Elia ekilwe kwigulu
2
1 Nu bwabede buno mu nkungu zabasile Yehowa kutola Elia kwigulu na lumpumpu lwa kutimba, Elia atukile ku Gilgali gamozi na Elisa. 2 Elia abwide Elisa bunee: “Sigala gano kubuno Yehowa ansinga ku Beteli.” Elisa amwakwide bunee: “Anga bukulama Yehowa nu anga bukulama mutima wobe, lebelebe nsyakusige.” Bendile gamozi ku Beteli. 3 Kibombo kya balengania kyabezaga ku Beteli kyatukile kumonana na Elisa; bamubuzizie bunee: “Wizi buno Yehowa akweka mukota wobe kwigulu lelo?” Abakwide bunee: “Ee, nizi; ikalazi kibibi.”
4 Elia amubwide bunee: “Elisa, wikale gano, kubuno Yehowa ansinga ku Yeriko.” Amwakwide bunee: “Anga bukulama Yehowa, nu anga bukulama mutima wobe, lebelebe nsyakusige.” Nu bo bendile ku Yeriko.
5 Kibombo kya balengania kya ku Yeriko kyakundile Elisa; bamubuzizie bunee: “Wizi buno Yehowa akweka mukota wobe kwigulu lelo?”
Abakwide bunee: “Ee nizi, ikalazi kibibi.”
6 Elia amubwide bunee: “Ikala gano, kubuno Yehowa ansinga ku Yordani.” Amwakwide bunee: “Anga bukulama Yehowa, nu anga bukulama mutima wobe, lebelebe nsyakusige.” Bubo bendile bobabili.
7 Bantu makumi matano ba kibombo kya balengania bendile kakeke nu bemenne kumona babo babili bemana bwigi na Yordani. 8 Elia eitikizye nsulu zage za kuntata. Azigondile nu azilibwide mu mazi. Mazi malekanukile kuno nu kuko, nu bobabili basokile luuzi lwakama. 9 Nu gabasokile, Elia abwide Elisa bunee: “Nsege kinsania kyukutunda, nikukitile kyo ganikili nobe.”
Elisa atendile bunee: “Nkusega umpe muuza wobe mambizi mabili.”
10 Amwakwide bunee: “Wasega kitondo kibibu, tondo ndi wammonako ganatikibwe, nti wakimone, tondo ndi ntwammonako nti ntwakimone.”
11 Gabendaga basambala mu nzila, bamonine kayanga ka keiya, nu farasi za keiya zabalekanukizye. Nu Elia ekilwe kwigulu mu lumpumpu lukutimba. 12 Elisa amonine nu alalukile bunee: “Tatane, tatane, kayanga nu bakwendaga ga farasi ba Israeli.” Nu ntamumonineko lingo; akatile nsulu zage nu kuzata bibe bibili. 13 Nu kumbusa asongezye zezo nsulu za Elia zaakolokizye, asubizie, nu emenne ku mutili wa Yordani. 14 Akatile nsulu zakolokizye Elia nu alibwide mazi nazo nu atendile bunee: “Kuni kuli Yehowa, Kalaga wa Elia?” Nu mazi malekanukile kuno nu kuko nu Elisa asokile.
15 Kibombo kya balengania kyabezaga ku Yeriko, gabamumonineko, batendile bunee: “Muuza wa Elia wikala mu Elisa.” Bavule kukulumana nage. Bakumbaminne lwabusio lwage, 16 bamubwide bunee: “Lola kuli bantu makumi matano beli na magala gamozi na bakiti bobe. Tukukusega buno bende kulonda mukota wobe. Embe Muuza wa Yehowa wamutola nu kumusiga ku mwiduko umozi aba mu mpinga emozi.”
Abakwide bunee: “Kilo, tamubasinge.” 17 Bamusegile nunse nu atendile bunee: “Mubasinge.” Basingile bantu makumi matano; bamulondile bindi bisatu tondo tabamumonineko. 18 Basubizie kweli gaabezaga ku Yeriko. Ababwide bunee: “Ndi nsyamubwide buno tamwende?”
19 Bantu ba ku mwino basegile Elisa bunee: “Kiziki kya mwino wono kili kisoga anga buukumona, tondo mazi mago tamasoga nu kisi takikwasia mbuto busoga.” 20 Abatendile bunee: “Mvwilazi na nyungu nto nu munkange muzo.” Bamuvwilide nazo. 21 Endile ku kanuabalongo ka mazi nazo nu eisile wozo munkange muko. Atendile bunee: “Bubo u bwatenda Yehowa bunee: ‘Nonia mazi mamano; takwatuke lingo lukuo aba kitaswaga.’” 22 Mazi mamo maswagizibwe aaba nu lelo, mabede anga bwatendile Elisa.
23 Abakamine ku Beteli. Gaabezaga mu nzila, basikila babasile mu mwino. Bamukitile nguza kutenda bunee: “Bakama uwe mwiya kisegesege, ee bakama uwe mwiya kisegesege!” 24 Akebetukile nu kubamonako, abaswilide mu izina lya Yehowa. Dubu ibili za mabuti zatukile mu lubanda nu zatile basikila makumi manazi nu babili.
25 Atukile kuko endile ku mwiduko wa Karmeli, nu kutuka kuko asubizie ku Samaria.