Davidi agila Kalaga mu kuganza baIsraeli.
21
1 Nu Satana emanine ku baIsraeli nu asindikile Davidi kuganza baIsraeli. 2 Davidi abwide Yoabu nu basondelezia ba bantu bunee: “Endazi, muganze baIsraeli kutukila Beri-Seba aaba nu ku Dani. Mvwilazi na musagu buno nimenye gabeigezye.” 3 Yoabu akwide bunee: “Yehowa atalikile maganzo ma bantu mambizi lukama. Ee mukota wane mwangati, ndi babo bansania tabeli bakiti ba mukota wane? Kubuni mukota abuzia kitondo kikino? Kubuni kuwatunda kulusia katati ku baIsraeli?”
4 Tondo iyuki lya mukota lyakindile Yoabu, nu Yoabu endile nu atabangile kunsania ku baIsraeli nu asubizie ku Yerusalema. 5 Yoabu akasile Davidi maganzo ma bantu. BaIsraeli bansania babezaga kanunu ka tununu nu tununu lukama (1.100.000) twa bamulume beizi kwitana na myene, nu baYuda babezaga tununu nkama inazi nu makumi mutubakamo (470.000) twa bamulume beizi kwitana na myene. 6 Tondo ntaganzile baLawi nu baBenjamina munkatini mwabo, kubuno Yoabu ntanzile iyuki lya mukota. 7 Nu Kalaga ntabogilebogile na kitondo kikino; ububo eitile baIsraeli. 8 Davidi abwide Kalaga bunee: “Nagile nunse mu kitondo kikino kinakitile; nkukusega kano kaluma kusigilila bwagi bwa mukiti wobe, kubuno nakitile anga kikongolo.”
9 Yehowa abwide Gadi mulaguzi wa Davidi bunee: 10 “Enda utende Davidi bunee: ‘Bubuno u bukutenda Yehowa, bunee: “Sombola ku bibino bitondo bisatu kimozi kinakukitile.”’” 11 Ububo Gadi abasile ku Davidi nu atendile bunee: “Bubuno u bwatenda Yehowa bunee: ‘Sombola kiwatunda, 12 aba myaka isatu za nzala, aba myezi isatu za kuzikibwa na beiti bobe nu kukindwa na myene za beiti bobe, aba bindi bisatu bya mwene wa Yehowa; u lusungio lwobe mu kisi, nu mugenzi wa Yehowa azikye kisi kinsania kya baIsraeli. Sombola iyakulo likizi liwasubye ku wozo wansingile.’” 13 Kumbusa Davidi akwide Gadi bunee: “Nili na kabebe kanene; kano kaluma, nsige nibe mu maboko ma Yehowa, kubuno kyombo kyage kili kinene nunse, nsibe mu maboko ma bantu.”
14 Ububo Yehowa asingile lusambo lukali lwa mpese ku baIsraeli, nu tununu makumi mutubakamo (70.000) twa baIsraeli twakule. 15 Kalaga asingile mwanzelo wage ku Yerusalema kuguzikya. Nu gaabezaga akuguzikya, Yehowa amonine nu eiyanizie ku bubi, nu atendile ku mwanzelo wazikagia bunee: “Kano kaluma tikya kuboko kwobe.” Mwanzelo wa Yehowa emanine ga mulungu wa kususula mbuto wa Ornani muYebusi. 16 Davidi alimbwide meiso mage nu amonine mwanzelo wa Yehowa emana gasamba kisi nu igulu, nu mwene watikibwa mu musagi mu kuboko kwage nu kulambibwa ku Yerusalema. Mu nkungu zezo, Davidi nu bakulu babezaga bavwala makunino, bagwede bukukama. 17 Davidi abwide Kalaga bunee: “Ndi ta nne u wakakizizie maganzo ma bantu? Kasi, nne u wagile nu kukita bubuno bubi, tondo mikoko zeno zakitile kikizi? Nkukusega, ee Yehowa, Kalaga wane, kuboko kwobe kube kundi nu ku numba za tatane, tondo ta ku bantu bobe buno beitwe.”
Davidi akasana kayulo.
18 Nu mwanzelo wa Yehowa akakizizie Gadi kutenda ku Davidi bunee: “Lebelebe Davidi abakame nu kwanga kasenga ka kayulo ku Yehowa ga mulungu wa kususula mbuto wa Ornani, muYebusi.” 19 Davidi abakamine anga bwatendile Gadi mu izina lya Yehowa. 20 Ornani agalukile nu amonine ku mwanzelo, abisamine, we nu basikila bage banazi. Ornani abezaga asusula ngano. 21 Mu nkungu zavule Davidi ku Ornani, Ornani alolile nu amonine ku Davidi, nu abasile ga mulungu wa kususulila nu akumbaminne lwabusio lwa Davidi nu kwikya malanga mage gansi; 22 nu Davidi abwide Ornani bunee: “Nkunzie wono mulungu wa kususulila mbuto ku bukunza, nange kasenga ka kayulo ku Yehowa buno lusambo lukali lwa mpese lusile ku bantu.”
23 Nu Ornani abwide Davidi bunee: “Kata go nu mukota wane akite nago anga buli busoga ku meiso mage. Ntukumona, lola, nkukukasa mulume wa ngombe ku kisansa kya kugisibwa, nu bya kususula mbuto ku misali, nu ngano ku kayulo, nkukukasa binsania.”
24 Tondo mukota Davidi abwide Ornani bunee: “Kilo, lebelebe nkukunza byo ku bukunza bwakuka, kubuno nsikukata byobe nu kubikasa ku Yehowa, aba nsikukasana bisansa bya kugisibwa geteli bukunza.” 25 Ububo Davidi akunzile Ornani kikyo kiziki kinsania ku buzitu bwa shekeli nkama mutuba za olo. 26 Nu Davidi angile ko kasenga ka kayulo ka Yehowa, nu akasenne bisansa bya kugisibwa nu bya bubobelelo. Asegile Yehowa, nu Yehowa amwakwide na keiya kutuka kwigulu nu kubasa gantata ga kasenga ka kayulo. 27 Nu Yehowa akakizizie mwanzelo nu asubizie mwene wage mu musagi.
28 Mu nkungu zezo, Davidi, gaamonine buno Yehowa amwakula ga mulungu wa kususula mbuto wa Ornani muYebusi, akasenne bisansa gago, 29 kubuno mu nkungu zezo, hema za Yehowa zakitile Musa mu kalula, nu kasenga ka bisansa bya kugisibwa, byabezaga ga nkangamo za Gibeoni. 30 Tondo Davidi ntavwamine kwenda lwabusio lwako kusega Kalaga, kubuno mwene wa mwanzelo wa Yehowa wamwitizie boba.