Davidi akinda beiti bage.
18
1 Kumbusa kwa bubuno, Davidi akindile baFilistini nu abeitile, nu atikizye Gati nu miino zabo insania ku maboko ma baFilistini. 2 Akindile baMoabu, nu baMoabu babede bakiti ba Davidi, nu bavule na mitulo. 3 Lingo, Davidi akindile Hadadezeri, mukota wa Zoba, bwigi na Hamati, geendile kwimika bwangato bwage ku luuzi Furati. 4 Davidi amutikizye tuyanga kanunu (1.000), nu bendaga ga farasi tununu mutubakamo (7.000), nu bendaga na magulu tununu makumi mabili (20.000). Davidi asesile miki za farasi za tuyanga tunsania, tondo alangile farasi zakuka ku tuyanga lukama. 5 BaAramu ba ku Damasiki bavule kukasia Hadadezeri, mukota wa Zoba, ku bita, nu Davidi eitile baAramu tununu makumi mabili nu tubili (22.000). 6 Nu Davidi abikile bakoloboyo bage ba kulanga mwino wa Damasiki mu Aramu, nu baAramu babede bakiti ba Davidi nu bamuvwilide na mitulo. Yehowa akasile Davidi bukindi kunsania kwendaga. 7 Davidi atikizye ngabo za olo zabezaga na bakiti ba Hadadezeri, nu azekile ku Yerusalema. 8 Kutukila Tibuhati nu Kuni, miino za Hadadezeri, Davidi atikizye nsubi ningi; Solomono akitile nazo kitatenge kya nsubi, mango nu bintu bya nsubi. 9 Nu nkungu zungule Toi, mukota wa Hamati buno Davidi akindile iyombo linsania lya Hadadezeri mukota wa Zoba, 10 asingile Hadoramu mwana wage ku mukota Davidi kumusekela nu kumukasa mponga kubuno akitile bita na Hadadezeri nu kumukinda. Kubuno Hadadezeri abezaga na bita na Toi mambizi mengi. Amusingide bintu bya nkita insania, bya olo, nu bya feza, nu bya nsubi. 11 Mukota Davidi abikasenne ku Yehowa gamozi na bintu bya feza, nu olo byatikizye ku bilongo binsania, kutukila baEdomu, baMoabu, baAmoni, baFilistini, nu baAmaleki. 12 Nu Abisayi mwana wa Zeruya eitile baEdomu tununu ikumi nu kinana (18.000) mu Kibitabita kya Munkange. 13 Abikile bakoloboyo ba kulanga mwino nu baEdomu bansania babede bakiti ba Davidi. Yehowa akasile Davidi bukindi kunsania kwendaga.
Bukota bwa Davidi.
14 Ububo Davidi angatile baIsraeli bansania; angatile bantu bage bansania na kwisanana nu bulili. 15 Yoabu mwana wa Zeruya abezaga mukota w'iyombo; Yosafati, mwana wa Ahiludi, abezaga musanzi, 16 Zadoki, mwana wa Ahitubu, nu Abimeleki, mwana wa Abiatari, babezaga basankoga; Sausa abezaga musanzi; 17 Benaya mwana wa Yehoyada, abezaga mukota wa baKereti nu baPeleti, nu bana ba Davidi babezaga bakiti banene ku mukota.