Kwigonga kwa baIsraeli
9
1 Ku kindi kya makumi mabili nu binazi kya mwezi wozo, baIsraeli bakundamenne geteli kulia, nu bavwalile makunino nu babikile mukungu gantata ga matoe mabo. 2 BaIsraeli beidekanukizie na bageni bansania. Bemenne nu beigongile mibi zabo nu bwagi bwa beisibo. 3 Gemenne muntu na muntu mu kiziki kyage, basomine mu mukanda wa mulembe wa Yehowa, Kalaga wabo nkungu isatu; nu engo nkungu isatu beigongile bwagi nu kukumbamina Yehowa, Kalaga wabo. 4 Ku kiziki kya baLawi, Yesua, nu Bani, nu Kadimieli, nu Sebania, nu Buni, nu Serebia, Bani nu Kenani, bemenne nu kulila n'iyuki inene lwabusio lwa Yehowa, Kalaga wabo. 5 Nu baLawi, u Yesua, nu Kadimieli, Bani, nu Hasabuneya, nu Serebia, nu Hodia, nu Sebania, nu Petahia batendile bunee: “Zanzukazi nu kusima Yehowa, Kalaga weinyu uli wa milyalya na milyalya. Izina lyage liganunwe nu liganunwe kutinga lutanuno nu lusimo lunsania. 6 Uwe tugu uli Yehowa. Wakitile igulu lya meigulu nu mayombo mazo nu kisi nu binsania bili mukyo, kitatenge nu binsania bili mukyo. Ukulamia bibyo binsania. Nu mayombo ma kwigulu makumukumbamina. 7 Uwe Kalaga Yehowa wasombwede Abramu kumutikya mu Uri wa Kaldea, nu kumwinika Abrahamu. 8 Wamonine buno eli mukatizia lwabusio lwobe, nu wakitile idagano nage buno wamukase kisi kya baKanana nu baHiti, nu baAmori, nu baPerizi, nu baYebusi, nu muGirgasi, nu kukasa ku kibuti kyage. Nu wakitile idagano linsania, kubuno uli wisanana. 9 Wamonine ku mbabazio za batateiswe mu Misri, nu gongule ku idilo lyabo mu ntungo za Kitatenge Kyakisimana; 10 wakitile tulolesio nu miganogano ku Farao nu ku bantu bage nu bansania ba kisi kyage, kubuno babengile batateiswe. Izina lyobe lyabede inene anga bu lili lelo. 11 Wabeganizie mazi ma kitatenge buno basoke kwakama. Tondo wakokezie babo babayangaga mu kitatenge anga ikozi lyakoloka gazindu. 12 Lingo wabasondelezizie mu musi na kimpa nu mu kindi na keiya, buno ubakase kyengi mu nzila zibakwenda muzo. 13 Watukile kwigulu kugela gantata ga mwiduko Sinai nu kutendana nabo nu wabakasile bulongeki bwisanana nu milembe misoga nu makakizio ma bulili. 14 Nu wabamenyesizie busi bwobe bwasililila bwa kumunwa nu makakizio nu milembe ku kuboko kwa mukiti wobe Musa. 15 Gababede na nzala, wabakasile kampampa ka kwigulu, nu gabakule na mpusia wabanusizie mazi matukile mu lwanda. Wabakakizizie kwingila nu kwiyana kisi kiwabalumbilide kubakasa. 16 Tondo batateiswe babede na lwikotio nu matoe mabibu nu bagunine makakizio mobe. 17 Basombile kwanza, nu beibilide miganogano ziwakitile munkatini mwabo. Babede na matoe mabibu, nu mu kuguna kwabo basombwede muntu kubasondelezia kusubya ku bukobe mu Misri. Tondo uli Kalaga wa kusigilila bwagi, wa mponga nu kyombo, wa nkiki nu kutagaluka. Ntwabasigile. 18 Bakitile nkisi za olo kisusania kya kyana kya ngombe nu batendile bunee: ‘Kakano keli kalaga kobe kakutikizye ku Misri,’ nu baswilide Kalaga bubibu. 19 Tondo ku kabamba ka kyombo kyobe, ntwabasigile mu kalula. Kimpa kyabasondelezizie mu musi nu keiya kubasondelezia mu kindi buno bamone kubakwenda. 