Isoa lya Naboti
21
1 Ku bindi bibino, Naboti wa ku Yezereheli abezaga n'isoa lya mizabibu mu Yezereheli bwigi na numba za Ahabu, mukota wa Samaria. 2 Ahabu atendile na Naboti bunee: “Nkase isoa lyobe lya mizigi za biguma nilikite isoa lyane lya bitogo kubuno lili bwigi na numba zane. Nne nakukase kingo kiziki kisoga kutinga, aba ndi ukutunda bikulo bigezye na bukunza nti nakukase byo.” 3 Tondo Naboti abwide Ahabu bunee: “Yehowa anzugile ndi nakukasa bwiyani bwa batatane.” 4 Nu Ahabu endile na kabebe nu bongoa ku numba zage ku kabamba ka kitondo kyamutendile Naboti wa ku Yezereheli bunee: ‘‘Nsyakukase bwiyani bwa batatane.” Eiyombekile ga mugu wage. Agalukide ku kitutu nu asombile kulia. 5 Tondo Yezebeli, mukazi wage avule kweli. Amubuzizie bunee: “Kubuni uli na kabebe nu kusomba kulia?”
6 Amwakwide bunee: “Nabuzizie Naboti wa ku Yezereheli bunee: ‘Nkase isoa lya biguma ku feza aba ndi watunda, nakukase lingo isoa lya biguma ga kiziki kyalyo.’ Tondo anakwide bunee: ‘Nsyakukase isoa lyane lya biguma.’”
7 Ububo Yezebeli mukazi wage amubwide bunee: “Lebelebe ndi uli mwangati musoga wa Israeli, ulie nu mutima wobe ubogeboge. Nakukase isoa lya biguma lya Naboti muYezereheli.”
8 Asanzile mikanda mu izina lya Ahabu nu azibikile kamenyikilo kage. Azisingile ku bakulu nu ku bakota babezaga gamozi na Naboti mu mwino. 9 Asanzile mu mikanda zeno bunee: “Kakiziazi bantu busi bwa kwikanda idia. Bikazi Naboti lwabusio lwa bantu. 10 Nu bikazi bantu babili butunganana nage buno banamusongela nu kumulongekela buza bunee: ‘Walinga Kalaga nu mukota.’ Kusila, mwekazi kumbuga nu kumulibula makozi buno akue.”
11 Nu bakulu nu bakota beikalaga na Naboti mu mwino bakitile anga bwakakizizie Yezebeli mu mikanda zaasingaga. 12 Bakakizizie busi bwa kutalia nu babikile Naboti lwabusio lwa bantu. 13 Bantu babili bemenne lwabusio lwage nu balongekede Naboti lwabusio lwa bantu; batendile bunee: “Naboti alinga Kalaga nu mukota.” Ububo bamwekile ku isula lya mwino nu bamulibwide makozi aaba nu akua. 14 Kumbusa basingile musagu ku Yezebeli buno Naboti alibulwa makozi nu akule. 15 Gongule Yezebeli buno Naboti alibulwa makozi nu akua, abwide Ahabu bunee: “Zanzuka, tola isoa lya biguma lya Naboti muYezereheli lyasombaga kukukasa ku bikulo, kubuno Naboti akua.”
16 Gongule Ahabu buno Naboti akua, endile ku isoa lya biguma lya Naboti buno alikate.
Elia akulolesia mibi zabasile Ahabu
17 Nu iyuki lya Yehowa lyabaside Elia muTisibe bunee: 18 “Kulumana na Ahabu mukota wa baIsraeli ukwikalaga ku Samaria. Eli mu isoa lya biguma lya Naboti. Endile kulitola. 19 Mubule bunee: ‘Yehowa akutenda bunee: “Wasila kwita muntu nu kano kaluma watola byage?”’ Nu wamutenda bunee: ‘Bubuno u bwatenda Yehowa: Mu kiziki kyalamba mboa mikila za Naboti, gago u galambe mboa mikila zobe.’”
20 Ahabu akwide Elia bunee: “Uwe mwiti wane, ndi wammonako?” Amwakwide bunee: “Ee nakumonako, kubuno wakitile bubi nu bubo buwakitile tabwatananizizie Yehowa. 21 ‘Lola, nkulusia bubi kuguli. Nazikye kibuti kinsania nu nakwise bulazi, bamulume bansania ba kikanga kya Ahabu ndi bakandwa aba bakandulwa mu baIsraeli. 22 Nakite numba zobe anga numba za Yeroboamu, mwana wa Nebati, nu anga numba za Basha, mwana wa Ahiya, ku kabamba ka kunongia nu kwagia baIsraeli.’ 23 Nu ku musagu wa Yezebeli, Yehowa atendile bunee: ‘Mboa zalie Yezebeli bwigi na mukolo munene wa Yezereheli.’ 24 Wozo wa numba za Ahabu wakue mu mwino nti alibwa na mboa, nu wozo wakue mu masoa, alibwe na tuzoni twa mpelela.” 25 Tondo takubezaga muntu wikunzizie wenyene kukita bubi ku meiso ma Yehowa, anga Ahabu, wasindikilwe na mukazi wage Yezebeli. 26 Akitile bubi nunsania kuyanga nkisi anga bwakitaga baAmori, batukizibwe na Yehowa lwabusio lwa baIsraeli. 27 Gongule Ahabu ku moki ma Elia, atile nsulu zage. Avwalile ikunino nu ntalide. Eiyombekile na lilyo ikunino nu endile bukebuke. 28 Nu iyuki lya Yehowa lyabaside Elia muTisibe bunee: 29 “Ndi wamona ku lukita lwa Ahabu bwibotya lwabusio lwane? Kubuno eibotya lwabusio lwane, nsyalusie lingo bubi mu bindi byage, tondo mu bindi bya mwana wage.”