Davidi alongeka bintu bya numba za Kalaga.
22
1 Nu Davidi abwide bunee: “Zeno zili numba za Yehowa, nu kano keli kasenga ka bisansa bya kugisibwa ku baIsraeli.” 2 Nu Davidi akakizizie kukundamania bageni bansania babezaga mu kisi kya baIsraeli. Abikile baati ba makozi ma kobaka numba za Kalaga. 3 Nu Davidi alongekile byuma bingi kukita misumali nu nswiko za nibi; nu nsubi ningi zitanalindikwa buzitu, 4 nu mbavu za mierezi zitanaganzwa, kubuno baSidoni nu baTiro bavule na miti mingi ku Davidi. 5 Nu Davidi atendile bunee: “Mwana wane Solomono eli mukeke uteba na menge, nu numba zobakilwe Yehowa zatunganana kuba nsoga nunse, za luganuno nu lukumu mu bisi binsania. Ukinsa nkuzilongeka.” Ububo Davidi abikile isuku lwabusio lwa lukuo lwage. Ntondi za Davidi ku Solomono.
6 Nu amanine Solomono, mwana wage, nu amukakizizie kobaka numba za Yehowa, Kalaga wa baIsraeli. 7 Davidi abwide mwana wage Solomono bunee: “Nabezaga na makengelo mu mutima wane kobaka numba ku izina lya Yehowa, Kalaga wane. 8 Tondo iyuki lya Yehowa lyavule kundi nu lyatendile bunee: ‘Wakubwide mikila mingi nu wakitile bita binene, ntwobake numba ku izina lyane kubuno wakubwide mikila mingi lwabusio lwane. 9 Lola, ukabuta mwana ukaba muntu wa bubobelelo nu kumunwa. Nkamukasa kyumuno ku beiti bage bansania bakamutimba; kubuno izina lyage likaba Solomono, nu nkalusia ku baIsraeli bubobelelo nu kola mu bindi byage. 10 We ukobaka numba ku izina lyane; abe mwana wane nu nabe isi, nimike kisumbi kya bukota bwage ku baIsraeli ku milyalya.’ 11 Kano kaluma, mwana wane, Yehowa abe gamozi nobe, buno witile nu kobaka numba za Yehowa, Kalaga wobe, anga bwakulagile. 12 Yehowa akukase menge nu bumenyinino, nu akukakizie ku kabamba ka baIsraeli, buno ulange mulembe wa Yehowa, Kalaga wobe. 13 Ububo wabe na bubobelelo, ndi wanza milembe insania nu nsungio insania zakakizizie Yehowa ku Musa ku kabamba ka baIsraeli. Ba na magala nu kugugumana; ntukue boba aba ntukutwe. 14 Ntukumona, mu kwikasana kwane, nalongekile talanta tununu lukama (100.000) za olo nu talanta kanunu ka tununu (1.000.000) za feza nu za nsubi nu za kyuma geteli kulindika buzitu, kubuno byili byingi; lingo nalongekile mbavu nu makozi, nu uwe unavwama kutalikila bingo. 15 Uli na bakiti beingi, babo beizi kubaza makozi, nu bobaki, bakulumizi ba mbavu nu bakulumizi beingi balinda ba nkita insania. 16 olo nu feza nu nsubi nu kyuma bitanaganzwa. Zanzuka nu kita, nu Yehowa abe gamozi nobe.”
Davidi akukakizia bangati ba Israeli.
17 Davidi akakizizie bangati bansania ba baIsraeli kukasia Solomono mwana wage. Atendile bunee: 18 “Ndi Yehowa, Kalaga weinyu, nteli gamozi n'inyu? Ndi ntamukasile bubobelelo ku ndenge insania? Kubuno akasenne beiya kisi mu maboko mane. Kisi kyakindilwe lwabusio lwa Yehowa nu bantu bage. 19 Londazi Yehowa, Kalaga weinyu, na mutima nu makengelo meinyu. Zanzukazi nu obakazi kiziki kyasililila kya Kalaga Yehowa, buno Sanduku z'Idagano lya Yehowa nu binsania byasililila bya Kalaga byekwe ku numba zobakwe ku izina lya Yehowa.”