Kwakula kwa Yobu
26
1 Ububo Yobu akwide bunee: 2 “Buni ukukasia wozo uteli na magala? Aba konia kuboko kwa watamba? 3 Ndi wakalile lwango na wozo ukwida menge? Nu ndi wasambede menge ku bantu beingi? 4 Ukusambalila nazi, nu ukutenda na muuza mukizi? 5 Bakuzi bakugilimina, nu binsania bili kunsi kwa mazi nu binsania bikulama mo. 6 Nsinda zili bwasi lwabusio lwa Kalaga, nu kiziki kya nsinda a takyakukilwa. 7 Akwanza igulu gantata ga mpelela, nu akubika kisi geteli kena. 8 Akulanga mazi mu bimpa, nu bimpa tabikwatika namo. 9 Akutimbia kisumbi kyage kya bukota, nu kukikukila na bimpa. 10 Akubika mwaga wabilingana gantata ga mazi, nu mwaga gasamba kapilo nu kyengi. 11 Mango ma meigulu makugilimina, nu kwangama na kuzugila kwage. 12 Ku magala mage akulungwide mazi ma kitatenge, nu na menge mage akindile nyama nkali za mu kitatenge. 13 Akwengia igulu na lumpumpu lwage, nu akukata nzoka zikutina na kuboko kwage.
14 Kikyo kili kyindi kikeke kya makitilo mage, tukungwaga kawewe kage tugu, tondo nazi unamenya magala mage meli anga mukulumino.”