Davidi eiyobakide numba.
14
1 Hiramu, mukota wa Tiro, asingile migenzi ku Davidi nu miti za mbavu nu bobaki nu bakulumizi ba mbavu; buno bamwobakile numba. 2 Davidi amenyininne buno Yehowa amusombola kuba mukota wa Israeli, kubuno bukota bwage bwatanwinnwe nunse ku kabamba ka baIsraeli. 3 Davidi asongile bango bakikulu ku Yerusalema nu abutile bango basikila nu bakinga. 4 Mamano meli meina ma bana babutilwe ku Yerusalema: Samua, nu Sobabu, Natana nu Solomono; 5 nu Ibuhari, nu Elisua, nu Elipeleti, 6 nu Noga, nu Nefegi, nu Yafia, 7 nu Elisama, nu Beliada, nu Elifeleti. Bukindi bwa Davidi ku baFilistini.
8 Gongule baFilistini buno Davidi abongibwa mwambo kuba mukota wa baIsraeli bansania, baFilistini bansania babakamine kulonda Davidi. Gongule Davidi kubo, endile kubakulumania. 9 BaFilistini bavule kukata ntiko za bantu babezaga ku kibitabita kya Refaimu. 10 Davidi abuzizie Kalaga, atendile bunee: “Ndi nende kwitana na baFilistini? Ndi wabakasane mu maboko mane?” Nu Yehowa amubwide bunee: “Bakama, nabakasane mu maboko mobe.”
11 Babakamine ku Baali-Perazimu nu Davidi abeitile gago. Davidi atendile bunee: “Kalaga eitile beiti bane mu maboko mane anga kusaguka kwa bimpumi bya mazi.” BaIsraeli beinikile kiziki kikyo Baali-Perazimu. 12 BaFilistini basigile tulaga twabo gago. Davidi akakizizie mulembe nu twagisizibwe na keiya.
13 Nu baFilistini bakatile lingo ntiko mu kibitabita. 14 Nu Davidi abuzizie lingo Kalaga; nu Kalaga amwakwide bunee: “Ntubasolobokele ku meiso lwabusio lwabo, tondo batimbukile ku lulenge lwa miti za miforosadi. 15 Nu gagungwe ku nkindo za bakoloboyo ku ntonga za miti za miforosadi, ububo wabase kwitana kubuno Kalaga eli lwabusio lwobe kwita iyombo lya baFilistini.” 16 Davidi akitile anga bwamukakizizie Kalaga; beitile iyombo lya baFilistini kutukila Gideoni aaba nu ku mwaga wa Gezeri. 17 Lukumu lwa Davidi lwabasile ku kisi kinsania; nu Yehowa alusizie boba ku bilongo binsania.