EZRA 7

Ezra abasa na banyage ku Yerusalema

1 Kumbusa kwa bitondo bibino mu kwangata kwa Artasasta mukota wa Persia, kwavule Ezra mwana wa Seraya, mwana wa Azaria, mwana wa Hilkia, 2 mwana wa Salumu, mwana wa Zadoki, mwana wa Ahitubu, 3 mwana wa Amaria, mwana wa Azaria, mwana wa Merayoti, 4 mwana wa Zerahia, mwana wa Uzi, mwana wa Buki, 5 mwana wa Abisua, mwana wa Finehasi, mwana wa Eleazari, mwana wa sankoga munene Haruni. 6 Wozo Ezra atukile ku Babeli, abezaga musanzi wizi milembe za Musa, zakasile Yehowa, Kalaga wa baIsraeli; mukota wa Babeli amukasile binsania byasegile, kubuno Yehowa, Kalaga wage abezaga gamozi nage.

7 Mu mwaka wa mutubakamo wa kwangata kwa Artasasta, bango baIsraeli, u basankoga nu baLawi, nu beimbi ba nimbo ba mu numba nnene za kukumbamina, nu balangi ba nibi, nu baNetini, bendile na Ezra ku Yerusalema. 8 Babasile ku Yerusalema ku mwezi w'itano, mu mwaka wa mutubakamo wa mukota. 9 Ezra atukile ku Babeli busi butangi bwa mwezi mutangi, nu abasile ku Yerusalema busi butangi bwa mwezi w'itano, kubuno Kalaga wage abezaga gamozi nage. 10 Ezra eikokomezizie kwiyigisia nu kukita mulembe wa Yehowa, nu kwigisia milembe nu makakizio ku baIsraeli. 11 Wono guli mukanda wa mukota Artasasta waakasile ku Ezra sankoga, nu musanzi, wizi makakizio mansania nu milembe zakasile Yehowa ku baIsraeli:

12 Artasasta, mukota wa bakota, ku Ezra sankoga, nu musanzi wizi milembe za Kalaga wa kwigulu, bubobelelo bunene nunse. 13 Nkukakizia lelo buno bantu baIsraeli, aba basankoga, aba baLawi beli mu bukota bwane basigwe buno bende ku Yerusalema gamozi nobe ndi batunda. 14 Wasingwa na mukota nu bakazi bage ba nango mutubakamo kubuzia mu Yuda nu mu Yerusalema buni buli bitondo bya milembe za Kalaga wobe, zili ku maboko mobe. 15 Lingo, weeke olo nu feza zakasenne mukota nu bakazi ba nango na mbogimbogi ku Kalaga wa Israeli ukwikalaga mu Yerusalema. 16 Nu gamozi nazo, weeke feza nu olo ziwasange mu Babeli nu nkaso za bantu nu za basankoga, zibakutunda kukasa ku numba za Kalaga wabo mu Yerusalema: 17 Kubuno watunganana kukunza na bikulo bibyo balume ba ngombe nu bilimba bya mikoko nu byana bya mikoko nu tuyulo twabo twa bunga bwa ngano nu twa kunua, kutubika ga kasenga mu numba za Kalaga weinyu mu Yerusalema. 18 Ndi kwasigala nkindi za feza nu olo, nti uwe nu banyobe munakita nazo anga bumukukengela buli lutundo lwa Kalaga weinyu. 19 Nu bibyo biwakasilwe ku mulimo wa numba nnene za kukumbamina Kalaga wobe, kasana byo ku Kalaga mu Yerusalema. 20 Ndi kwabe kingo kimozi kimukwiyanina ku numba za Kalaga, nti munavwama kutikya ku bikulo bya mukota. 21 Nne Artasasta nkukakizia balangi bansania ba bikulo beli ku lisilya lya Luuzi buno binsania bikumusega Ezra sankoga, nu musanzi wa milembe za Kalaga uli kwigulu, sasia kukasa Ezra kikyo kyakwiyanina: 22 aaba nu ku feza talanta lukama, nu nzi lukama za ngano, nu malega lukama ma mazi ma biguma, nu mbusu lukama za makiti, nu munkange anga bubakutunda. 23 Kinsania kyakakizibwa na Kalaga wa kwigulu, kikitwe ku numba za Kalaga wa kwigulu buno ntabe na bongoa ku mukota nu ku bana bage. 24 Lingo nkutenda buno basankoga nu baLawi nu beimbi nu balangi ba numba nu bakiti ba numba za Kalaga aba bango bakiti ba Kalaga tabatunganana kuliga kodi aba mitulo aba kingo. 25 Nu uwe Ezra, ku menge maguli namo, bika ngatu buno batule bantu beli ku lisilya lya Luuzi. Bika babo beizi milembe za Kalaga wobe, nu nti wigisia babo bateizi zo. 26 Muntu utakwanza milembe za Kalaga wobe, aba za mukota, asungibwe bubibu, eitwe, aba kupumbibwa, aba kunyagwa bikulo byage, aba kukandwa.

27 Ezra atendile bunee: “Ganunazi Yehowa, Kalaga wa batateiswe, wabikile mu mutima wa mukota bitondo bibino buno alebye numba za Yehowa zili mu Yerusalema.” 28 Ububo nabede na magala, kubuno mponga za Yehowa, Kalaga wane, zabezaga gamozi na nne. Nakundamanizie banene ba kikanga na kikanga kya baIsraeli buno bende gamozi na nne.