Milimo za baLawi.
23
1 Gabezaga Davidi mukungu nu bindi byage byakukile, abikile Solomono mwana wage mukota wa baIsraeli. 2 Davidi akundamanizie bangati bansania ba baIsraeli nu basankoga nu baLawi. 3 BaLawi baganzilwe babo ba kutukila myaka makumi masatu nu kutinga, nu maganzo mabo mabezaga bamulume tununu makumi masatu nu kinana (38.000). 4 Davidi atendile bunee: “Ku babo, tununu makumi mabili nu tunazi (24.000) twabe bakiti ba milimo mu numba za Yehowa, nu tununu mutuba (6.000) twabe mitonge nu ngatu, 5 nu tununu tunazi (4.000) twabe balangi ba nibi; nu tununu tunazi (4.000) twabe beimbi ba nimbo za kuganuna Yehowa na bindanda binakitile kumuganuna nabyo.” 6 Davidi abalongekile bulingilingi na bana ba Lawi, u Gersoni, Kohati nu Merari. 7 Bana ba Gersoni babezaga Ladani nu Simei. 8 Bana ba Ladani babezaga basatu, Yehieli nkula, nu Zetamu nu Yoeli; 9 bana ba Simei babezaga basatu, Selomoti, Hazieli nu Harani; babo babezaga bangati ba numba za Ladani; 10 bana ba Simei babezaga Yahati, Zina, Yeusi nu Beria, babo banazi babezaga bana ba Simei. 11 Yahati abezaga mutangi, nu Zina wa babili, tondo Yeusi nu Beria tababezaga na bana beingi; ububo babezaga anga numba emozi mu kikanga kya beisibo. 12 Bana ba Kohati babezaga banazi, Amramu, Izihari, Hebroni nu Uzieli. 13 Bana ba Amramu, babezaga Haruni nu Musa. Haruni abikilwe kukasana bintu byasililila, buno we nu bana bage, ku kibuti kinsania, buno bagisie bulago lwabusio lwa Yehowa, kumukitila, nu kukasana mponga mu izina lyage ku milyalya. 14 Nu ku kitondo kya Musa, muntu wa Kalaga, bana bage baganzilwe ku kikanga kya baLawi. 15 Nu bana ba Musa babezaga Gersomi nu Eliezeri. 16 Mwana wa Gersomi, u Sebueli nkula. 17 Bana ba Eliezeri u Rehabia mukota; Eliezeri ntabezaga na ungo musikila, tondo babo ba Rehabia babezaga beingi nunse. 18 Bana ba Izihari u Selomiti nkula. 19 Bana ba Hebroni, Yeria nkula, Amaria wa babili, Yahazieli wa basatu, nu Yekameamu wa banazi. 20 Bana ba Uzieli: Mika nkula nu Isiya wa babili. 21 Bana ba Merari: Mali nu Musi. Bana ba Mali: Eleazari nu Kisi. 22 Eleazari akule geteli musikila, abezaga na bakinga tugu. Mibuto zabo bana ba Kisi babasongile. 23 Bana ba Musi babezaga basatu: Mali, Ederi nu Yeremoti.
24 Babano babezaga baLawi mu numba za beisibo, bakota ba kikanga kya beisibo anga bubasanzilwe ku maganzo ma meina ma muntu na muntu kutukila myaka makumi mabili nu kutinga bavwamine kukita milimo za numba za Yehowa. 25 Kubuno Davidi atendile bunee: “Yehowa, Kalaga wa baIsraeli, akasile bantu bage bubobelelo, nu akwikala mu Yerusalema ku milyalya. 26 Ububo baLawi tabatunganana kweka lingo numba za hema nu bintu bya mulimo wazo.”
27 Kubuno ku moki mazinda ma Davidi, baLawi baganzilwe kutukila myaka makumi mabili nu kutinga, 28 tondo milimo zabo zibe kukitila bana ba Haruni mu milimo za numba za Yehowa; balange milungu nu masio nu kusuga bintu binsania byasililila nu milimo insania za numba za Kalaga. 29 Bakasie basankoga na tumpampa twa kalolesio, nu nsiano za kayulo, nu tumpampa tutagaga, nu nsiano zasambikwa na makiti nu tumpampa nu binsania bya kulindika buzitu nu bulazi. 30 Nu bemane nindunindu na nindunindu nu igolo n'igolo, kusima nu kuganuna Yehowa, 31 nu kukasana nkungu insania tuyulo twa kugisibwa lwabusio lwa Yehowa ku busi na busi bwa Sabato, nu ku bindi bitangi bya mwezi nu ku bindi bya kisagulo, anga maganzo mabyo ku milyalya. 32 Ububo balangile numba za musanganano nu zasililila, nu bakitide bana ba Haruni, mibuto zabo, mu milimo za numba za Yehowa.