Kobaka lingo kasenga ka kayulo
3
1 Ku mwezi wa mutubakamo, gasilile baIsraeli kobaka miino zabo, bantu bansania bakundamenne ku Yerusalema. 2 Yesua mwana wa Yozadaki, nu basankoga banyage, nu Zerubabeli mwana wa Saltieli nu mibuto zage bobakile kasenga ka kayulo ka Kalaga wa baIsraeli buno bakasane bisansa bya kugisibwa gako anga bwasanzilwe mu mulembe wa Musa muntu wa Kalaga. 3 Bakule bantu ba kikyo kisi boba, tondo bobakile tanga kasenga nu kiziki kyako, nu bakasenne bisansa bya kugisibwa gantata gako ku Yehowa mu nindunindu nu mwigolo. 4 Nu bakitile Kisagulo kya Nusu anga bwasanzilwe, nu bakasenne busi na busi bisansa bya kugisibwa anga bwakakizizibwe. 5 Gantata ga bibyo, bakasenne bisansa bya kugisibwa bya bindi bya kumunwa, nu bya mbalo za mwezi, nu bya bingo bindi binene anga bwakakizizie Yehowa, nu nkaso za lutundo ku Yehowa. 6 Balingile kukasana bisansa bibino ku Yehowa ku mwezi wa mutubakamo nti kibanza kya numba za Yehowa takibikwa. 7 Bakasile bikulo kuliga bobaki ba makozi nu bati ba mbavu. Bakasile idia nu maku ma kunua nu makiti ku baSidoni nu baTiro kutola mbavu kutuka Lebanoni, nu kuvwa ku Yopa mu Kitatenge, anga bwakakizizie Kiro mukota wa Persia. Kubika kibanza kya numba za Yehowa
8 Mu mwezi w'ibili wa mwaka w'ibili wa kusubya kwabo ku numba za Kalaga mu Yerusalema, Zerubabeli mwana wa Saltieli, nu Yesua mwana wa Yozadaki nu babo basigede ku mibuto zabo, u basankoga nu baLawi, nu bakandwa bansania basubizie ku Yerusalema balingile mulimo; nu basombwede baLawi ba myaka makumi mabili nu kutinga kusondelezia mulimo wa numba za Yehowa. 9 Ububo Yesua gamozi na bana bage nu mibuto zage, u Kadimieli nu bana bage nu bana ba Hodavia nu bana ba Henadadi nu bana babo gamozi na mibuto zabo baLawi bemanine kulongeka mulimo wa numba za Kalaga. 10 Gasilile bobaki kibanza kya numba za kukumbamina Yehowa, basankoga bavwalile nsulu zabo nu kwemana ga kiziki kyabo na myonze zabo; baLawi u bana ba Asafu baganwine Yehowa na bintu byabo bya kuzumia anga bwakakizizie Davidi mukota wa baIsraeli. 11 Basimine nu kuganuna Yehowa; bamwimbide bunee: “Buli busoga kusima Yehowa, kubuno kyelamo kyage takinakusila.” Bantu baganwine Yehowa n'iyuki inene kubuno kibanza kya numba za kukumbamina Yehowa kyasila. 12 Tondo basankoga nu baLawi nu bemanizi ba bikanga babezaga bakulu banene, nu bamonine numba ntangi, balilile n'iyuki a gabamonine kwimikwa kwa kalingilo ka numba zeno, tondo bango balalukile n'iyuki inene za mbogimbogi. 13 Nu bantu balalukile n'iyuki inene, bubo lyendile bulazi, nu talyamenyininwe ndi lya kubogaboga aba lya kulila.