20 Wabakasile Muuza wobe musoga kubeigisia nu mana ma kulia nu mazi ma kunua. 21 Wabalangile mu kalula myaka makumi manazi nu tabeidile kampa. Nsulu zabo tazakungukile nu masindi mabo tamatumbile. 22 Wabakasile makota nu bantu bawababikide ku myaga zabo; beiyanine kisi kya Sihoni, mukota wa ku Hesiboni, nu kya Ogi, mukota wa Basani. 23 Kibuti kyabo kyitide anga buli nkeninkeni za kwigulu nu wabalusizie ku kisi kiwakasile beisibo kukiyana. 24 Bana babo beingide mu kisi kukiyana, wakindile bantu bansania ba kisi kikyo lwabusio lwabo. Wabakasile baKanana nu bakota nu bantu ba kisi kyabo kubangata. 25 Bangatile miino za mikolo minene nu kisi kyanaga. Beiyanine numba ziyala na binsania bisoga nu tunuabalongo tumbilwe mu makozi, nu masoa ma biguma nu biguma bya makiti nu ingo miti za biguma byingi. Balide nu bembukile nu balundile. Babogilebogile na busoga bwobe bunene. 26 Tondo basombile kukwanza. Beisile makakizio mobe kumbusa kwabo nu beitile balengania bobe babatondaga buno bagaluke kuguli; baswilide Kalaga bubibu. 27 Ububo wabalusizie ku maboko ma beiti babo kubababazia. Mu nkungu za mbabazio nu kulila, wungule kwigulu, nu ku bwingi bwa kyombo kyobe, wabasingide bonia babatikizye ku maboko ma beiti. 28 Tondo kumbusa kwa kumunwa nkungu nkeke, basubizie lingo ku bubi nu wabalekede ku maboko ma beiti babangate, tondo gabagalukile lingo kuguli nu kulila, wabongule nu wabonezie mambizi mengi na bwingi bwa kyombo kyobe. 29 Wabatondile buno basubye kunsi kwa mulembe, tondo bakubengile nu kutongwilila makakizio mobe u mamo manalama mu muntu ndi amakita. Na kabenga bakukasile migongo, nu babede n'itoe libibu nu tabazigile kungwa. 30 Myaka mingi wabezaga na nkiki nu wabatondile na Muuza wobe ku tunua twa balengania bobe tondo tabongule. Ububo wabagabwide ku bingo bilongo. 31 Ku bwingi bwa mponga zobe, ntwabazikizye aba kubasiga kubuno uli Kalaga wa mponga nu kyombo. 32 Kano kaluma Kalaga weitu uli munene nu Mwiya magala, nu Kalaga ukukubwa boba nu kukokomezia idagano lyobe. Ntukengele tuto tubebe twatubaside tuli tukeke u twavule kutuli nu ku bakota beitu nu bangati nu basankoga nu balengania nu batateiswe nu bantu bobe bansania, kutukila nkungu za bakota ba Asuria aaba nu lelo. 33 Mu binsania byatubaside wabezaga wisanana kubuno walangile idagano lyobe tondo iswe twakwagide. 34 Bakota beitu, nu bangati, nu basankoga, nu batateiswe tabayangile mulembe wobe, aba kungwilila makakizio mobe nu kutonda kuwabatondile. 35 Kubuno tabakukitide mu bukota bwabo, nu mu busoga bwobe bunene buwabakasile, nu mu kisi kinene kya munago kiwabakasile. Nu tabagalukile mu misako zabo mbi. 36 Lelo tuli bakobe! mu kisi kiwakasile ku batateiswe, buno balie biguma byakyo nu kubogaboga na bitondo bisoga byakyo. 37 Ku kabamba ka bwagi bweitu, bugumi bwa kisi bwendaga ku bakota bawabikile kutwangata. Beli na bwangato ku mibili nu bituganwa byeitu anga bubakutunda, nu iswe tuli mu kabebe kanene. 38 Ububo twakite kilumbilo, nu kusanza nu bakulu beitu, nu baLawi nu basankoga babike tukengelezio twabo.”