Ezra asomena bantu mulembe
8
1 Nu bantu bansania bakundamenne ga mulungu wa Mwingilo wa Mazi, nu batendile Ezra musanzi kuvwa na mukanda wa mulembe wa Musa wakakizizie Mukota ku baIsraeli. 2 Ku kindi kitangi kya mwezi wa mutubakamo, Ezra sankoga, atolile mukanda wa mulembe lwabusio lwa musanganano wa bamulume nu bakikulu nu bansania babezaga na bumenyinino bwa kungwa nu kusongolola. 3 Nu emenne ga mulungu wabezaga lwabusio lwa mwingilo, nu asomine kutukila nindunindu aba ku makuluka, lwabusio lwa bamulume nu bakikulu nu babo basongolede. Bantu bansania bongwilide busoga ku mukanda wa mulembe. 4 Ezra musanzi emenne gantata ga kisenga kya mbavu. Ku seidume lyage kwemenne Matitia nu Sema, nu Anaya, nu Uria, nu Hilkia, nu Maseya; nu ku seikazi lyage Pedaya nu Misaeli, nu Malkiya, nu Hasumu, nu Hasubadana, nu Zekaria nu Mesulamu. 5 Bantu bansania bamonine ku Ezra gantata ga kisenga nu akandwide mukanda. Nkungu zagukandwide, bantu bazanzukile. 6 Ezra aganwine Yehowa, Kalaga munene. Bantu bansania bakwide bunee: “Amena! Amena!” Bazanzwide maboko mabo nu bakumbile matoe gansi nu kukumbamina Yehowa bukukama. 7 BaLawi bakasia ba Ezra, Yesua, Bani, Serebia,Yamini, Akubu, Sabetayi, Hodia, Maseya, Kelita, Azaria, Yozabadi, Hanani nu Pelaya beisulide bantu mulembe, nu bantu bemanine mu biziki byabo. 8 Nu basomine mukanda wa mulembe wa Kalaga bwasibwasi, bawiswide nu bantu basongolede bunsania babasomenwe. 9 Nu Nehemia, mwangati, nu Ezra, sankoga nu musanzi, nu baLawi beigisizie bantu bansania, babatendile bunee: “Busi bubuno buli bwasililila ku Yehowa, Kalaga weinyu, tamube na kabebe nu tamulile.” Kubuno bansania balilile gabongule ku bitondo bya mulembe. 10 Nu ababwide bunee: “Endazi mulie nyama zanona nu kunua mazi meli nse, nu kusinga nkindi ku babo batalongekile kena, kubuno busi bubuno buli bwasililila ku Yehowa weitu, aba tamube na kabebe, kubuno mbogimbogi za Yehowa zili magala meinyu.” 11 BaLawi babibizie bantu bansania nu kutenda bunee: “Ikalazi kibibi kubuno busi bubuno buli bwasililila nu tamube na kabebe.” 12 Bantu bansania bendile kulia nu kunua nu kwekela bango nkindi. Nu babogilebogile bubibu, kubuno basongolede moki ma Kalaga mabasambalidwe.
13 Ku busi bw'ibili, bakulu ba bikanga bya bantu bansania, nu baLawi bakundamenne ku Ezra musanzi buno beige bitondo bya mulembe. 14 Bamonine buno bwakakizizie Yehowa ku Musa buno baIsraeli bansania batunganana kwikala ga nusu mu bindi bya kisagulo bya mwezi wa mutubakamo. 15 Ububo basingile migenzi kusambalila bantu ku miino zabo nu mu Yerusalema bunee: “Endazi ku mwiduko, mutole ntabi za miti za mizeituni, nu nanga za bibila, nu ntabi z'ingo miti minene, buno mwobake nusu anga bwasanzilwe.” 16 Ububo bantu bendile kuzitola, nu bobakile nusu gantata ga numba zabo, nu bango ku milungu zabo, nu ku mulungu wa numba za Kalaga, nu ga mulungu wa Mwingilo wa Mazi nu ga mulungu wa Mwingilo wa Efuraimu. 17 Nu bantu bansania batukile ku bukobe bobakile nusu nu beikede gazo. Bantu ba Israeli tabakitile bubo kutukila bindi bya Yosua mwana wa Nuni aaba ku busi bubo, nu kwabede mbogimbogi nnene. 18 Nu busi na busi, kutukila busi butangi aaba nu ku busi buzinda, Ezra asomine mukanda wa milembe za Kalaga. Bakitile kisagulo bindi mutubakamo. Ku kindi kya kinana, kwabezaga musanganano wasililila anga bwasanzilwe ku mulembe.