Elia akulengania nzala
17
1 Elia muTisibe, umozi wa bantu baGileadi, abwide Ahabu bunee: “Lebelebe anga bukulamaga Yehowa, Kalaga wa Israeli, u nkukitila, takwabe mame aba mbula kuloka ku myaka zeno, tugu ku iyuki lyane.” 2 Nu iyuki lya Yehowa lyabaside Elia bunee: 3 “Tuka gano, sondelezia, wende ku lulenge lwa kukutukaga kisongo kya busi nu wibise bwigi na luuzi lwa Keriti luli butunganana na Yordani. 4 Nu wanue mazi ma luuzi nu nakakizizie tuzoni kukulisia kuko.”
5 Ububo endile nu akitile anga bwamukakizizie Yehowa. Endile kwikala bwigi na luuzi Keriti luli bwigi na Yordani. 6 Nu tuzoni twamuvwilide na kampampa nu nyama mu nindunindu, nu kampampa nu nyama mwigolo. Anuaga mazi ma luuzi. 7 Tondo kumbusa kwa nkungu nkeke, luuzi lwakamine kubuno mbula tazalokile mu kisi.
Elia eikala ku Zarepata
8 Iyuki lya Yehowa lyamubaside lingo bunee: 9 “Zanzuka wende ku Zarepata guli wa Sidoni, wikale kuko. Nakakizizie mukikulu musigala kuko buno akulisie.” 10 Nu azanzukile nu endile ku Zarepata. Gaabasile ga mwingilo wa mwino, gabezaga mukikulu musigala akusongya misali. Amumanine nu kumusega bunee: “Nkukusega, enda kundondela mazi makeke mu kituma nimanue.” 11 Nu endile kumatola, tondo amumenne lingo nu kutenda bunee: “Mvwile na kyindi kya kampampa mu kuboko kwobe.”
12 Nu akwide bunee: “Lebelebe Yehowa, Kalaga wobe, eli mulami, tondo nsili na kampampa, tugu ikasa limozi lya bunga bwa ngano mu nyungu nu makiti makeke mu mbusu. Nkusongya misali ibili nu nasubye, nu nayike lyo kundi nu ku mwana wane; twalie nu kukua.”
13 Nu Elia amubwide bunee: “Ntukue boba. Enda ukite anga buukutenda, tondo nkitile tanga kampampa kakeke nu mvwile nako; kumbusa kita ko kuguli nu ku mwana wobe. 14 Kubuno Yehowa, Kalaga wa Israeli, atenda bunee: ‘Bunga bwa ngano tabwasile mu kitili, nu makiti tamasile mu mbusu aaba nu ku busi bubo bukalokya Yehowa mbula ga kisi.’” 15 Endile nu akitile anga bwatendile Elia. Elia nu wenyene nu numba zage balide bindi byingi. 16 Bunga bwabezaga mu kitili tabwidile nu makiti tamasilile anga bwatendile Yehowa mu kanua ka Elia.
Elia ayukya mwana wakule wa musigala.
17 Kumbusa kwa bubo, mwana wa wozo mukikulu wa zezo numba akatilwe na lusambo. Lusambo lwage lwitilide nu muuza wage wasilile. 18 Wozo mukikulu abwide Elia bunee: “Ee muntu wa Kalaga, kikizi kili ganisamba nobe? Ndi wambaside kunkengelezia bwagi bwane nu kwita mwana wane?”
19 Amwakwide bunee: “Nkase mwana wobe.” Amutolile ku bukuba bwa mukikulu, amwekile ku busio bwage bwa kuntata kwikalaga nu amubikile ga mugu wage. 20 Alilile ku Yehowa bunee: “Ee Yehowa, Kalaga wane, ndi watalika lingo bubi ku wono musigala u nkwikala kweli mu kwita mwana wage?” 21 Idambikile mambizi masatu gantata ga mwana. Alilile ku Yehowa bunee: “Ee Yehowa, Kalaga wane, nkukusega buno mutima wa mwana wono usubye lingo mweli.” 22 Yehowa ungule iyuki lya Elia nu mutima wa mwana wasubizie lingo nu ayukile. 23 Elia atolile mwana, amugezizie kutuka ku busio bwa kuntata bwa numba nu amukasile ku nina. Nu amubwide bunee: “Lola mwana wobe eikile na kalamo!”
24 Nu musigala abwide Elia bunee: “Kano kaluma namenya buno uwe uli muntu wa Kalaga nu iyuki lya Yehowa mu kanua kobe lili bulili.”