Lukuo lwa Saulo.
10
1 BaFilistini beitenne na baIsraeli, nu baIsraeli batinine lwabusio lwa baFilistini, nu bakule mu mwiduko wa Gilboa. 2 Nu baFilistini bayangile Saulo nu bana bage; beitile Yonatana nu Malki-Sua, bana ba Saulo. 3 Bita byabezaga bikali ku Saulo, nu ndasa za misungu zamusumitile, nu ababedwe. 4 Saulo abwide mweki wage wa ngabo bunee: “Kata mwene wobe unsumite, babano batamonesibwa banavwa kunililika.” Tondo wozo mweki wa ngabo zage ntazigile, kubuno akule boba nunse. Ububo Saulo atolile bupanga bwage nu agwelide kubo. 5 Nu wozo mweki wa ngabo za Saulo, gaamonine buno Saulo akua, agwelide nu we ku bupanga bwage nu akule. 6 Ububo Saulo akule, nu bana bage basatu nu bansania ba numba zage bakule gamozi nage. 7 Nu gamonine baIsraeli beikalaga mu kibitabita buno batina, nu buno Saulo nu bana bage bakua, basigile miino zabo nu batinine nu bo, nu baFilistini bavule kwikala muzo. 8 Gakede busi, baFilistini bavule kukata ntiko za babo bakule; basangile Saulo nu bana bage bagoa gantata mwiduko wa Gilboa. 9 Bamutikizye nsulu nu ngabo zage nu kumusesa itoe, nu basingile bantu ku ndenge insania za kisi kya baFilistini kusambala musagu musoga ku nkisi zabo nu ku bantu. 10 Babikile ngabo zage mu numba za tulaga twabo, nu bakandile itoe lyage mu numba za Dagoni. 11 Nu gongule baYabesi-Gileadi ku binsania byakitide baFilistini ku Saulo, 12 mapuka mansania mazanzukile nu batolile mubili wa Saulo nu mibili za bana bage, bavule nazo ku Yabesi; bayikile makwa mabo gansina muti wa mwalo kuko ku Yabesi, nu bagilile idia bindi mutubakamo. 13 Ububo Saulo akule mu kutakatizia Yehowa, kubuno ntanzile moki mage; lingo atundile kubuzia lwango ku bagila. 14 Nu ntalondile kusondelezibwa na Yehowa, ku kabamba kako amwitile, nu kugalukya bukota ku Davidi mwana wa Yese.