lukilakila lw'iyululu, nu anga lusu lwa mulangi w'isoa.
19 Mugumi eiyombeka mu iguma lyage limbizi lizinda, kusila ayuke geteli kena. 20 Abede na boba bwingi anga mwiyalo, nu kisoa kyamulengezie mu kindi. 21 Lumpumpu lunene lwamweka nu nteligo, nu kumutikya mu kiziki kyage. 22 Lumpumpu lukumugingyagingya kuteli kyombo, nu akutunda kulutina. 23 Bantu bamututile nkasa, nu kumukugila kutukila ku kiziki kyage, nu kwida tugunzu.”