Numba za Kalaga zasila
6
1 Ububo Dario akakizizie kulonda mu numba za kulanga mikanda za bukota mu Babeli. 2 Nu kigondi kya mukanda wamonekile ko mu numba za Akimeta wa Media; kitondo kikino kyasanzilwe mugo: 3 Mu mwaka mutangi wa mukota Kiro, akakizizie buno numba nnene za Kalaga mu Yerusalema zobakwe lingo mu kiziki kibakasanaga bisansa bya kugisibwa nu tulingilo tube tubibu; kusakama mabusu makumi mutuba, nu bungulu mabusu makumi mutuba. 4 Mpilili isatu za makozi manene nu mpilili za mbavu nnene nunse. Nu mulimo wozo waligwe na byatuke mu numba za mukota wenyene. 5 Mpepe za olo nu za feza za numba za Kalaga zatikizye Nebukadneza mu Yerusalema nu kuzibika ku Babeli zisubibwe lingo, nu zibikwe lingo mu numba za Kalaga mu Yerusalema mu biziki byazo. 6 Ububo, Tatenayi, mwangati wa kiziki kusoka Furati, nu Setari-Bozenayi, nu baneinyu, tukazi gago. 7 Sigazi mulimo wa numba zeno za Kalaga; sigazi bemanizi nu bakulu babo kobaka lingo numba zezo za Kalaga mu kiziki kyazo kitangi. 8 Lingo nakakizia buno mwakasie bakulu ba baYuda mu mulimo wa kobaka numba zeno za Kalaga, nu nkalilo za bobaki zaligwe na bikulo bya mukota, aba na kodi za kisi kya Furati, buno mulimo tagukandwe. 9 Bakasazi busi na busi binsania bibakwiyanina kukita ku bisansa bya kugisibwa ku Kalaga wa kwigulu. Kasazi basankoga ngombe, nu mikoko, nu byana bya mikoko, nu ngano, nu munkange, nu mazi ma biguma, nu makiti; kasazi basankoga anga bubasega. 10 Ububo bakite bisansa bya kugisibwa ku Kalaga wa kwigulu, nu kusegela kalamo ka mukota nu bana bage. 11 Nkukakizia lingo ndi umozi anana ikakizio lilino, nti lukati lwatikibwa ku numba zage nu kukomwa, nu aswikwe kulo nu kususulwa, nu numba zage zabe iyala ku kabamba kako. 12 Nu Kalaga wasombwede gago kubika numba zage ku izina lyage akinde bakota aba bantu bageleke kugalukya ikakizio lilino, aba kwita numba za Kalaga mu Yerusalema. Nne Dario, nasila kubika ikakizio buno bitondo binsania bikitwe na komanizia.
Numba zatozibwa
13 Tatenayi mwangati wa lisilya lya Luuzi nu Setari-Bozenayi nu banyabo bakitile na komanizia binsania byasanzile mukota Dario. 14 Bakulu ba Yuda bobakile lingo ku kabamba ka bulengania bwa Hagai, nu bwa Zekaria, mwana wa Ido. Bobakile nu kutozia numba anga bwakakizizie Kalaga wa baIsraeli, nu makakizio ma Kiro, nu Dario, nu Artasasta, bakota ba Persia. 15 Batozizie numba ku kindi kya bisatu kya mwezi wa Adari, wa mwaka wa mutuba wa kwangata kwa mukota Dario. a 16 BaIsraeli, nu basankoga, nu baLawi bansania basubizie kutuka ku bukobe, bakitile kisagulo nu kukasa numba kuli Kalaga na mbogimbogi.
17 Bakasenne bisansa bya ngombe lukama, nu bilimba bya mikoko nkama ibili, nu byana bya mikoko nkama inazi anga maganzo ma bikanga bya baIsraeli. 18 Babeganizie basankoga nu baLawi mu bibombo byabo kukitila Kalaga mu Yerusalema, anga bwasanzilwe mu mukanda wa Musa. 19 Ku busi bw'ikumi nu binazi mu mwezi mutangi, b bakandwa basubizie bakitile Kisagulo ky'Isuluko. 20 Basankoga nu baLawi beiyengezie anga bwabezaga mulembe. Basesile kyana kya mukoko ky'isuluko ku kabamba ka bantu bansania basubizie kutuka ku bukobe, nu ku mibuto zabo basankoga nu kubeli bobenyene. 21 BaIsraeli basubizie kutuka ku bukobe beidekanukizie na bantu ba kisi nu nsese zabo. Balondile Yehowa, Kalaga wa baIsraeli, nu kulia kisagulo. 22 Bakitile na mbogimbogi kisagulo kya tumpampa tutagaga bindi mutubakamo. Kubuno Yehowa ababogeziebogezie nu kugalukya mutima wa mukota wa Asuria, buno abakasie mu mulimo wa numba za Kalaga, Kalaga wa baIsraeli.