Mukota Davidi asima Kalaga
16
1 Bavule na Sanduku za Kalaga nu bazibikile mu numba za hema zakomine Davidi ku kabamba ka zo; bakitile bisansa bya kugisibwa nu bya bubobelelo lwabusio lwa Kalaga. 2 Nu gasilile Davidi kukita bisansa bya bubobelelo nu bya kugisibwa, akasile bantu mponga mu izina lya Yehowa. 3 Akasile muntu na muntu wa baIsraeli, mukikulu nu wamulume, kampampa kamozi, kyindi kya nyama nu nkindi za biguma bili nse bya zabibu. 4 Nu lingo asombwede baLawi bamozi kukitila Kalaga lwabusio lwa Sanduku za Yehowa, na masego nu kuganuna Yehowa, Kalaga wa Israeli. 5 Asafu musondelezia, nu wa babili kumbusa kwage Zekaria, Yeieli nu Semiramoti, Yehieli nu Matitia, Eliabu, nu Benaya, Obedi-Edomu, nu Yeieli, beiya bindanda nu nzenze; Asafu mwiya bapili n'iyuki ibibu; 6 Benaya, Yahazieli, basankoga beiya kwida mpanda kankanka lwabusio lwa Sanduku z'Idagano za Kalaga. 7 Ku busi bubo, Davidi asombwede Asafu nu mibuto zage kuganuna Kalaga na lwimbo luluno: 8 Ganunazi Yehowa, segazi mu izina lyage,
Sambalazi makitilo mage munkatini mwa bantu,
9 Mwimbilazi luganuno, mwimbilazi luganuno,
Musambale miganogano zage insania.
10 Mwiganune mu izina lyage lyasililila,
Mitima za babo bakulonda Yehowa zibogeboge.
11 Londazi Yehowa nu magala mage,
Nu londazi kilungi kyage kankanka.
12 Kengelazi milimo za kwangamia zaakitile,
Nu miganogano zage, nu nsungio zaatendile;
13 Inyuwe kibuti kya Yakobo, mukiti wage,
Inyuwe bana ba Yakobo u basombolwa bage.
14 Eli Yehowa, Kalaga weitu,
Nsungio zage zili kunsania mu kisi.
15 Kengelazi idagano lyage kankanka,
Malagano mage maakakizizie ku bibuti kanunu (1.000);
16 Idagi lyakitile na Abrahamu;
Nu kilumbilo kyalumbilide Isaka.
17 Akikokomezizie ku Yakobo ku mulembe,
Kilumbilo kyage ku baIsraeli ku milyalya.
18 Atendile bunee:
“Namukase kisi kya Kanana kuba bwiyani bweinyu.”
19 Gababezaga bakeke mu maganzo,
Bakeke nunsania nu bageni mu kisi,
20 Gabatimbiletimbile mu kilongo na kilongo,
Nu mu bukota bumozi aba nu ku bango bantu.
21 Ntazigile bantu kubababazia;
Nu azugide bakota ku kabamba kabo.
22 Atendile bunee: “Tamwitubye ku baswagibwa bane,
Tamubenge balengania bane.”
23 Kisi kinsania, imbilazi Yehowa;
Sambalazi lonio lwage busi na busi.
24 Igisiazi kitondo kikyo munkatini mwa bilongo;
Miganogano zage munkatini mwa bantu bansania.
25 Kubuno Yehowa eli munene;
Atunganana kuganunwa,
Nu kukubwa boba kutinga tungo tulaga tunsania.
26 Kubuno tulaga tunsania twa bantu tuli nkisi,
Tondo Yehowa akitile igulu.
27 Lwanzo nu lutanuno bili lwabusio lwage,
Magala nu mbogimbogi zili mu kiziki kyage.
28 Inyuwe bikanga bya bantu, kasazi ku Yehowa,
Kasazi Yehowa lutanuno nu magala.
29 Kasazi Yehowa lutanuno lwaswaga ku izina lyage,
Vwazi na tuyulo lwabusio lwage.
Kumbaminazi Yehowa mu busoga bwa kusililila kwage.
30 Kisi kinsania, giliminazi lwabusio lwage,
Ee, kisi kyalindibwa, takyatikibwe ku milyalya.
31 Ba kwigulu babogeboge, nu ba kisi babe na kyelele,
Batende munkatini mwa bilongo bunee:
“Yehowa akwangata.”
32 Kitatenge kibile nu binsania bili mukyo;
Isoa libe n'idia lingi nu binsania bili mulyo,
Kubuno akuvwa kusungia kisi.
33 Miti insania za lubanda zimbe na mbogimbogi lwabusio lwa Yehowa,
Kubuno akuvwa kwangata kisi.
34 Ee, ganunazi Yehowa kubuno eli musoga,
Nu kyombo kyage kili ku milyalya.
35 Tendazi buno, Kalaga weitu wa lonio, tonie;
Tukundamanie nu tutikye munkatini mwa ba bilongo,
Buno tuganune izina lyobe lyasililila,
Nu kubogaboga mu lutanuno lwobe.
36 Yehowa, Kalaga wa baIsraeli, aganunwe ku milyalya na milyalya.
Nu bantu bansania batendile bunee: “Amina!” Nu baganwine Yehowa.
37 Ububo Davidi asigile Asafu nu mibuto zage gago lwabusio lwa Sanduku z'Idagano lya Yehowa buno babe ku mukambo lwabusio lwazo ku milyalya anga bwabezaga mulimo wage busi na busi. 38 Asigile Obedi-Edomu nu mibuto zage makumi mutuba nu kinana; nu Obedi-Edomu mwana wa Yedutuni, nu Hosa, babezaga balangi ba nibi. 39 Asigile Zadoki, sankoga nu mibuto zage basankoga lwabusio lwa numba za Yehowa zabezaga ku kiziki kyalanga ku Gibeoni, 40 kukasana bisansa bya kugisibwa ku Yehowa ga kasenga ka bisansa bya kugisibwa, mu nindunindu nu mwigolo, anga bwasanzilwe mu milembe za Yehowa zaakakikizie baIsraeli. 41 Hemani nu Yedutuni babezaga gamozi nabo, nu bango basombwedwe nu kutekulwa mu meina mabo, kuganuna Yehowa ku kabamba ka kyombo kyage kya milyalya. 42 Hemani nu Yedutuni babezaga beiya mpanda nu bapili nu byakugombwa na moki manene ku kabamba ka nimbo za Kalaga. Nu bana ba Yedutuni basombwedwe kulanga nibi. 43 Kumbusa bantu bansania bendile nawe nawe ku numba zage, nu Davidi asubizie kwage, kukasa mponga ku numba zage.