Ahabu akinda baAramu
20
1 Beni-Hadadi mukota wa Aramu akundamanizie iyombo linsania. Kwabezaga bangati makumi masatu nu babili gamozi nage nu farasi zabo nu tuyanga. Abakamine nu asolobokede Samaria nu agukatile. 2 Asingile migenzi mu mwino, kuli Ahabu mukota wa baIsraeli, amubwide bunee: “Bubuno u bwatenda Beni-Hadadi, 3 ‘Feza zobe nu olo zobe zili zane nu bakikulu bobe nu bana bobe beli mbangilwa beli bane.’” 4 Mukota wa baIsraeli amwakwide bunee: “Mukota wane, bubo buwatenda buligo. Nili wobe nu binsania binili nabyo.” 5 Migenzi zavule lingo kutenda bunee: “Bubuno u bwatenda Beni-Hadadi bunee: ‘Lebelebe nakusingide musagu buno wankase feza nu olo zobe nu bakikulu bobe nu bana bobe. 6 Lubi anga mu nkungu zeno nasinge bakiti bane kwobe buno balonde mu numba zobe nu numba za bakiti bobe, nu binsania bikubatananizia babikate nu kubyeka.’”
7 Nu mukota wa baIsraeli amanine bakulu bage bansania, ababwide bunee: “Ntukumona wozo muntu akulonda nsake. Asingile kundi buno atole bakikulu bane, nu feza zane, nu olo zane, nu nne nsyamusombile.”
8 Nu bakulu bansania nu bantu bansania bamubwide bunee: “Ntumungwilile aba ntwitabizie.”
9 Ububo abwide basingwa ba Beni-Hadadi bunee: “Mubule mukota wane mwangati bunee: ‘Nakite kitondo kiwambuzizie limbizi litangi, tondo kitondo kikino nsyavwame kukikita.’” Basingwa basubizie lingo kusambalila mukota wabo musagu wozo. 10 Nu Beni-Hadadi amusingide musagu lingo. Atendile bunee: “Tulaga tunkitile nu kwitilila, ndi takuli mukungu mu Samaria wakuka ku muntu na muntu ukunyanga buno anavwama kusongya ikasa limozi.”
11 Mukota wa baIsraeli amwakwide bunee: “Mutendazi bunee: ‘Wozo ukwikanda ngabo zage nteiganune anga wozo ukuzitikya.’”
12 Gongule Beni-Hadadi musagu wono, abezaga akunua gamozi na bakota ga nusu. Abwide bakiti bage bunee: “Mwidongeke kayikayika.” Nu beidongekile kwitania mwino. 13 Nu lola, mulengania umozi avule ku Ahabu, mukota wa Israeli, nu atendile bunee: “Bubuno u bukutenda Yehowa bunee: ‘Ndi wamona ku musanganano wono unsania munene? Nkugubika lelo mu kuboko kwobe; nu wamenye buno nili Yehowa.’”
14 Ahabu abuzizie bunee: “Mu nazi?”
Akwide bunee: “Bubuno u bukutenda Yehowa bunee: ‘Mu beiyambali basondelezia ba bikanga.’”
Abuzizie bunee: “Nazi walinge bita?” Mulengania amwakwide bunee: “Uwe.” 15 Ububo Ahabu akundamanizie beiyambali basondelezia ba bikanga babezaga nkama ibili nu makumi masatu nu babili. Akundamanizie bango bantu bansania; babezaga tununu mutubakamo (7.000). 16 Batukile mu makuluka. Tondo Beni-Hadadi abezaga akunua nu kukatwa na maku ga nusu gamozi na bakota makumi masatu nu babili bamukasagia. 17 Nu beiyambali basondelezia ba bikanga bendile lwabusio. Beni-Hadadi asingile batitiki nu basambalide Beni-Hadadi bunee: “Bantu batuka ku Samaria.”
18 Atendile bunee: “Ndi batuka ku bubobelelo, bakatazi na kalamo, nu ndi batuka ku bita, bakatazi na kalamo.” 19 Gatukile babo beiyambali basondelezia ba bikanga mu mwino nu iyombo lyabo kumbusa, 20 nawe na walibwide wage muntu nu baAramu batinine. BaIsraeli babayangile, tondo Beni-Hadadi mukota wa Aramu eiyonezie na farasi gamozi na babo babakamaga ga farasi. 21 Mukota wa baIsraeli eitile farasi nu tuyanga. Alibwide baAramu nu kubeita bubibu.
22 Kumbusa mulengania avwilide mukota wa baIsraeli, amubwide bunee: “Enda, ba na magala, songolola nu kukengela buwakita, kubuno ku kulinga kwa mwaka, mukota wa baAramu abakame lingo kukwitania.”
