Davidi abongibwa mwambo kuba mukota
11
1 Kumbusa baIsraeli bansania bakundamenne ku Davidi ku Hebroni, batendile bunee: “Beiswe tuli makwa mobe, nu misuna zobe. 2 Aba wakalazi, gabezaga Saulo mukota, uwe u wasondelezagia nu kulusia baIsraeli. Yehowa akubwide bunee: ‘Uwe wasondelezie bantu bane baIsraeli, nu wabe mwangati wa bantu bane baIsraeli.’” 3 Ububo bakulu bansania ba Israeli babaside mukota ku Hebroni, nu Davidi akitile nabo idagano lwabusio lwa Yehowa. Nu bo babongezie Davidi mwambo kuba mukota wa Israeli, anga iyuki lya Yehowa, lyatendilwe na Samweli. 4 Kumbusa, Davidi nu baIsraeli bansania bendile ku Yerusalema, u Yebusi: kuko kwabezaga baYebusi beikalaga mu kisi. 5 Davidi nu baIsraeli bansania bendile ku Yerusalema, u Yebusi. Beiya Yebusi beikalaga mumo babwide Davidi bunee: “Ntwingile muno.” Tondo Davidi akatile mukolo wa Sayuni, u mwino wa Davidi. 6 Davidi atendile bunee: “Wozo walingage kukinda ba Yebusi abe mukota nu mwangati w'iyombo.” Nu Yoabu mwana wa Zeruya alingile kubakama, nu wozo abede mukota. 7 Nu Davidi eikede mu mukolo, ukinsa wamaninwe mwino wa Davidi. 8 Nu obakile mwino unsania muntungo kutukila ku Milo nu ku ndenge insania; nu Yoabu alongekile kyindi kyasigede. 9 Nu Davidi itide nunse kuba munene kubuno Yehowa Mwiya Mayombo abezaga gamozi nage.
Mapuka ma Davidi.
10 Babano u basondelezia ba mapuka bakitaga na Davidi kumukasia gamozi na baIsraeli bansania mu bukota bwage, buno bamubike mukota anga bwatendile iyuki lya Yehowa ku baIsraeli. 11 Nu mamano u mapuka mabezaga na Davidi anga buli maganzo mabo: Yasobeamu, mwana wa Hakemoni, mukota wa bakoloboyo makumi masatu; asumitile bakoloboyo nkama isatu n'isumo lyage, nu eitile bansania gamozi. 12 Nu kumbusa kwage mu mamo mapuka masatu, kwabezaga Eleazari, mwana wa Dodo, muAhoa. 13 Nu abezaga gamozi na Davidi kuko ku Pasi-Damimu, kiziki kyakundamanine baFilistini ku bita, kwabezaga isoa liyala na shayiri nu bantu batinine baFilistini kuko. 14 Bemenne munkatini mw'isoa kulisungila nu bakindile baFilistini. Nu Yehowa abakitide lonio lunene. 15 Basatu ku mamo mapuka makumi masatu bagelile ku lwanda lwabezaga ku Davidi mu kalimba ka Adulamu; nu iyombo lya baFilistini liyombekile ido mu kibitabita kya Refaimu. 16 Nu mu nkungu zezo Davidi abezaga mu kiziki kyalanga kya mukolo, nu iyombo lya baFilistini lyabezaga ku Betelehemu ku nkungu zezo. 17 Davidi abede na nkasa nu atendile bunee: “Songo ninanua ku mazi ma kanuabalongo kili ku isula lya Betelehemu.” 18 Ububo babo bantu basatu batingile munkatini mu ido lya baFilistini nu batagile mazi ma kanuabalongo keli bwigi na Betelehemu. Bavule namo nu bamakasenne ku Davidi tondo Davidi ntazigile kumanua; amasandide lwabusio lwa Yehowa. 19 Atendile bunee: “Kalaga andange kutakita bubo, ninue mikila za bantu babano babikile tulamo twabo mu lukuo. Kubuno bavwa namo ku kabamba ka lukuo lwabo.” Ku bubo, ntazigile kumanua. Bubuno u bwakitile mamo mapuka masatu.
20 Abisayi, muto wa Yoabu, abezaga munene mu babo basatu. Asumitile n'isumo lyage bantu nkama isatu, abeitile nu izina lyage lyalumbile mu babo basatu. 21 Abezaga mutundwa mu mpilili z'ibili nu abede mukota wabo, tondo ntagelamine na babo basatu batangi. 22 Benaya, mwana wa Yehoyada, mwana w'ipuka lya ku Kabuseli, abezaga na makitilo manene, eitile mapuka mabili ba Moabu, lingo, agelile nu kwita kimbwe mu muzinga mu nkungu za mpego nkali anga lubula. 23 Nu eitile muMisri, muntu mulazi, nu bulazi bwage mabusu matano nu kyindi, nu wozo muMisri akatile isumo mu kuboko kwage. Mwiya w'isumo lyage wabezaga munene anga nkingi za muluki wa nsulu; tondo wozo endile kweli na kati nu atikizye isumo lyabezaga mu kuboko kwa muMisri nu amwitile nalyo. 24 Nu bibino u bitondo byakitile Benaya, mwana wa Yehoyada, nu izina lyage lyalumbile mu babo basatu. 25 Abezaga na luganuno kutinga babo makumi masatu, tondo ntagelamine na babo basatu batangi; nu Davidi amubikile gantata ga balangi bage.
26 Mapuka m'iyombo mabezaga Asaheli mubuto wa Yoabu, Elihanani mwana wa Dodo wa Betelehemu. 27 Samoti muHarori, Helesi muPeloni; 28 Ira mwana wa Ikesi, muTekoa; Abiezeri muAnatoti; 29 Sibekayi muHusa; Ilai muAhoa; 30 Maharai muNetofati, Heledi mwana wa Bana muNetofati; 31 Itai mwana wa Ribai wa Gibea wa bana ba Benjamina; Benaya muPiratoni, 32 Hurai wa nuuzi za Gasi, Abieli muArabati; 33 Azimaweti muBaharumu; Eliaba muSalaboni; 34 bana ba Hasemu muGizoni; Yonatani mwana wa Sage muHarari. 35 Ahiyamu mwana wa Sakari muHarari; Elifali mwana wa Uri; 36 Heferi muMekerati; Ahiya muPeloni. 37 Hesero muKarmeli; Naarai mwana wa Esibai; 38 Yoeli mubuto wa Natana; Mibuhari mwana wa Hagiri; 39 Zeleki muAmoni; Naharai muBeroti mweki wa ngabo za Yoabu mwana wa Zeruya; 40 Ira muItiri; Garebu muItiri; 41 Uria muHiti, Zabadi mwana wa Alai. 42 Adina mwana wa Siza muRubeni, munene wa baRubeni, nu makumi masatu gamozi nage; 43 Hanani mwana wa Maka nu Yosafati muMitini; 44 Uzia muAsterati, Sama nu Yeieli bana ba Hotamu muAroeri; 45 Yediaeli mwana wa Simuri; nu Yoha mubuto wage, muTisi; 46 Elieli muMahawi, nu Yeribai, nu Yosawia, bana ba Elenama, nu Itima muMoabu. 47 Elieli, nu Obedi, nu Yasieli muMezoba.