Balinga kobaka lingo numba za kukumbamina
5
1 Tondo balengania Hagai, nu Zekaria mwana wa Ido, balenganizie mu izina lya Kalaga wa baIsraeli ku babo babezaga mu Yuda nu mu Yerusalema. 2 Ububo Zerubabeli, mwana wa Saltieli, nu Yesua, mwana wa Yozadaki, bazanzukile nu kobaka lingo numba nnene za kukumbamina za Kalaga zili mu Yerusalema. Nu balengania ba Kalaga babezaga gamozi nabo nu kubakasia. 3 Ku nkungu zezo Tatenayi mwangati wa kisi kikyo lisa lya Luuzi Furati nu Setari-Bozenayi nu banyabo bavule kubeli nu kubuzia bunee: “Nazi wamukasile bwangato bwa kobaka nu kutozia numba zeno?” 4 Babuzizie lingo bunee: “Meina makizi ma bantu bakobaka numba zeno?” 5 Nu liso lya Kalaga lyabezaga ku bakulu ba baYuda nu tabalekede mulimo aaba nu gendile mukanda kuli Dario, nu kusubya kw'iyakulo lyage. 6 Mukanda wasanzilwe na Tatenayi mwangati wa lisilya lya Luuzi nu Setari-Bozenayi nu banyabo, nu bagusingile ku mukota Dario. 7 Basanzile bunee:
“ Samba nunse kuli mukota Dario. 8 Menya buno twendile ku kisi kya Yuda nu ku numba za Kalaga munene. Bantu bakuzobaka na makozi manene nu mbavu nnene zabikilwe ku bitutu. Mulimo wozo ukukitwa na komanizia nu busoga mu maboko mabo. 9 Twabuzizie babo bakulu bunee: ‘Nazi wamukasile bwangato bwa kobaka lingo numba zeno nu bitutu byazo?’ 10 Twababuzizie meina mabo buno tukusingile meina ma basondelezia ba mulimo wozo. 11 Batwakwide bunee: ‘Tuli bakiti ba Kalaga wa kwigulu nu kisi, nu twobaka lingo numba zobakilwe myaka mingi wakalazi na mukota wa baIsraeli. 12 Tondo batateiswe bongizie Kalaga wa kwigulu, nu abagabwide ku Nebukadneza muKaldea, mukota wa Babeli. Azikizye numba nnene za kukumbamina nu akandile bantu nu kubeka ku Babeli. 13 Tondo mu mwaka mutangi wa Kiro mukota wa Babeli akakizizie buno numba zeno za Kalaga zatunganana kobakwa lingo. 14 Nu mpepe za olo nu za feza za numba nnene za Kalaga zatikizye Nebukadneza mu Yerusalema nu azyekile ku numba za tulaga twabo, Kiro azikasile ku wamulume umozi wamanagwa Sesebasari mwemanizi mu kisi kikyo. 15 Amubwide bunee: “Tola mpepe zezo nu kwenda kusubya zo ku numba nnene za kukumbamina mu Yerusalema, nu numba nnene za Kalaga zobakwe mu kiziki kyazo.” 16 Ububo Sesebasari wenyene avule nu abikile kibanza kya numba za Kalaga mu Yerusalema. Kutukila zezo nkungu zikizobakwa aaba nu lelo, tondo tazisila.’ 17 Ububo kano kaluma, ndi mukota watunda, nti walonda mikanda za bukota mu Babeli, buno umenye ndi mukota Kiro akakizizie buno numba zeno nnene za kukumbamina za Kalaga mu Yerusalema zobakwe lingo; kumbusa nti mukota atubula buni bwakutunda mu kitondo kikino.”