BaAmoni banyega mponga za Davidi.
19
1 Kumbusa kwa bitondo bibino, Nahasi, mukota wa baAmoni akule; nu mwana wage angatile mu kiziki kyage. 2 Ububo Davidi atendile bunee: “Nalolesie mponga ku Hanuni, mwana wa Nahasi, kubuno isi azilolesizie kundi.” Ububo Davidi asingile migenzi kumubibya ku lukuo lw'isi. Nu gabasile bakiti ba Davidi ku Hanuni mu kisi kya baAmoni kumubibya, 3 bakota ba baAmoni batendile ku Hanuni bunee: “Ukukengela buno Davidi akwanza so u kwakusingila bantu ba kukubibya? Bakiti bage bavule tugu kumona kisi nu kukikinda nu kukititika.” 4 Ububo Hanuni akatile bakiti ba Davidi nu ababegile nu asesile nsulu zabo aaba nu kunsi kwa ntungi zabo nu abasigile kwenda. 5 Nu bantu bamozi bendile kusambalila Davidi bwakitilwe babo bantu. Nu mukota asingile migenzi kubakulumania, kubuno bakule na nsoni nunse. Ababwide bunee: “Musigale ku Yeriko aaba nu gaase nzelu zeinyu lingo, nu kumbusa mwasubye.” 6 Gamonine baAmoni buno beikitide kuba babi ku Davidi, Hanuni nu baAmoni basingile talanta kanunu (1.000) kumana mululo, kuliga bakoloboyo bakwenda mu tuyanga nu beiya farasi, kutukila Mesopotamia, nu Aramaka, nu Zoba. 7 Beikunzide tuyanga twa bita tununu makumi masatu nu tubili (32.000), nu mukota wa Maka n'iyombo lyage bavule nu bakitile ido lyabo lwabusio lwa Medeba. Bana ba Amoni bemanine kutukila miino zabo nu bavule ku bita. 8 Gongule Davidi ku wozo musagu, asingile Yoabu nu iyombo linsania lya mapuka. 9 Bana ba Amoni batukile, nu babede kayikayika ku bita, ku isula lya mwino munene wa baAmoni. Nu bakota bavule babezaga bobenyene mu kalula.
10 Gamonine Yoabu buno bita byabezaga lwabusio nu kumbusa kwage, asombwede mapuka mamozi ma baIsraeli nu amabikile lwabusio lwa baAramu. 11 Nu babo bango bantu basigede ababikile mu maboko ma Abisayi muto wage, nu babede lwabusio lwa baAmoni. 12 Nu atendile bunee: “Ndi baAramu babe babibu kundi, nti wankasia; nu ndi baAmoni babe babibu kuguli nti nakukasie. 13 Ba na magala nu tulolesie mpumba ku kabamba ka bantu beitu nu ku kabamba ka miino za Kalaga weitu. Nu Yehowa akite anga bwakukengela buli busoga.” 14 Ububo Yoabu gamozi na bantu bage bakundile baAramu ku bita nu batinine lwabusio lwage. 15 Gamonine baAmoni buno baAramu batinine, bo nu bo batinine lwabusio lwa Abisayi, muto wa Yoabu, nu beingide mu mwino. Kumbusa Yoabu avule ku Yerusalema.
16 Tondo, gamonine baAramu buno bakindwa na baIsraeli, basingile migenzi nu balutile baAramu babezaga lisilya lya Furati, nu Sofaki, mukota w'iyombo lya Hadadezeri, abezaga musondelezia wabo. 17 Gabendile kutonda Davidi, akundamanizie baIsraeli bansania, asokile Yordani, nu abakundile nu kubika iyombo lyage kayikayika. Gabede Davidi kayikayika, baAramu beitenne nage. 18 BaAramu batinine lwabusio lwa baIsraeli, nu Davidi eitile baAramu beiya tuyanga tununu mutubakamo (7.000), nu bakoloboyo bendaga na magulu tununu makumi manazi (40.000), nu eitile Sofaki, mukota w'iyombo. 19 Gamonine bakiti ba Hadadezeri buno bakindwa na baIsraeli, bakitile bubobelelo na Davidi, nu babede bakiti bage; ububo baAramu tabeitabizizie kukasia baAmoni lingo.