Bantu batangi babaside Davidi ku Ziklagi.
12
1 Nu babano u bantu bavule ku Davidi ku Ziklagi gabezaga Davidi eibisa ku kabamba ka Saulo, mwana wa Kisi. Babezaga bamozi ku mapuka bamukasagia mu nkungu za bita. 2 Babezaga ndasa, bamenyine kwisa nkumbi nu misungu na kuboko kwa seidume nu kwa seikazi. Babezaga baBenjamina nu mibuto za Saulo. 3 Musondelezia wabo abezaga Ahiezeri, wa babili Yoasi, bana ba Sema wa ku Gibea; Yezieli, nu Peleti, bana ba Azimaweti; nu Beraka nu Yehu wa ku Anatoti. 4 Nu Isimaya wa ku Gibeoni, ipuka munkatini mwa makumi masatu, nu abezaga musondelezia wa makumi masatu, nu Yeremia, nu Yahazieli, nu Yohanani, nu Yozabadi wa ku Gedera. 5 Elizai nu Yerimoti; nu Bealia, nu Semaria, nu Sefatia wa ku Harufi. 6 Elkana nu Isia, nu Azareli, nu Yoezeri, nu Yasobeamu babezaga baKora, 7 nu Yoela, nu Zebadia, bana ba Yerohamu wa ku Gedori; 8 nu mapuka mamozi ma baGadi bendile ku Davidi ku kiziki kyalanga kya mu kalula, mapuka magomia bita, beli na ngabo nu masumo, bakali anga kimbwe nu basasia anga mibale gantata ga miduko. 9 Ezeri musondelezia wabo, Obadia wa babili, Eliabu wa basatu, 10 Misimana wa banazi, Yeremia wa batano, 11 Atai wa mutuba, Elieli wa mutubakamo, 12 Yohanani wa kinana, Elizabadi wa mubula, 13 Yeremia w'ikumi, Makibanai w'ikumi nu umozi. 14 Babano u baGadi babezaga basondelezia b'iyombo; mukeke mubo abezaga na lukama nu munene na kanunu (1.000). 15 Babano u basokile Yordani ku mwezi mutangi, nkungu za mwiyalo wa luuzi, nu batinizie bansania beikalaga mu bibitabita ku lulenge lwa kuntata nu lwa kunsi. 16 Bavwilide bamozi baBenjamina nu baYuda bavule ku Davidi ku kiziki kyalanga. 17 Davidi endile kubasekela nu ababwide bunee: “Ndi mwavwa na bubobelelo nu kunkasia, nti mutima wane wabogeboge n'inyu, tondo ndi mwavwa kunengelela ku kabamba ka beiti bane, nu takuli bwagi mu maboko mane, Kalaga wa batateiswe alole kitondo kikino nu kwatula.” 18 Muuza wavwilide Amasai, mukota wa makumi masatu, mu nkungu zezo nu atendile bunee: “Tuli bobe, ee Davidi, nu gamozi nobe, ee, mwana wa Yese; bubobelelo, bubobelelo kuguli nu ku bakasia bobe kubuno Kalaga wobe akukasia.” Kumbusa Davidi abasekede, ababikile bakota ku kibombo na kibombo ky'iyombo lyage. 19 BaManase bamozi batinine ku Davidi geendile na baFilistini kwitana na Saulo tondo ntabakasizie kubuno bakota ba baFilistini bakalile lwango, bamupumbizie, batendile bunee: “Anakivwa kutwita nu kutinina ku mukota wage Saulo;” 20 nkungu zabezaga akwenda ku Ziklagi, baManase bamubaside, Adina nu Yozabadi, nu Yediaeli nu Mikaeli, nu Yozabadi, nu Elihu, nu Siletayi, nawe musondelezia wa kanunu (1.000) ka baManase. 21 Bakasizie Davidi ku kibombo kya banyagi kubuno bansania babezaga mapuka nu basondelezia mu iyombo. 22 Ububo busi na busi, bantu bavwaga kukasia Davidi aba nu gabede iyombo inene, anga iyombo lya Kalaga. 23 Mamano u maganzo ma bantu ba bita bavule ku Davidi ku Hebroni, kugalukya bukota bwa Saulo kweli anga bwabezaga iyuki lya Yehowa. 24 Bamulume ba Yuda bekaga ngabo nu masumo, babezaga tununu mutuba nu nkama kinana (6.800) beiya ngabo. 25 Bantu ba Simeoni babezaga mapuka ma bita tununu mutubakamo nu lukama lumozi (7.100). 26 BaLawi babezaga tununu tunazi nu nkama mutuba (4.600), 27 kuganza Yehoyada u nkangala za numba za Haruni, gamozi na bantu tununu tusatu nu nkama mutubakamo (3.700), 28 nu Zadoki, musikila wa magala nu ipuka gamozi na ba numba z'isi makumi mabili nu babili. 29 Nu bantu ba Benjamina mibuto za Saulo, tununu tusatu (3.000), kubuno aaba nu ku nkungu zezo beingi kubeli basigede begamina ku Saulo. 30 Bantu ba Efuraimu, tununu makumi mabili nu nkama kinana (20.800), mapuka, bantu ba lukumu anga numba za beisibo. 31 Nu kyindi kya kikanga kya Manase tununu ikumi nu kinana (18.000) basombwedwe mu meina, kwenda kubika Davidi mukota. 32 Bana ba Isakari, bantu ba menge makumenya nkiko, kumenya bunakita baIsraeli; basondelezia babo babezaga nkama ibili, nu mibuto zabo insania zabezaga kunsi kw'ikakizio lyabo. 33 BaZebuluni babezaga iyombo lya kwenda ku bita na nkita insania za ngabo tununu makumi matano (50.000), kayikayika ku bita na mutima wa ngini, nu tababezaga na mutima wa kuzangazanga. 34 BaNafutali, kanunu (1.000) ka basondelezia, nu babezaga tununu makumi masatu nu mutubakamo (37.000) bendile na ngabo nu masumo mabo. 35 Nu baDani babezaga kayikayika ku bita tununu makumi mabili nu kinana nu nkama mutuba (28.600). 36 Nu baAseri babo bavwamine kutuka ku iyombo kuba kayikayika ku bita, tununu makumi manazi (40.000). 37 Kutukila lisilya lya Yordani, baRubeni, baGadi nu kyindi kya kikanga kya Manase, bamulume tununu lukama nu makumi mabili (120.000) babezaga na nkita insania za ngabo. 38 Babano bantu bansania bavwalile nsulu za bukoloboyo nu bendile ku Davidi na mutima umozi kumubika mukota ku Hebroni, nu babo bango basigede, babezaga na mutima umozi na babo bendile ku Davidi. 39 Nu babede gago bindi bisatu, kulia nu kunua, kubuno mibuto zabo zabalongekede idia. 40 Lingo, babo babezaga bwigi kubasa ku Isakari, Zebuluni, nu Nafutali, bavule n'idia gantata ga mpunda, ngamia, farasi nu ngombe nu nyama nu tumpampa tuli na nse, nu biguma nu maku, makiti, ngombe, nu mikoko mingi nunse kubuno kwabezaga mbogimbogi mu Israeli.