Mukota Abiyamu wa baYuda
15
1 Mu mwaka w'ikumi nu kinana wa kwangata kwa Yeroboamu, mwana wa Nebati, Abiyamu alingile kwangata baYuda. 2 Angatile myaka isatu mu Yerusalema, nu izina lya nina lyabezaga Maka, mukinga wa Abisaloma.+ \fr 15:2 \ft Lungo lukita lwa kusanza Abisaloma. Lola ku 2 Nkiko 13:1. 3 Atabangile mu bwagi bunsania bwakitile isi lwabusio lwage nu mutima wage tawabezaga wasililila ku Yehowa, Kalaga wage, anga mutima w'isi Davidi. 4 Tondo ku kabamba ka Davidi, Yehowa, Kalaga wage, abikile lusase ku Yerusalema, kumuzanzulila mwana wage kumbusa kwage kulindia Yerusalema. 5 Kubuno Davidi akitile busoga ku meiso ma Yehowa nu ntagile mu kitondo kinsania kyamukakizizie bindi binsania bya kalamo kage, tugu ku kitondo kya Uria muHiti. 6 Kwabede bita gasamba Rehoboamu nu Yeroboamu bindi binsania bya kalamo ka Rehoboamu. 7 Nu bingo bitondo binsania byakitile Abiyamu, ndi tabyasanzilwe mu mukanda wa byawakalazi bya bakota ba Yuda? Kwabezaga bita gasamba Abiyamu nu Yeroboamu. 8 Abiyamu akule nu bamuyikile mu mwino wa Davidi. Asa, mwana wage, angatile mu kiziki kyage.
Mukota Asa wa baYuda
9 Mu mwaka wa makumi mabili wa Yeroboamu, mukota wa baIsraeli, Asa alingile kwangata baYuda. 10 Angatile myaka makumi manazi nu umozi mu Yerusalema. Izina lya ninangulu lyabezaga Maka, mukinga wa Abisaloma. 11 Nu Asa akitile bwisanana ku meiso ma Yehowa, anga isi Davidi. 12 Apumbizie baSodoma mu kisi nu kutikya nkisi insania zakitaga beisi. 13 Atikizye ninangulu Maka ga kisumbi kyage kya bukota kubuno akitile nkisi za Ashera. Nu Asa abungwide nkisi zage; azigisizie mu mpinga za luuzi lwa Kiduroni. 14 Biziki byasakama tabyatikizibwe, tondo mutima wa Asa wabezaga wasililila lwabusio lwa Yehowa bindi byage binsania. 15 Alusizie mu numba za Yehowa bya feza nu bya olo nu bituma byengezie isi, gamozi na bibyo byengezie wenyene.
16 Kwabede bita gasamba Asa nu Basha, mukota wa baIsraeli, bindi binsania bya kalamo kabo. 17 Nu Basha, mukota wa baIsraeli, endile kwitana na baYuda. Obakile Rama buno bantu ba Asa, mukota wa Yuda, tabeingile nu kubasa. 18 Kumbusa Asa asombwede feza nu olo insania zasigede mu masuku ma numba za Yehowa nu numba za mukota; azibikile mu maboko ma bakiti bage. Mukota Asa abasingile ku Beni-Hadadi, mwana wa Taburimoni, mwana wa Hesioni mukota wa Aramu, wikalaga ku Damasiki kutenda bunee: 19 “Kube mugomio gasamba uwe nu nne anga buwabezaga gasamba tatane nu so. Nakusingila lukaso lwa feza nu olo buno wende kwita mugomio wobe na Basha mukota wa baIsraeli buno atuke kwane.”
20 Beni-Hadadi ongule mukota Asa. Asingile bakota ba mayombo kwitania miino za Israeli nu bakindile Iyoni, Dani, Abeli-Beti-Maka nu Kinereti kinsania gamozi na kisi kinsania kya Nafutali. 21 Gongule Basha ku wozo musagu alekede kobaka Rama nu eikede mu Tirza. 22 Mukota Asa amanine baYuda bansania, ta umozi kusigala. Bekile makozi nu miti za Basha zobakaga nazo Rama. Nu mukota Asa obakile nazo Geba wa Benjamina nu Misipa. 23 Nu bingo bitondo binsania bya Asa, nu magala mage mansania nu kinsania kyakitile nu miino zoobakile, ndi tabyasanzilwe mu mukanda wa byawakalazi bya bakota ba Yuda? Tondo nkungu za bukungu bwage, abede na lusambo mu magulu. 24 Asa akule anga beisi nu ayikilwe gamozi nabo mu mwino w'isi Davidi; nu Yosafati, mwana wage, angatile mu kiziki kyage.
Mukota Nadabu wa baIsraeli
25 Nu Nadabu mwana wa Yeroboamu alingile kwangata baIsraeli mu mwaka w'ibili wa Asa mukota wa baYuda. Angatile baIsraeli myaka ibili. 26 Akitile buteli busoga ku meiso ma Yehowa. Atabangile mu nzila z'isi nu mu mibi zaagizie na baIsraeli. 27 Nu Basha mwana wa Ahiya, wa kikanga kya Isakari, amukalide lwango nu amwitile ku Gibetoni wa baFilistini, gabezaga Nadabu nu baIsraeli bansania batimba Gibetoni. 28 Nu mu mwaka w'isatu wa Asa, mukota wa baYuda, Basha amwitile nu angatile mu kiziki kyage. 29 Gaabede mukota, eitile numba insania za Yeroboamu. Ntasigide Yeroboamu wampa na kalamo. Amuzikizye anga bwatendile Yehowa mu kanua ka mukiti wage Ahiya, wa Siloni; 30 ku kabamba ka mibi za Yeroboamu zaakitile nu zaagizie na baIsraeli, kongia Yehowa, Kalaga wa Israeli.
31 Bingo bitondo bya Nadabu nu binsania byakitile, ndi tabyasanzilwe mu mukanda wa byawakalazi bya bakota ba Israeli? 32 Kwabede bita gasamba Asa nu Basha, mukota wa baIsraeli, bindi binsania bya kalamo kabo.