Davidi alongeka Solomono kukata bukota.
28
1 Davidi akundamanizie bangati bansania ba baIsraeli ku Yerusalema nu basondelezia ba bikanga, nu ba bibombo bakitilaga mukota, nu basondelezia ba tununu nu ba nkama, nu balangi ba bikulo nu bituganwa bya mukota nu bya bana bage, bansania gamozi na bangati ba numba zage nu mapuka nu beiya bwangato. 2 Kumbusa, mukota Davidi azanzukile nu atendile bunee: “Nnungwililazi, mibuto zane nu bantu bane. Nakengede mu mutima wane kobaka numba za kubika mu Sanduku z'Idagano lya Yehowa nu anga kiziki kyakubikila ku magulu ma Kalaga weitu, nu nalongekile kuzobaka. 3 Tondo Kalaga ambwide bunee: ‘Ntunobaka numba ku izina lyane, kubuno uli mwiya bita nu witile bantu beingi.’ 4 Tondo Yehowa wa baIsraeli ansombwede munkatini mwa kikanga kya tatane kinsania buno nibe mukota wa baIsraeli ku milyalya. Kubuno asombwede kikanga kya Yuda kuba kisondelezia; nu mu kikanga kikyo asombwede kikanga kya tatane nu munkatini mwa bana bansania ba tatane atananidwe kumbika mukota ku baIsraeli bansania. 5 Yehowa ankasile bana beingi, nu munkatini mwa babo bansania asombwede Solomono, mwana wane, buno eikale ga kisumbi kya bukota bwa Yehowa ku baIsraeli. 6 Ambwide bunee: ‘Solomono, mwana wobe, u ukobaka numba zane, nu milungu zane, kubuno namusombwede kuba mwana wane nu nne nabe isi. 7 Nkalindia bukota bwage ku milyalya ndi alanga makakizio mane nu milembe zane, anga bweli lelo.’ 8 Kano kaluma lwabusio lwa baIsraeli bansania, musanganano wa Yehowa, nu lwabusio lwa Kalaga weitu ukumungwilila, langazi makakizio mansania ma Yehowa, Kalaga weinyu, buno mwiyane kisi kikino kisoga nu kukisiga kuba bwiyani ku bana beinyu ku milyalya. 9 Nu uwe, mwana wane Solomono, menya Kalaga wa so, nu mukitile na mutima wobe unsania nu na makengelo mansania; kubuno Yehowa akulola ku mitima insania nu akumenya makengelo nu ntundo insania. Ndi wamulonda, nti wamumone; tondo ndi wamusiga nti akwise bulazi ku milyalya. 10 Widange kano kaluma kubuno Yehowa akusombwede kobaka numba zibe kiziki kyasililila; ba na magala nu kita bubo.” Davidi akukasa Solomono lukita lwa kobaka numba.
11 Kumbusa Davidi akasile mwana wage Solomono lukita lwa busio bukeke nu masio ma numba nu masio m'isuku, masio ma kuntata nu ma munda mwazo, nu busio bwa kisumbi kya kyombo. 12 Amukasile lukita lwakengede mu mutima wage, lwa masio mansania ma numba za Yehowa, nu masio mabezaga bwigi, nu masio m'isuku ma numba za Kalaga nu m'isuku ma mitebe zakaswa, 13 nu ma basankoga nu baLawi, nu milimo zabo za kukita mu numba za Yehowa, nu binsania bya kukita nabyo mu numba za Yehowa. 14 Nu akasile olo ku bintu binsania bya olo mu mulimo wa numba, nu feza ku binsania bya feza mu mulimo wa numba, 15 nu ku byanikilo bya matala bya olo ku buzitu bwa kyanikilo na kyanikilo, nu bwa matala nu buzitu bwa feza za kyanikilo kya feza nu bwa matala makyo, anga bwabezaga mulimo wa kyanikilo na kyanikilo mu mulimo wa numba. 16 Nu akasile buzitu bwa olo za meza na meza ma tumpampa, nu bwa feza ku meza mansania ma meza ma feza, 17 Nu bwa nkanya za olo nsoga nunse, nu mpepe nu bituma, nu bwa mpepe za olo nu buzitu bwazo, ku buzitu bwa lupepe na lupepe. 18 Amukasile lukita lwa kasenga ka bulago na olo nsoga nunse, nu buzitu bwako, lingo amukasile lukita lwa kayanga ka makerubi ma olo malambya byupi nu kukukila Sanduku z'Idagano lya Yehowa. 19 Davidi akitile binsania bwasibwasi na masanzo kutukila kuboko kwa Yehowa ku kitondo na kitondo; milimo insania zatunganana kukitwa anga lukita lwazo.
20 Nu Davidi abwide Solomono mwana wage bunee: “Ba na magala nu kuba na bupuka, nu kita mulimo wono, ntukue boba aba kukutwa, kubuno Kalaga Yehowa, wozo uli Kalaga wane, eli nobe. Ntakwide nu ntakusige aaba nu mulimo unsania wa numba za Yehowa wasila. 21 Nu ntukumona, bibombo binsania bya basankoga nu bya baLawi bili ku milimo insania za numba za Kalaga; unsania watunda nu uli na menge akaba gamozi nobe ku mulimo wono, bangati nu bantu bobe bansania babe nunse kunsi kwa makakizio mobe.”