Bantu balumbide kwitabizia mulembe wa Kalaga
10
1 Bantu beitabizizie kulumbila kilumbilo nu kakengelezio babezaga, Nehemia u mwangati, mwana wa Hakalia, nu Zedekia; 2 nu basankoga: Seraya, nu Azaria, nu Yeremia, 3 nu Pasuri, nu Amaria, nu Malkiya; 4 nu Hatusi, nu Sebania, nu Maluku; 5 nu Harimu, nu Meremoti, nu Obadia, 6 nu Danieli, nu Ginetoni, nu Baruku; 7 nu Mesulamu, nu Abiya, Miyamini; 8 nu Masia, nu Bilgayi, nu Semaya; 9 nu baLawi, u babano: Yesua mwana wa Azania, nu Binui wa kikanga kya Henadadi, nu Kadimieli; 10 nu mibuto zabo: u Sebania, nu Hodia, nu Kelita, nu Pelaya, nu Hanani; 11 nu Mika, nu Rehobu, nu Hasabia, 12 nu Zakuri, nu Serebia, nu Sebania; 13 nu Hodia, nu Bani, nu Beninu; 14 nu bakulu ba bantu u babano: Parosi, nu Pahati-Moabu, nu Elamu, nu Zatu, nu Bani; 15 nu Buni, nu Azgadi, nu Bebayi; 16 nu Adonia, nu Bigwayi, nu Adini; 17 nu Ateri, nu Hezekia, nu Azuri; 18 nu Hodia, nu Hasumu, nu Bezayi; 19 nu Harifu, nu Anatoti, nu Nebai; 20 nu Magipiasi, nu Mesulamu, nu Hesiri; 21 nu Mesezabeli, nu Zadoki, nu Yadua; 22 nu Pelatia, nu Hanani, nu Anaya, 23 nu Hoshea, nu Hanania, nu Hasubu; 24 nu Halohesi, nu Pileha, nu Sobeki; 25 nu Rehumu, nu Hasabuna, nu Maseya; 26 nu Ahiya, nu Hanani, nu Anani; 27 nu Maluku, nu Harimu, nu Bana. 28 Bango bantu, u basankoga, nu baLawi, nu balangi ba nibi, nu beimbi, nu bakiti ba numba nnene za Kalaga, nu bansania beidekanukizie na bageni ba kisi ku kabamba ka mulembe wa Kalaga, gamozi na bakikulu babo, nu bana babo beseli na menge nu bumenyinino, 29 babo bansania beingide mu lwango lwa mibuto nu na bakulu babo. Bakitile idagano gamozi na kilumbilo buno beitabizie biswililo bya Kalaga ndi beida kwanza mulembe wa Kalaga, waakasile Musa, mukiti wa Kalaga, nu kukokomezia kukita makakizio ma Yehowa, Mukota weitu.
30 Balagile bunee: “Tukulaga buno tatwasongie bakinga beitu ku basikila aba kusongia basikila beitu na bakinga babo. 31 Ndi bantu ba kisi kikino bavwa kukunzia bintu aba idia ku Busi bwa Kumunwa, u Sabato, tatubikunze Busi bwa Kumunwa aba busi bwasililila. Tatwalime masoa ku mwaka wa mutubakamo nu twasigilile nsombi insania. 32 Twikokomezie kukasa kyindi kimozi kya bisatu kya shekeli ku mulimo wa numba za Kalaga weitu, na mwaka na mwaka. 33 Bikulo bibyo bili ku mulimo wa numba za Kalaga weitu, ku tumpampa twabikwa ga meza, nu ku tuyulo twa bugali bwa ngano nu twa kugisibwa bindi bya kumunwa, nu twa mbalo za myezi, nu ku bisagulo bya mwaka, nu ku bintu byasililila nu bisansa bya bwagi bwa kukulula baIsraeli, nu ku ungo mulimo unsania. 34 Iswe basankoga nu baLawi nu bantu, twalongekile nazi wavwe na nkaso za nkuzi buno bakase ku numba za Kalaga weitu; kikanga na kikanga, ku nkuzi zabo ku nkungu zasombwedwe, ku mwaka na mwaka, kuzigisia gantata ga kasenga ka kayulo ka Yehowa, Kalaga weitu, anga bwasanzilwe mu mulembe.
35 Lingo twikokomezie kukasa matubulo matangi ma masoa meitu, nu ma biguma bya miti insania mwaka na mwaka ku numba za Yehowa. 36 Lingo kukasa nkula za basikila beitu, nu za ngombe zeitu, za mikoko zeitu nu kuzilusia ku numba za Kalaga weitu, ku basankoga bakukita mulimo wa numba za Kalaga anga bwasanzilwe mu mulembe. 37 Twalusie bugali butangi bwa ngano, nu biguma bya miti za nkita insania, maku m'ituba nu makiti ku basankoga, ku masio ma numba za Kalaga weitu. Twalusie kyindi ky'ikumi kya masoa meitu ku baLawi bakukata kyindi ky'ikumi mu miino insania mu tukukita mulimo weitu. 38 Nu sankoga, wa kibuti kya Haruni, abe gamozi na baLawi gabakate kyindi ky'ikumi; nu baLawi balusie kyindi ky'ikumi kyabo kya byindi by'ikumi ku numba za Kalaga weitu, ku masio ma numba z'isuku. 39 Kubuno baIsraeli nu baLawi balusie nkaso za mbuto, nu za mazi ma biguma nu za makiti; gago geli bintu bya kiziki kyasililila, mu kiziki kikwikalaga basankoga, nu balangi ba nibi nu beimbi. Tatwasige numba za Kalaga weitu.”