BaSamaria basombile numba za Kalaga zobakwe
4
1 Basombi ba baYuda nu baBenjamina bongule buno bakandulwa basubizie nu kobaka numba za kukumbamina Yehowa, Kalaga wa baIsraeli. 2 Babasile ku Zerubabeli nu bemanizi, nu batendile bunee: “Tobakazi gamozi na beinyuwe, kubuno tukulonda Kalaga weinyu anga beinyuwe. Twamukitide bisansa kutukila bindi bya Esari-Hadoni, mukota wa Asuria watubasizie kuno.” 3 Tondo Zerubabeli nu Yesua, nu bemanizi ba bikanga bya baIsraeli batendile bunee: “kobaka numba za Kalaga weitu takili kitondo kyeinyu; iswe tubenyene tobakile Yehowa, Kalaga wa baIsraeli, anga bwatukakizizie Kiro, mukota wa Persia.”
4 Nu bantu ba kisi kikyo batambizie magala ma baYuda buno tabobake lingo. 5 Baligile ngatu ku lumbisombiso, buno bakande mulimo wozo bindi binsania bya bukota bwa Kiro, mukota wa Persia, aaba nu ku bwangato bwa Dario, mukota wa Persia. 6 Kulinga kwa bukota bwa Ahasuero, bantu ba kisi basanzile mukanda wa kusongela baYuda nu babo ba ku Yerusalema. 7 Mu bukota bwa Artasasta, mukota wa Persia, Bisilamu, nu Mitiredati, nu Tabeli nu bango banyabo basanzide mukota mukanda mu masanzo ma mutendezi wa kiAramea nu kwisula mu kiAramea. 8 Rehumu, mwangati wa bakoloboyo, nu Simusayi musanzi, basanzile mukanda ku mukota munene Artasasta kusongela Yerusalema.
9 Rehumu, mwangati wa bakoloboyo, nu Simusayi, musanzi, nu bango banyabo, u ngatu nu bakota ba baDini nu baAfarsatiki, nu baTarpeli, nu baAfarsi, nu baArkewi, nu baBabeli, nu baSusani, nu baDeha, nu BaElamu, 10 nu bango basigede ku baBilongo basokezie Asurbanipali, mukota nu mwiya lwanzo, nu kubeikazia mu mwino wa Samaria, nu basigede mu kisi ku mutili wono wa Luuzi Furati, nu bango kuno nu kuko.
11 Basanzile mukanda anga bunee:
“Mukanda kuli Artasasta wasanzilwe na bakiti bobe nu bantu ba ku lisilya lya Luuzi. 12 Bubuno bumenywe ku mukota buno baYuda batukile kuguli kuvwa kuno; bendile ku Yerusalema nu bese bobaka mwino wozo wa buguni nu bubi. Bese batozia bitutu nu kukulumizia kibanza. 13 Mukota atunganana kulolesibwa buno ndi bobaka lingo mwino wono nu kukulumizia bitutu, nti basombe kuliga kodi aba mutulo wabo aba kapelekese, nu bukota bwide mutali wabo. 14 Kubuno iswe tukumonaga mutali ukutuka ku numba za mukota, kasi tabwakulungana iswe kubisa kabenga ku mukota. Ububo tukumusingila musagu wono kumenyesia mukota. 15 Ndi walonda mu mikanda za baso ba wakalazi, nti wamone buno mwino wono guli mwino wa buguni nu kubigia mukota nu kisi kyobe; mwino wozo wazikizibwe kubuno bayukizie buguni bubakitaga wakalazi. 16 Tukulolesia mukota buno ndi mwino wono wobakwa lingo nu bitutu byakulumanizibwa lingo, nti aziminwa na kyindi kya bukota bwage ku lulenge luluno lwa Furati.”
17 Nu mukota asingile ko iyakulo bunee:
“Samba ku Rehumu, mwangati, nu ku Simusayi, musanzi, nu ku baneinyu beli ku Samaria, mu kisi kili ku lisilya lya Furati. Bubobelelo kumuli mu binsania. 18 Mukanda gumwansingide wasominwe bwasibwasi kundi. 19 Nakakizizie nu balondile, nu twamona buno mwino wozo wabezaga na kabenga nu buguni ku bakota kutukila wakalazi, 20 nu bakota banene bangataga Yerusalema; bangatile kisi kikyo kinsania kya lisilya lya Furati. Baligilwe mutulo, bikulo bya bwangato bwa kutinga mu nzila, nu kyindi kya mutali wa bantu. 21 Ububo mukite ikakizio buno bantu balekele mulimo. Mwino wozo tawobakwe lingo aaba nu nasinga iyuki lyane. 22 Kokomeziazi kukita kitondo kikyo. Kubuni kabebe kakano kitile kubabazia bakota?”