Elia nu Obadia
18
1 Kumbusa kwa bindi bingi, mu mwaka w'isatu, iyuki lya Yehowa lyabaside Elia kutenda bunee: “Enda widolesie ku Ahabu, nalokye mbula mu kisi.” 2 Nu Elia endile kwidolesia ku Ahabu. Nu nzala zabezaga nkali mu Samaria. 3 Nu Ahabu amanine Obadia, mukota wa numba zage. Nu Obadia akuaga Yehowa boba nunse. 4 Geitaga Yezebeli balengania ba Yehowa, Obadia atolile balengania lukama lumozi. Ababisile mu tulimba tubili, makumi matano mu kalimba na kalimba, mwabalisagia tumpampa nu kubanusia mazi. 5 Ahabu abwide Obadia bunee: “Enda mu kisi ku tunuabalongo tunsania nu ku nuuzi insania; embe kunamoneka nsamba za konia farasi nu nyumbu buno tatuziminwe na nyama insania.” 6 Babeganizie kisi nu batingile mu kisi kinsania, Ahabu endile mu nzila emozi nu Obadia endile mu zengo nzila. 7 Gabezaga Obadia mu nzila, Elia akulumenne nage. Obadia, gaamumenyine, agwede bukukama nu atendile bunee: “Ndi uwe u mukota wane Elia?” 8 Amwakwide bunee: “U nne wono. Enda kubula mukota wobe bunee: ‘Lola Elia eli gano.’”
9 Amubuzizie bunee: “Mibi nkizi zinakitile buno ukasane mukiti wobe mu maboko ma Ahabu buno anite? 10 Lebelebe anga bukulamaga Yehowa, Kalaga wobe, takuli kilongo aaba kisi kitasingile mukota wane bantu kukulonda. Nu ndi batenda buno ntuli ko, nti alumbizia bubo bukota nu kikyo kilongo buno tabakumonine ko. 11 Su, kano kaluma ukuntenda bunee: ‘Enda kubula mukota wobe bunee: “Lola, Elia eli gano.”’ 12 Kungwa nakusiga, Muuza wa Yehowa wakweke ku kiziki kinsizi, nu nende kusambalila Ahabu musagu, nu we ntakumone ko lingo, nu nti anita. Tondo mukiti wobe akukuaga Yehowa boba kutukila busikila bwage. 13 Ndi tabasambalide mukota wane bunakitile geitaga Yezebeli balengania ba Yehowa? Bunabisile balengania ba Yehowa lukama lumozi, makumi matano mu kalimba na kalimba nu nabalisizie tumpampa nu mazi? 14 Kano kaluma ukutenda bunee: Enda, ubule mukota wobe bunee: ‘Lola Elia eli gano.’ Akunita!”
15 Tondo Elia amwakwide bunee: “Anga bukulama Yehowa, Mwiya Mayombo, u unkukitila, lebelebe nkwidolesia lelo lwabusio lwage.”
16 Obadia endile akulumania Ahabu nu amusambalide. Nu Ahabu endile akulumania Elia. 17 Gamonine Ahabu ku Elia, amubuzizie bunee: “Ndi uwe u walubikania baIsraeli?”
18 Nu Elia amwakwide bunee: ‘‘Nsyalubikania baIsraeli tondo uwe nu numba za so, kubuno mwasigile makakizio ma Yehowa nu wayangile baBaali. 19 Kano kaluma, singa bantu kunkundamanizia baIsraeli bansania mu mwiduko wa Karmeli, nu babo balengania ba Baali nkama inazi nu makumi matano, nu babo balengania ba Ashera nkama inazi bakuliaga ku meza ma Yezebeli.”
20 Ahabu asingile migenzi ku baIsraeli bansania nu akundamanizie balengania ku mwiduko wa Karmeli.
Balengania ba Baali nu Elia
21 Elia akundile bantu bansania nu atendile bunee: “Aaba nu nkungu nkizi zimwizangiazangia mu makengelo mabili? Ndi Yehowa eli Kalaga, muyangazi; tondo ndi Baali u Kalaga, muyangazi.” Nu bantu tabamwakwide kampa.
22 Elia atendile ku bantu bunee: “Nne nasigala mulengania wa Yehowa nnenyene; tondo balengania ba Baali beli nkama inazi nu makumi matano. 23 Ububo tukaswe ngombe ibili. Basombole emozi kuzo nu bazisese byindi byindi nu kuzibika gantata ga misali, tondo tababike keiya kuzo. Nu nne nalongeke zezo engo ngombe nu kuzibika gantata ga misali nu nsyabike keiya kuzo. 24 Inyuwe segazi ku izina lya kalaga keinyu nu nne nasege ku izina lya Yehowa, nu kalaga wakulage na keiya nti u Kalaga wa lebelebe.”
Nu bantu bansania bakwide bunee: “Watenda busoga.”
