Davidi ananibwa kwobaka numba za Kalaga.
17
1 Gabezaga Davidi eikile mu numba zage, Davidi abwide Natana mulengania bunee: “Ntukumona, nkwikala mu numba za mbavu za mierezi, tondo Sanduku z'Idagano lya Yehowa zili ga lusu lwa hema tugu.” 2 Natana akwide Davidi bunee: “Kita binsania bili mu mutima wobe, kubuno Kalaga eli gamozi nobe.” 3 Mu kindi kikyo, iyuki lya Yehowa lyavule ku Natana kutenda bunee: 4 “Enda utende ku mukiti wane Davidi bunee: ‘Bubuno u bwatenda Yehowa bunee: “Ntunobakile numba buno nikale muzo. 5 Kubuno nsikalaga mu numba kutukila busi bunasondelezizie baIsraeli aaba nu lelo, tondo nkwikalaga mu numba na numba za hema, nu mu kiziki na kiziki kankanka. 6 Mu biziki binsania binatabangile na baIsraeli, ndi natendile iyuki limozi ku ngatu za baIsraeli, zinakakizizie kulisia bantu bane, bunee: ‘Kubuni ntwanobakila numba za mbavu za mierezi?’”’ 7 Kano kaluma tenda bubuno ku mukiti wane Davidi bunee: ‘Bubuno u bwatenda Yehowa Mwiya Mayombo bunee: “Nakutikizye ku mukumba wa mikoko, kuzilanga, buno ube mukota wa bantu bane, baIsraeli; 8 nabezagile nobe kunsania kuwendaga, nu nitile beiti bobe bansania lwabusio lwobe, nu nakukitide izina lyobe anga meina ma babo banene beli mu kisi; 9 nu nalongeke kiziki ku bantu bane baIsraeli. Beikale nu kulama mukyo buno tabeigibwe lingo, nu bantu babi tababeite lingo, anga wakalazi, 10 kutukila nkungu zinasombwede ngatu gantata ga baIsraeli, bantu bane; nu nakinde beiti bobe bansania. Lingo, nkukusambalila buno Yehowa akakobakila numba. 11 Kungwa bindi byobe byakuka, nu wenda ku baso, nkazanzukya umozi wa bana bobe, u kibuti kyobe, nu nkalindia bukota bwage. 12 We ukanobakila numba nu nkagugumika kisumbi kyage kya bukota ku milyalya. 13 Nabe isi, nu we abe mwana wane; nu Nne nsikeida kumukwila kyombo, anga bunakitikizye ku wozo wabezaga lwabusio lwobe. 14 Nu namwimike mu numba zane nu mu bukota bwane ku milyalya, nu kisumbi kyage kyagugumanibwe ku milyalya.”’” 15 Natana abwide Davidi bitondo binsania bulingilingi na ndozi, anga bwamutendile Kalaga.
16 Kumbusa Davidi eingide mu hema nu eikede gansi lwabusio lwa Yehowa nu abuzizie bunee: “Ee Kalaga Yehowa, nili nazi? Nu numba zane zili nkizi buno wanekile aaba nu gano? 17 Kikino kyabezaga kikeke kuguli, ee Kalaga, nu watendede numba za mukiti wobe ku myaka mingi bikavwa, nu wanganzile anga mwangati munene wa kisi, ee Kalaga Yehowa. 18 Buni bunakutenda lingo Davidi ku lutanuno luwakitide mukiti wobe? Kubuno wizi mukiti wobe. 19 Ee Yehowa, ku kabamba ka mukiti wobe, nu ku mutima wobe, wakitile bitondo bibino binene buno umumenyesie byo. 20 Ee Yehowa, takuli ungo anga uwe, nu anga butungule na matuzi meitu, takuli kango Kalaga, uwe tugu. 21 Kilongo kikizi kya kisi kili anga bantu bobe ba Israeli, bakulwidwe na Kalaga kuba bantu bage nu wikitide izina lyage na bitondo binene nu byakuganiagania, kupumbia bilongo lwabusio lwa bantu bobe, bawakulwide kutuka ku Misri? 22 Nu wakitile buno bantu bobe baIsraeli babe bantu bobe ku milyalya, nu uwe Yehowa wabe Kalaga wabo. 23 Ee Yehowa, kano kaluma idagi lyobe liwatendile ku mukiti wobe nu ku numba zage lilindibwe ku milyalya, nu kita anga buwatendile, 24 nu izina lyobe lilindibwe nu liganunwe ku milyalya, gabatende bunee: ‘Yehowa Mwiya Mayombo, Kalaga wa baIsraeli, eli Kalaga wa baIsraeli,’ nu numba za mukiti wobe zilindibwe lwabusio lwobe. 25 Kubuno uwenyene, ee Kalaga wane, wamenyesizie mukiti wobe buno wamobakile numba; ububo mukiti wobe amonine mu mutima wage buli busoga kusega kuguli. 26 Kano kaluma, ee Yehowa, uli Kalaga, nu walagile zeno mponga ku mukiti wobe. 27 Umpanga bwakutananizizie kukasa mponga ku numba za mukiti wobe, kubuno wozo u wakasa mponga, nti akaswa mponga ku milyalya.”