Elia atina Yezebeli
19
1 Ahabu asambalide Yezebeli binsania byakitile Elia, buni bweitile balengania ba Baali na mwene wa nganda. 2 Nu Yezebeli asingile mugenzi kuli Elia kumubula bunee: “Tulaga tunkitile bubuno bubi, ndi lubi mu nkungu anga zeno nsyakwite anga buwabeitile.” 3 Gongule ku bubo, Elia azanzukile nu atinine konia kalamo kage. Abasile ku Beri-Seba wa Yuda nu asigile mukiti wage kuko. 4 Tondo we wenyene endile mu kalula musi umozi. Avule nu eikede gansina muti wa muretemu nu asegile lukuo: atendile bunee: “Ee Yehowa, bwakuka, kano kaluma tola mutima wane, kubuno nsili musoga kutinga batatane.”
5 Nu eiyombekile tulo gansina muti nu kitangalabesi mwanzelo eitubizie kweli, amubwide bunee: “Yuka, ulie.” 6 Alolile nu kwabezaga kampampa bwigi n'itoe lyage, kayikilwe ga makozi makuzuza, nu idega lya mazi. Alile nu anune nu eiyombekile lingo.
7 Nu wozo mwanzelo wa Yehowa avule limbizi lya mabili. Eitubizie kweli nu atendile bunee: “Yuka, ulie; kubuno lugendo luli lulazi nunse kuguli.” 8 Emanukile nu alide nu anune nu endile na magala ma lilyo idia bindi makumi manazi, musi nu kindi aaba nu kubasa ku mwiduko wa Kalaga ku Horebu. 9 Nu eingide mu kalimba gago; nu kitangalabesi iyuki lya Yehowa lyamubaside nu lyamubuzizie bunee: “Elia, ukukita kikizi gano?”
10 Akwide bunee: “Nili na lugi lukali nunse ku kabamba ka Yehowa, Kalaga Mwiya Mayombo, kubuno baIsraeli basiga malagano mobe, basambula tusenga twa tuyulo twobe nu kwita balengania bobe na mwene wa nganda. Nu nne u wasigede nnenyene, nu bo bakulonda kalamo kane buno bakatikye.”
11 Yehowa abwide bunee: “Tuka, wemane ku mwiduko lwabusio lwa Yehowa.” Nu lola, Yehowa atingile lwabusio lwage, nu lumpumpu lunene nu lukali lwatile miduko nu lwabungwide nanda byindibyindi, tondo Yehowa ntabezaga mulo. Nu kumbusa kwa lumpumpu kwabezaga kaningini ka kisi, tondo Yehowa ntabezaga muko. 12 Kumbusa kwa kaningini kwabezaga keiya, tondo Yehowa ntabezaga muko. Kumbusa kwa keiya kwabezaga iyuki lyabota nu likeke. 13 Gongule kulyo, Elia eikukide na nsulu zage ku meiso. Atukile nu emenne ga mwingilo wa kalimba. Iyuki lyamubaside kubuzia bunee: “Elia, ukukita kikizi gano?”
14 Amwakwide bunee: “Nili na lugi ku kabamba ka Yehowa, Kalaga Mwiya Mayombo; kubuno baIsraeli basigile idagano lyobe nu basambwide tusenga twa tuyulo twobe nu kwita balengania bobe na mwene wa nganda. Nu nne nasigala nnenyene, nu bo bakulonda kunita.”
15 Nu Yehowa amubwide bunee: “Subya mu nzila zobe za ku kalula ka Damasiki. Gawabase, wabongie Hazaeli mwambo buno abe mukota wa Aramu. 16 Wabongie Yehu, mwana wa Nimusi, mwambo nu we, buno abe mukota wa baIsraeli; nu wabongie Elisa, mwana wa Safati, wa Abeli-Mehola, mwambo buno abe mulengania mu kiziki kyobe. 17 Nu kwabe buno wozo wiyonie na mwene wa Hazaeli, Yehu amwite; nu wozo wiyonie na mwene wa Yehu, Elisa nti amwite. 18 Tondo nasige mu Israeli, bantu tununu mutubakamo (7.000) batakumbile mazu mabo lwabusio lwa Baali nu kanua katamumumine.”
Elisa ayangile Elia
19 Kumbusa Elia atukile gago, asangile Elisa, mwana wa Safati, wabezaga akumba bilongo mu isoa lyage na bibombo bya ngombe ikumi nu bibili nu we abezaga gamozi na kikyo ky'ikumi nu bibili. Elia asigelede kweli nu amwisile nsulu zage. 20 Kazanga kongo asigile ngombe zage kuyanga Elia lubilo nu abwide bunee: “Nsige, nimume ku matama ma tatane nu ma mmane,
+ \fr 19:20 \ft U lukita lwabo lwa kulagana na mibuto zabo. nu nakuyange.”