Davidi enda kutola Sanduku z'Idagano.
13
1 Nu Davidi akalile lwango na basondelezia ba kanunu nu ba lukama, aba nu na basondelezia bansania. 2 Davidi abwide musanganano unsania wa Israeli bunee: “Ndi busoga kumuli nu ndi bukutuka ku Yehowa, Kalaga weitu, tusinge migenzi biziki binsania byasigede ku mibuto zeitu mu kisi kya baIsraeli nu basankoga baLawi gamozi nabo, nu ku miino kuli tulula twabo, buno bakundamane na beiswe; 3 nu tutole lingo Sanduku z'Idagano za Kalaga weitu, kubuno twazisigile ku bindi bya Saulo.” 4 Musanganano unsania watendile buno, tukite bubo; kubuno kitondo kyabezaga kisoga ku meiso ma bantu bansania. 5 Ububo Davidi akundamanizie baIsraeli, kutukila ku Sihori wa Misri nu ku mwaga wa Hamati, kulusia Sanduku za Kalaga, kutuka ku Kiriati-Yearimu. 6 Davidi nu baIsraeli bansania babakamine ku Bala, u Kiriati-Yearimu guli wa Yuda, kutola Sanduku za Kalaga Yehowa, ukwikalaga gantata ga makerubi, zikumanwa ku izina lyage. 7 Bekile Sanduku za Kalaga mu kayanga kato kabalusizie ku numba za Abinadabu: Uza nu Ahio benzizie kayanga. 8 Davidi nu baIsraeli baminine lwabusio lwa Kalaga na magala, na nimbo, bindanda, ngoma, nzenze, mankimbi, bapili nu myonze. 9 Gababasile ku mulungu wa kupepa mbuto wa Kidoni, Uza alambizie kuboko kukokomezia sanduku, kubuno ngombe zakikitenwe. 10 Bongoa bwa Yehowa bwabede ku Uza, kubuno alambizie kuboko kwage ku Sanduku za Kalaga; nu amulibwide nu akule gago lwabusio lwa Kalaga. 11 Nu Davidi abede na kabebe kubuno Yehowa eitile Uza; amanine kiziki kikyo Perezi-Uza aaba nu lelo. 12 Busi bubo Davidi akule Kalaga boba. Atendile bunee: “Buni bunabasa Sanduku za Kalaga kwane?” 13 Ububo Davidi ntekile lingo Sanduku za Kalaga ku mwino wage, tondo azekile ku numba za Obedi-Edomu wa ku Giti. 14 Sanduku za Kalaga zasigede gamozi na kikanga kya Obedi-Edomu myezi isatu mu numba zage. Nu Yehowa amukasile mponga nu binsania byabezaga nabyo.