Lukuo lwa Basha
16
1 Iyuki lya Mukota lyabaside Yehu, mwana wa Hanani, ku kabamba ka Basha kutenda bunee: 2 “Nakusakikile kutuka ku mukungu, kukubika mwangati wa bantu bane baIsraeli, tondo kubuno watabangile mu nzila za Yeroboamu, nu kwagia bantu bane baIsraeli buno unnongie ku mibi zabo, 3 lola, natikye Basha nu numba zage, nu nabike numba zobe anga numba za Yeroboamu, mwana wa Nebati. 4 Wozo wa numba za Basha wakuage mu mwino, nti alibwe na mboa, nu wozo wage wakuage mu isoa, nti tuzoni twa mpelela twamulie.” 5 Bingo bitondo byakitile Basha, nu magala mage, ndi tabyasanzilwe mu mukanda wa byawakalazi wa bakota ba Israeli? 6 Nu Basha akule; ayikilwe mu Tirza, nu Ela, mwana wage, angatile mu kiziki kyage. 7 Iyuki lya Yehowa lidolesizie mu mulengania Yehu, mwana wa Hanani, ku kabamba ka Basha nu ku numba zage, nu ku kabamba ka mibi insania zaakitile ku meiso ma Yehowa, kumwongia na mulimo wa maboko mage, nu kususania kikanga kya Yeroboamu kubuno azikizye numba za Yeroboamu. Mukota Ela wa baIsraeli
8 Mu mwaka wa makumi mabili nu mutuba wa Asa, mukota wa baYuda, Ela mwana wa Basha, alingile kwangata baIsraeli mu Tirza. Angatile myaka ibili. 9 Mukiti wage Simuri, mukota wa kyindi kya kibombo kya tuyanga twage, amukalide lwango lubi gaabezaga mu Tirza; anuaga nu kukatwa na maku mu numba za Arsa, wabezaga mwangati wa numba za mukota ku Tirza. 10 Simuri eingide, amulibwide nu amwitile mu mwaka wa makumi mabili nu mutubakamo wa Asa, mukota wa baYuda. Angatile mu kiziki kyage. 11 Gaabede mukota nu kwikala ga kisumbi kyage kya bukota, eitile numba insania za Basha. Ntamusigide wamulume wampa mu kikanga kyage aba mwida wage. 12 Simuri azikizye numba insania za Basha anga bwatendile Yehowa mu kanua ka Yehu mulengania ku kabamba ka Basha. 13 Akitile bubo ku kabamba ka mibi insania za Basha nu za Ela mwana wage zibagile nu kwagia baIsraeli nu kongia Yehowa, Kalaga wa Israeli, na nkisi zabo. 14 Bingo bitondo bya Ela nu binsania byakitile, ndi tabyasanzilwe mu mukanda wa byawakalazi bya bakota ba Israeli?
Mukota Simuri wa baIsraeli
15 Mu mwaka wa makumi mabili nu mutubakamo wa Asa, mukota wa baYuda, Simuri angatile bindi mutubakamo ku Tirza. Bantu bakitile ido kwitana na baGibetoni wa baFilistini. 16 Nu bantu babikaga ido bongule ku musagu buno Simuri akita musona nu kwita mukota. Nu bubo busi, baIsraeli bansania babikile Omuri, mukota w'iyombo, kuba mukota wa baIsraeli. 17 Ububo Omuri endile nu baIsraeli bansania gamozi nage ku Gibetoni, nu bakatile Tirza. 18 Nu gamonine Simuri buno mwino wakatwa, eingide mu busio bwa kwidanga bwa numba za mukota. Eigisizie gamozi na numba za mukota, nu akule. 19 Akule ku kabamba ka mibi zage zaakitile ku meiso ma Yehowa. Endile mu nzila za Yeroboamu nu mu mibi zaagizie na baIsraeli. 20 Bingo bitondo binsania byakitile Simuri, nu nango mbi zaakalile, ndi tabyasanzilwe mu mukanda wa byawakalazi bya bakota ba baIsraeli?
21 Kumbusa bantu ba Israeli bibeganizie bibombo bibili. Kibombo kimozi kya bantu kyayangile Tibuni mwana wa Ginati, buno bamubike mukota, nu kingo kibombo kyayangile Omuri. 22 Tondo bantu bayangile Omuri bakindile babo bayangaga Tibuni, mwana wa Ginati, nu Tibuni akule, nu Omuri angatile.
23 Mu mwaka wa makumi masatu nu umozi wa Asa, mukota wa baYuda, Omuri angatile baIsraeli. Angatile myaka ikumi nu ibili kumbusa kwa kwangata ku Tirza myaka mutuba. 24 Akunzile mwiduko wa Samaria ku Semeri, ku talanta ibili za feza. Obakile gantata ga mwiduko nu amanine mwino wobakile izina lya Samaria, kuyangana n'izina lya Semeri, wabezaga nyene mwiduko. 25 Nu Omuri akitile bubi ku meiso ma Yehowa; akitile bwagi kutinga bansania babezaga lwabusio lwage. 26 Kubuno endile mu nzila insania za Yeroboamu mwana wa Nebati, nu mu mibi zaagizie na baIsraeli buno bongie Yehowa, Kalaga wa Israeli, na nkisi zabo.
27 Bingo bitondo binsania byakitile Omuri, nu magala maalolesizie, ndi tabyasanzilwe mu mukanda wa byawakalazi bya bakota ba baIsraeli? 28 Nu Omuri akule nu ayikilwe mu nsinda za beisi ku Samaria. Nu Ahabu, mwana wage, angatile mu kiziki kyage.
29 Ahabu mwana wa Omuri angatile baIsraeli mu mwaka wa makumi masatu nu kinana wa Asa, mukota wa baYuda. Ahabu angatile baIsraeli ku Samaria myaka makumi mabili nu ibili. 30 Ahabu mwana wa Omuri, akitile bubi ku meiso ma Yehowa kutinga bansania babezaga lwabusio lwage. 31 Akengede buno buli anga bukeke kwitila mu mibi za Yeroboamu, mwana wa Nebati; asongile Yezebeli, mukinga wa Etibali mukota wa baSidoni, nu endile kukitila Baali nu kumukumbamina. 32 Angile kasenga ka Baali mu numba za Baali zoobakile ku Samaria. 33 Ahabu akitile nkisi za Ashera nu itilide kongia Yehowa, Kalaga wa Israeli, kutinga bakota bansania ba Israeli babezaga lwabusio lwage. 34 Mu bindi byage, Hieli wa ku Beteli obakile Yeriko. Abikile kibanza kyago mu kukua kwa Abiramu, nkula zage, nu abikile nibi zage mu kukua kwa Segubu, malibilo mage anga bwatendile Yehowa mu kanua ka Yosua mwana wa Nuni.