Sanduku za Yehowa zabasa ku Yerusalema.
15
1 Davidi eiyobakide numba mu mwino wage; alongekile kiziki kya Sanduku za Kalaga nu akomine hema mukyo. 2 Kumbusa, Davidi atendile bunee: “Sanduku za Kalaga tazeekwe na bantu beteli baLawi, kubuno Yehowa abasombwede kweka Sanduku za Kalaga nu kumukitila ku milyalya.” 3 Davidi akundamanizie baIsraeli bansania ku Yerusalema buno balusie Sanduku za Yehowa ku kiziki kyazilongekede. 4 Davidi akundamanizie bana ba Haruni, nu baLawi: 5 bana ba Kohati, Urieli musondelezia, nu mibuto zage lukama nu makumi mabili; 6 bana ba Merari, Asaya musondelezia nu mibuto zage nkama ibili nu makumi mabili; 7 bana ba Gersoni, Yoeli musondelezia nu mibuto zage lukama makumi masatu; 8 bana ba Elizafani, Semaya musondelezia, nu mibuto zage nkama ibili; 9 ba kikanga kya Hebroni, Elieli musondelezia, nu mibuto zage makumi kinana; 10 ba kikanga kya Uzieli, Aminadabu musondelezia wabo, nu mibuto zage lukama, ikumi nu babili; 11 mu nkungu zezo, Davidi amanine basankoga, Zadoki, Abiatari, nu baLawi, nu Urieli, Asaya, Yoeli, Semaya, Elieli, nu Abinadabu, 12 ababwide bunee: “Inyuwe muli bangati ba numba za baLawi. Mwiyengie, inyuwe nu mibuto zeinyu, buno mubakamie Sanduku za Yehowa, Kalaga wa Israeli, ku kiziki kinazilongekede; 13 Yehowa, Kalaga weitu, azikizye bamozi kutuli limbizi litangi kubuno tamwabezaga ko. Tatwazilangile mu lukita lwakakizizie.” 14 Ububo basankoga nu baLawi beiyengezie, kweka Sanduku za Yehowa, Kalaga wa Israeli. 15 BaLawi bekile Sanduku za Kalaga ga bituli na mingolo, anga bwakakizizie Musa bumozi n'Idagi lya Yehowa. 16 Davidi abwide bangati ba baLawi bunee: “Manazi mibuto zeinyu beimbi, gamozi na bintu byabo bya kwimba: bindanda, binumbi, nzenze, nu bapili, babitute na magala kulolesia kyelele.” 17 BaLawi basombwedwe, Hemani mwana wa Yoeli; nu mibuto zage Asafu mwana wa Berekia, nu bana ba Merari mibuto zabo, Etani mwana wa Kusaya, 18 nu mibuto zabo ibili za mpilili z'ibili gamozi nabo: Zekaria, nu Yazieli, nu Semiramoti, nu Yehieli, nu Uni, Eliabu, nu Benaya, nu Maseya, nu Matitia, nu Elifelehu, nu Mikineya, nu Obedi-Edomu, nu Yeieli, balangi ba lwibi. 19 Hemani, Asafu, nu Etani, tulongo twa nimbo, batutaga bapili babo ba nsubi na magala. 20 Zekaria, nu Azieli, nu Semiramoti, nu Yehieli, nu Uni nu Eliabu, nu Maseya, nu Benaya, beiya bindanda by'iyuki lya bakinga; 21 nu Matitia nu Elifelehu, nu Mikineya, nu Obedi-Edomu, nu Yeieli, nu Azazia, beiya nzenze z'iyuki lya Seminiti, kusondelezia. 22 Kenania, musondelezia wa baLawi, abezaga mwimbisia, kukakizia nimbo kubuno abezaga kalongo. 23 Berekia nu Elkana babezaga balangi ba lwibi lwa Sanduku. 24 Sebania nu Yosafati, Netaneli, Amasai, Zekaria, Benaya, Eliezeri, basankoga, bidile myonze lwabusio lwa Sanduku za Kalaga; Obedi-Edomu nu Yehiya, babezaga balangi ba nibi ku Sanduku.
25 Ububo Davidi nu bakulu ba Israeli nu bakota bakoloboyo ba bibombo bya kanunu (1.000) bendile na Sanduku z'Idagano za Yehowa kutuka ku numba za Obedi-Edomu na mbogimbogi. 26 Kalaga akasizie baLawi bekaga Sanduku z'Idagano za Yehowa, bakasile bisansa bya balume ba ngombe mutubakamo nu bilimba bya mikoko mutubakamo. 27 Davidi nu baLawi, nu bansania beekaga Sanduku, nu beimbi, nu Kenania, musondelezia wa nimbo, nu beimbi, bavwalile efodi za kitani kisoga. 28 BaIsraeli bansania babakamizie Sanduku z'Idagano za Yehowa mu kulaluka nu kwida mpanda nu myonze, nu bapili nu kututa bindanda nu nzenze.
29 Nkungu zabasile Sanduku z'Idagano za Yehowa mu mwino wa Davidi, Mikali mukinga wa Saulo alolile g'idilisa nu amonine ku mukota Davidi akulengalenga nu kumina, nu amubengile mu mutima wage.