Davidi akinda mwino wa Raba
20
1 Mu kulinga kwa mwaka muto, mu nkungu za kwenda kwa bakota ku bita, Yoabu asondelezizie iyombo, nu azikizye kisi kya baAmoni nu atimbile Raba na bita, tondo Davidi eikede ku Yerusalema. Yoabu akindile Raba nu aguzikizye. 2 Davidi atikizye nkumbu ku itoe lya mukota wabo; zabezaga na buzitu bwa talanta za olo makumi manazi, nu muzo mwabezaga makozi ma bukunza bukali, nu bazibikile gantata g'itoe lya Davidi. Atikizye ntiko za mwino, bikulo byingi nunse. 3 Atikizye bantu ba mugo nu abikile bantu ku milimo za kwata mbavu, nu kumba na mpiki nu kusinda miti na masaga. Bubo u bwakitile Davidi ku miino insania za baAmoni. Kumbusa asubizie ku Yerusalema. 4 Kumbusa kwabede bita na baFilistini ku Gezeri. Nu Sibekayi muHusati, eitile Sipayi, umozi wa bana ba wozo muntu mulazi nunse, nu baFilistini bakindilwe.
5 Kwabede lingo bingo bita na baFilistini nu Elihanani mwana wa Yairi, eitile Lami, muto wa Goliati wa Giti, nu mwiya w'isumo lyage wabezaga wigezye na mungolo.
6 Kwabede bingo bita ku Gati; kwabezaga muntu mulazi nunse. Abezaga na minwe mutuba ku kuboko na kuboko, nu mpanda mutuba ku kugulu na kugulu, minwe nu mpanda zage insania zabezaga makumi mabili nu inazi. Abezaga mwana wa bantu balazi. 7 Alumbizizie baIsraeli, nu Yonatani, mwana wa Simea, iselenzi wa Davidi, amwitile. 8 Babano u bana ba wozo muntu mulazi nunse muGati, beitilwe na Davidi nu bakiti bage.