25 Elia abwide balengania ba Baali bunee: “Musombole ngombe emozi, nu kuzilongeka tanga, kubuno inyuwe muli beingi; nu mutekule izina lya kalaga keinyu, tondo tamubike keiya gansi.” 26 Nu batolile zezo ngombe zibakasilwe. Bazilongekile nu batendide izina lya Baali kutukila nindunindu aaba nu makuluka, batendile bunee: “Ee Baali, tungwilile.” Tondo takwabezaga iyuki aba kwakula. Nu bo batuminetumine lwabusio lwa kayulo kabakitile.
27 Mu makuluka, Elia abakitile nguza. Abatendile bunee: “Lalukazi n'iyuki inene kubuno eli kalaga; embe akukengela bingo bitondo aba eli na mulimo, aba endile lugendo aba embe eiyombeka nu atunganana kuyukibwa.” 28 Balalukile n'iyuki inene, beisesile na myene nu tukengo anga bwabezaga bumba bwabo, aaba nu gabakumbile mikila. 29 Nu gatingile makuluka, balenganizie aaba nu mu nkungu za kukasana kisansa, tondo takwabezaga iyuki aba iyakulo aba kyakumonekako.
30 Kusila Elia atendile bantu bansania bunee: “Nkundazi.” Bantu bansania bamukundile. Alongekile kasenga ka kayulo ka Yehowa kabalanganizibwe. 31 Elia atolile makozi ikumi nu mabili anga buli maganzo ma bikanga bya bana ba Yakobo watendilwe na Yehowa bunee: “Izina lyobe lyabe Israeli.” 32 Nu angile kasenga na mamo makozi mu izina lya Yehowa. Ombile kagezi kanene kutimba kasenga. 33 Kumbusa anzile misali. Asesile ngombe byindi byindi nu azibikile gantata ga misali. 34 Atendile bunee: “Izaziazi malega manene na mazi nu kumakubula gantata ga kisansa kya kugisia nu gantata ga misali.”
Atendile lingo bunee: “Kitazi limbizi lya mabili.” Bakitile limbizi lya mabili.
Atendile bunee: “Kitazi limbizi lya masatu.” Bakitile limbizi lya masatu. 35 Nu mazi magelile ku ntungo kwa kasenga, meizazizie kagezi.
36 Mu nkungu za kukasana kisansa, Elia mulengania, asigelede nu asegile bunee: “Ee Yehowa, Kalaga wa Abrahamu nu Isaka nu Israeli. Bamenye lelo buno uwe u Kalaga mu Israeli, nu buno nili mukiti wobe nu nakitile bibino bitondo binsania ku iyuki lyobe. 37 Nnakule, ee Yehowa, nnakule buno bantu babano bakumenye buno uwe u Yehowa uli Kalaga, nu ukugalukya mitima zabo kusubya kuguli.” 38 Nu keiya ka Yehowa kagelile. Kagisizie kisansa kya kugisia nu nkuzi nu makozi nu nsi nu kalambile mazi mabezaga mu kagezi.
39 Gamonine bantu bansania ku bubo, bagwede bukukama gansi nu batendile bunee: “Yehowa eli Kalaga, Yehowa eli Kalaga.”
40 Nu Elia atendile bunee: “Katazi balengania ba Baali; tamusige wampa kutina.” Babakatile nu Elia abagezizie ku luuzi lwa Kisoni nu abeitile kuko.
Mbula ku masego ma Elia
41 Nu Elia abwide Ahabu bunee: “Enda kulia nu kunua, kubuno mikulumino za mbula zise zungubwa ko.” 42 Ahabu abakamine buno alie nu anue, tondo Elia abakamine ku nkangamo za Karmeli. Einamine gansi nu kubika malanga gasamba mazu, 43 nu atendile ku mukiti wage bunee: “Bakama kano kaluma nu lola ku lulenge lwa Kitatenge.
+ \fr 18:43 \ft La Mer Mediterranee. ”
Abakamine, nu alolile nu amwakwide bunee: “Takuli kena.”
Nu mambizi mutubakamo Elia amutendile bunee: “Enda lingo.” 44 Ku limbizi lya mutubakamo atendile bunee: “Lola kimpa kikeke kikutuka mu Kitatenge nu kili anga kuboko kwa muntu.”
Elia amutendile bunee: “Enda kubula Ahabu bunee: ‘Longeka tuyanga twobe, ugele buno mbula zikukubizie.’” 45 Mu nkungu nkeke tugu, igulu linine na bimpa nu lumpumpu lwapupile. Kwalokile mbula nkali. Nu Ahabu abakamine mu kayanga kage nu endile ku Yezereheli. 46 Kuboko kwa Yehowa kwabede ku Elia. Eikokomezizie nsulu mu kibunda nu endile lubilo lwabusio lwa Ahabu nu kwingila ku Yezereheli.