II BAKOTA.
Lusambo lwa Ahazia
1
1 Kumbusa kwa lukuo lwa Ahabu, Moabu agunine kwangatwa na baIsraeli. 2 Ahazia akolokile kutuka ku idilisa lya busio bwage bwa kwigulu mu Samaria, nu abede musambi. Asingile migenzi, ababwide bunee: “Endazi mubuzie ku Baali-Zebubu, kalaga ka Ekuroni ndi none na lusambo luluno.” 3 Tondo mwanzelo wa Yehowa abwide Elia muTisibe bunee: “Zanzuka, enda kukulumana na zezo migenzi za mukota wa Samaria, ubabule bunee: ‘Ndi mukwenda kubuzia ku Baali-Zebubu kalaga ka Ekuroni kubuno takuli Kalaga mu Israeli?’ 4 Ububo Yehowa atenda bunee: ‘Ntwatuke ga wozo mugu u uli gago, tondo lebelebe ukukua.’” Nu Elia endile. 5 Zezo migenzi zasubizie ku mukota. Nu ababuzizie bunee: “Kubuni mwasubya?” 6 Bamwakwide bunee: “Muntu umozi u twakulumana nage atubula bunee: ‘Subyazi ku mukota wamusingile mumubule bunee: “Yehowa atenda bunee: ‘Ndi ukusinga bantu kubuzia ku Baali-Zebubu kalaga ka Ekuroni kubuno takuli Kalaga mu Israeli? Ku kabamba kako ntwatuke ga mugu u uli gago tondo lebelebe ukukua.’”’”
7 Ababuzizie bunee: “Muntu wozo u mwakulumenne nage nu kumubula bitondo bibino abezagile muntu wa lukita lukizi?” 8 Bamwakwide bunee: “Avwala nsulu za myoza nu mukoma wa kikoba mu kibunda kyage.” Nu we atendile bunee: “ Wozo u Elia muTisibe.”
Elia amanine keiya kutuka kwigulu
9 Mukota Ahazia asingile mwangati wa bakoloboyo nu bakoloboyo makumi matano ku Elia. Bendile nu basangile Elia eikala ga mwiduko. Amubwide bunee: “Uwe muntu wa Kalaga, mukota atenda bunee: ‘Gela yiliyili.’” 10 Elia akwide wozo mwangati wa makumi matano bunee: “Ndi nili muntu wa Kalaga, keiya kagele kutuka kwigulu kakuzikye, uwe nu makumi matano mobe.” Keiya kagelile nu kazikizye bansania. 11 Asingile kweli ungo mwangati na bantu makumi matano gamozi nage. Abwide Elia bunee: “Uwe muntu wa Kalaga, mukota atenda bunee: ‘Gela yiliyili.’” 12 Elia amwakwide bunee: “Ndi nili muntu wa Kalaga, keiya kagele kutuka kwigulu kakuzikye, uwe nu makumi matano mobe.” Nu keiya ka Kalaga kabazikizye.
13 Nu asingile limbizi lya masatu ungo mwangati wa makumi matano gamozi na makumi matano mage. Wozo mwangati nu bakoloboyo bavule nu bakomine mazu lwabusio lwa Elia nu amutendile n'iyuki lyabota bunee: “Ee muntu wa Kalaga, kalamo kane nu ka babano bakiti bobe makumi matano kibe na bukunza bunene ku meiso mobe. 14 Keiya kazikizye babo bangati babili batangi gamozi na makumi matano mabo, tondo kano kaluma, kalamo kane kibe na bukunza bunene ku meiso mobe.” 15 Mwanzelo wa Yehowa abwide Elia bunee: “Gela gamozi nage. Ntumukue boba.” Elia azanzukile nu agelile gamozi nage kuli mukota. 16 Abwide mukota bunee: “Yehowa atendile bunee: ‘Ndi wasingile migenzi buno babuzie ku Baali-Zebubu kalaga ka Ekuroni kubuno takuli Kalaga mu Israeli unabuzibwa?’ Ububo ku kitondo kikino, ntwatuke ga mugu u uli gago kubuno lebelebe ukukua.”
17 Akule anga bwatendile Yehowa ku Elia, nu Yoramu angatile mu kiziki kyage mu mwaka w'ibili wa Yoramu, mwana wa Yosafati mukota wa Yuda, kubuno Ahazia ntabezaga na mwana.
18 Bingo bitondo byakitile Ahazia, ndi tabyasanzilwe mu mukanda wa byawakalazi bya bakota ba Israeli?