Ahabu abakinda limbizi lya mabili
23 Bakiti ba mukota wa baAramu bamubwide bunee: “Tulaga twabo tuli tulaga twa miduko. Ububo beli na magala kututinga; tondo tubeitanie mu kibitabita tulole ndi tatwabe babibu kubatinga. 24 Kita bubuno: Tikya mukota na mukota ga kiziki kyage nu bika mapuka gabyo. 25 Idongekele iyombo anga lilyo lyakuziminne, farasi ku farasi nu kayanga ku kayanga, twitane nabo mu kibitabita nu lebelebe twabakinde.” Ongwilide makengelo mabo nu akitile bubo. 26 Mu kulinga kwa mwaka, Beni-Hadadi akundamanizie baAramu nu endile ku Afeki buno eitane na baIsraeli. 27 BaIsraeli bakundamenne. Bakasilwe idia nu bendile kukulumania baAramu. Babikile ido butunganana nabo kisusania kya bibombo bibili bikeke bya mpene tondo baAramu babezaga beizazia kisi.
28 Muntu wa Kalaga avule nu abwide mukota wa baIsraeli bunee: “Bubuno u bukutenda Yehowa: Kubuno baAramu batendile bunee: ‘Yehowa eli kalaga ka miduko, tondo nteli kalaga ka kibitabita,’ nakasane mayombo mamo manene mansania ku maboko mobe nu wamenye buno Nne nili Yehowa.”
29 Babikile ido mu biziki byabo kulindilana ku bindi mutuba kamo. Ku busi bwa kindi kya mutubakamo balingile bita. BaIsraeli beitile baAramu tununu lukama (100.000) bendaga na magulu mu busi bumozi. 30 Babo basigede batinine ku mwino wa Afeki. Nu kitutu kyagwelide bantu tununu makumi mabili nu mutubakamo (27.000) basigalaga. Beni-Hadadi atinine; eibisile mu mwino, mu busio bwitunda. 31 Bakiti bage bamubwide bunee: “Tungule buno bakota ba numba za Israeli beli bakota ba kyombo. Bwatunganana tuvwalazi makunino ku bibunda byeitu, nu muzigi ku matoe meitu nu kubasila mukota wa baIsraeli. Embe anakusiga na kalamo.” 32 Bavwalile makunino ku bibunda nu mizigi ku matoe mabo. Babaside mukota wa baIsraeli. Batendile bunee: “Mukiti wobe Beni-Hadadi atenda bunee: ‘Nakusega nsige na kalamo.’”
Abuzizie bunee: “Ndi eikili na kalamo aaba kano kaluma? Eli mubuto wane.” 33 Babo bantu bamonine buno makengelo mage mabezaga masoga. Basasizie kumwakula bunee: “Ee, Beni-Hadadi eli mubuto wobe.”
Nu abwide bunee: “Endazi nu mumvwile nage.” Beni-Hadadi abasile kweli, nu amwingizizie mu kayanga.
34 Beni-Hadadi amubwide bunee: “Nkukusubizia miino zanyagaga tatane ku so nu wabike biziki bya kukunzia matubulo ma kisi kyobe mu Damasiki anga bwakitile tatane mu Samaria.”
Ahabu atendile bunee: “Nakusige wende mu idagano.” Bakitile idagano nage nu amusigile kwenda.
Mulengania akwana Ahabu
35 Iyuki lya Yehowa lyavule ku mwana umozi wa bana ba balengania. Abwide munyage bunee: “Ndibule, nkukusega.” Tondo wozo muntu asombile kumulibula. 36 Amubwide bunee: “Kubuno ntwitabizia iyuki lya Yehowa, lola, gokutuka gano nti kimbwe kyakwita.” Nu kazanga kongo gaatukile kweli, kimbwe kyamumonine nu kyamwitile.
37 Kumbusa amonine ku ungo muntu, amutendile bunee: “Ndibule nkukusega.” Wozo muntu amulibwide nu kumusumita kyulu. 38 Wozo mulengania endile nu alindide mukota mu nzila. Eigalukizye kilungi mu kwikanda nsulu ku meiso. 39 Gatingile mukota, amulalukide bunee: “Mukiti wobe endile ku bita nu muntu umozi angalukide, nu amvwilide na muntu. Ambwide bunee: ‘Langa muntu wono. Ndi azimina mu nzila, nti kalamo kobe kaba ku kalamo kage, aba walige talanta emozi za feza.’ 40 Gakitile mukiti wobe kuko nu kuko, wozo muntu endile.”
Nu mukota wa baIsraeli amubwide bunee: “Lulo u lusungio lwobe, wisungia uwenyene.”
41 Wozo mulengania atikizye nsulu lubilo ku meiso mage nu mukota wa baIsraeli amumenyine buno eli umozi wa balengania. 42 Ububo abwide mukota bunee: “Yehowa atenda bunee: ‘Kubuno wasiga muntu u nabikile ku maboko mobe buno eitwe, ububo kalamo kobe kabe ku kalamo kage nu bantu bobe ku bantu bage.’”
43 Nu mukota wa baIsraeli endile na mutima wina nu na bongoa ku numba nnene zage nu abasile ku Samaria.