Ezra asegede baIsraeli ku bwagi bwabo
9
1 Kumbusa kwa bibyo basondelezia ba bikanga bya baIsraeli bankundile nu batendile bunee: “Bantu ba Israeli nu basankoga nu baLawi tabeidekanukizie na bantu ba kisi kikino nu nkisi zabo nu misako zazo, anga za baKanana, nu baHiti, nu baPerizi, nu baYebusi, nu baAmoni, nu baMoabu, nu baMisri, nu baAmori. 2 BaIsraeli nu bana babo basongile bakinga ba kisi kikino; ububo kilongo kyabo kyasililila kyasambikenne na bantu ba kisi kikino. Bakota nu bangati babezaga batangi mu kikyo kitondo.” 3 Ganungule ku bubo, natile nsulu zane insania, nu nakutwide nzwili zane nu luzelu lwane, nikede gansi nu nangamine nunse. 4 Bansania bagiliminne ku moki ma Kalaga wa baIsraeli bankundile ku kabamba ka bwagi bwa babo ba kikando; tondo nne nikede gansi gago nu kwangama aaba nu nkungu za kisansa kya mwigolo. 5 Ku nkungu za kisansa kya mwigolo, nazanzukile na nsulu zatika, nu nakomine mazu mane gansi nu kulambya maboko mane ku Yehowa, Kalaga wane. 6 Natendile bunee: “Kalaga wane, nkukua nsoni nu kuzangazanga kulola kuguli; kubuno mibi zeitu zitila nu kututinga, bwagi bweitu bwitila nu kwika kwigulu. 7 Kutukila batateiswe ba wakalazi tuli na katati ka mibi mingi. Ku kabamba ka zezo mibi zeitu, bakota nu basankoga beitu bakasilwe ku maboko ma bakota ba bingo bilongo, beitilwe na mwene wa nganda nu bakandilwe nu bintu byeitu byanyagilwe nu twakua na nsoni anga butuli lelo. 8 Tondo kano kaluma kitangalabesi Yehowa, Kalaga weitu, ku mponga zage, asigile bamozi kulama, nu azigile kutukasa itinino mu kiziki kyage kyasililila. Ububo Kalaga weitu atubogeziebogezie nu atumuzia kakeke munkatini mwa bukobe bweitu. 9 Kubuno tuli bakobe, tondo Kalaga weitu ntatusigilide mu bukobe bweitu, tondo abikile kyombo mu mitima za bakota ba Persia buno batukase bwangato kobaka numba nnene za kukumbamina Kalaga weitu, nu twikale bulonge bukata mu Yuda nu mu Yerusalema. 10 Tondo kano kaluma tutende buni, ee Kalaga weitu, kubuno kumbusa kwa kyombo kyobe twananine makakizio mobe. 11 Kubuno na bakiti bobe nu balengania wakakizizie na moki mamano, bunee: ‘Kisi kimukwenda kwiyana kili kisi kya nsese ku kabamba ka nsese za bantu beli mukyo nu nkisi zili kunsania mukyo. 12 Ububo, tamusongye bakinga beinyu na basikila babo, aba basikila beinyu tabasonge bakinga babo. Tamubalondele kuba na bubobelelo aba kuguma; buno mube na magala nu kulia binsania bisoga bya kisi kikino nu kukisiga ku bana beinyu nu kukiyana ku milyalya.’ 13 Ee Kalaga weitu, ntwatusungizie anga geigezye bwagi bweitu, nu wasigile bamozi kutuli kutazika. Tondo kano kaluma kumbusa kwa kusungibwa ku kabamba ka mibi zeitu, 14 ndi twanana lingo makakizio mobe nu kusongana na bantu babo bakukumbamina nkisi? Ndi ntongoe bubibu nu kutuzikya buno ta umozi kona? 15 Ee Yehowa, Kalaga wa baIsraeli, uli wisanana nu tuli gano kibombo kikeke kyonine. Tuli gano lwabusio lwobe na bwagi bweitu, ta umozi unavwama kwemana lwabusio lwobe.”